ខេត្តកំពង់ឆ្នាំង៖ ព្រូរថយន្តម្នាក់បានកៀបខ្លួនក្នុងកាប៊ីនរថយន្តស្រែកអោយគេជួយរហូតដល់ដាច់ខ្យល់ស្លាប់ នៅពេលឪពុកចិញ្ចឹមរបស់ខ្លួនបានបើកបររថយន្តលឿនងោកបុក
ដើមស្វាយមួយដើមនៅក្នុងភូមិអ្នកស្រុកហើយរថយន្តបានក្រឡាប់បះជើង។ ហេតុការណ៍
នេះបានកើតឡើងនៅម៉ោង៤និង៣០នាទី ទាបភ្លឺថ្ងៃទី១០ ខែវិច្ឆិកា ឆ្នាំ២០១៥ នៅលើផ្លូវ
ជាតិលេខ៥ ក្នុងភូមិព្រៃខ្មែរ ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង។
សមត្ថកិច្ចនគរបាលស្រុករលាប្អៀរបានអោយដឹងថា៖ ព្រូរថយន្តខាងលើមានឈ្មោះ
ហែម សុជាតិ អាយុ៣២ឆ្នាំ រស់នៅភូមិរំចេក ឃុំឈើទាល ស្រុកស្វាយជ្រុំ ខេត្តស្វាយរៀង ចំណែកអ្នកបើកបររថយន្តជាឪពុកចិញ្ចឹមឈ្មោះ ម៉ុង វណ្ណា អាយុ៥១ឆ្នាំ មុខរបរដឹក
គ្រឿងក្រអូបដើរលក់តាមខេត្ត។
អ្នកឃើញហេតុការណ៍គ្រោះថ្នាក់នេះបានអោយដឹងថា៖ មុនពេលកើហេតុរថយន្តនេះម៉ាកហ៊ីយ៉ាន់ដាយ ពណ៌ខៀវស ពាក់ស្លាកលេខ ភ្នំពេញ AF – 6023 បានបើកបរយ៉ាង
លឿនពីជើងទៅត្បូង លើផ្លូវជាតិលេខ៥ដែលមានភ្លៀងរលឹមស្រិចៗផង ខណៈនោះទំនង
ជាអ្នកបើកបរងោក ក៏បានជ្រុលចង្កូតទៅខាងស្តាំផុតផ្លូវជាតិបុកគល់ស្វាយមួយដើមពេញទំហឹងឡើងរលើងឬស ហើយក្បាលរថយន្តបានវិលបកក្រោយវិញក្រឡាប់បះជើង។
នៅក្នុងហេតុការណ៍នេះបានធ្វើអោយព្រូរថយន្តរបួសធ្ងន់ ដោយបានកៀបក និងដៃជើងជាប់ក្នុងកាប៊ីន ហើយបានស្រែកអោយគេជួយរហូតដល់ដាច់ខ្យល់ស្លាប់តែម្តង ព្រោះ
តែអ្នកស្រុក និងសមត្ថកិច្ចមូលដ្ឋានខំព្យាយាមគាស់ទាញដែករថយន្តកាប៊ីនដែលកំពិតយ៉ាងណាក៍មិនអាចយកជនរងគ្រោះចេញបានឡើយ ចំណែកអ្នកបើកបររថយន្តបានរងរបួសស្រាល។
ក្រោយពេលកើហេតុសមត្ថកិច្ចនគរបាលស្រុករលាប្អៀរ បានជួលរថយន្ត៣គ្រឿង
ជាចុងក្រោយគឺបានជួលរថយន្តស្ទូចជួយទាក់ខ្សែកាបអូសដែកកាប៊ីនរថយន្ត ជាង១ម៉ោងទើបយកសពជនរងគ្រោះចេញបាន។ សពជនរងគ្រោះត្រូវបានសមត្ថកិច្ចប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។
ករណីគ្រោះថ្នាក់ខាងលើនេះត្រូវបានសមត្ថកិច្ចបានអូសយករថយន្តនេះ មករក្សាទុកនៅក្នុងងអធិការដ្ឋាននគរបាលស្រុករលាប្អៀរ ដើម្បើធ្វើការដោះស្រាយជាមួយអ្នកស្រុកជាម្ចាស់ភូមិ និងប្រពន្ធកូនជងរងគ្រោះ។ ចំណែកគ្រោះថ្នាក់នេះត្រូវបានគេសន្និដ្ឋានថា៖ កើតឡើងដោយសារអ្នកបើកបរ បើកបររថយន្តលឿនទាំងងោកងុយទើបបង្កអោយមានគ្រោះថ្នាក់បែបនេះ៕
