កណ្ដាល៖ ប្រជាពលរដ្ឋដែលត្រូវធ្វើប្លង់ដីទូទាំងស្រុកកណ្តាលស្ទឹងបាននិយាយត្អូញត្អែរឲ្យដឹងថា ពួកគាត់ទៅធ្វើប័ណ្ណកម្មសិទ្ធិដីធ្លី (ប្លង់ដី) នៅការិយាល័យរៀបចំដែនដីនគរូបនីយ៍កម្ម សំណង់ និងសុរិយោដី ស្រុកកណ្តាលស្ទឹងដែលមានលោក នៅ សាត ជាប្រធានការិយាល័យនោះ មានការពិបាកខ្លាំងណាស់ “ ដូចទៅសុំភ្លើងយក្សអញ្ចឹងដែរ ” ព្រោះថា លោកនៅ សាត មិនដែលឃើញមុខនៅក្នុងបន្ទប់ធ្វើការរបស់លោកទេ ការិយាល័យសុរិយោដីស្រុកកណ្តាលស្ទឹង បិតទ្វារជិតរហូត ហើយបើចង់ជួបលោកនៅ សាត ដើម្បីចុះហត្ថលេខាលើឯកសារធ្វើប្លង់ដី ទាល់តែទូរស័ព្ទ បើមិនដូច្នោះទេ មិនងាយបានជួបឡើយ ហើយលោកនៅសាតតែងតែនិយាយប្រាប់ប្រជាពលរដ្ឋ និងមន្ត្រីថ្នាក់ក្រោមថា លោកជាប់រវល់ដើររកស៊ីខ្លាំងណាស់ក្នុងមួយថ្ងៃៗ ។
ប្រភពពីប្រជាពលរដ្ឋដដែលបានលើកឡើងបន្តថា រាល់ឯកសារធ្វើប្លង់ដី ឬផ្ទេរកម្មសិទ្ធិរបស់ពួកគាត់ដែលបានបំពេញបែបបទតាមជំនាញ និងត្រួតពិនិត្យត្រឹមត្រូវហើយនោះ ក៏លំបាកលំបិនក្នុងការបញ្ជូនឯកសារដើម្បីធ្វើប្លង់ដីដែរ ហើយគេយកឯកសារកាក់ទុកជាច្រើនខែ គឺលោក នៅ សាត មិនព្រមចុះហត្ថលេខាបំពេញបែបបទតាមលក្ខណៈបច្ចេកទេស ដោយលើកហេតុផលថា ខុសនេះ ខុសនោះរហូតមិនដែលត្រូវម្តងណាឡើយ ហើយទុកឲ្យឯកសារធ្វើប្លង់ដី
របស់ប្រជាពលរដ្ឋកកស្ទះជាបន្តបន្ទាប់ ប៉ុន្តែបើម្ចាស់ប្លង់ដីមួយណាមានស្រោមសំបុត្រជូនលោក នៅ សាត នោះ លោកនឹងចុះហត្ថលេខាភ្លាម បើគ្មានស្រោមសំបុត្រទេ កុំសង្ឃឺមបានប្លង់កម្មសិទ្ធិមកកាន់កាប់ឲ្យសោះ អ្វីដែលលោក នៅ សាត កំពុងប្រព្រឹត្តអំពើពុករលួយធ្វើឲ្យរាំងស្ទះ និងមានការលំបាកដល់ប្រជាពលរដ្ឋក្នុងមូលដ្ឋានយ៉ាងក្រៃលែង ។
ទន្ទឹមនឹងភាពមិនប្រក្រតីបង្កការលំបាកដល់ប្រជាពលរដ្ឋខាងលើ ពួកគាត់ក៏បានសំណូមពរយ៉ាងទទូចស្នើសុំដល់អាជ្ញាធរពាក់ព័ន្ធគ្រប់លំដាប់ថ្នាក់ ជាពិសេស លោក អ៊ឹម ឈុនលឹម ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់មេត្តាមានវិធានការទៅលើមន្ត្រីរូបនេះ ឲ្យបានឆាប់បំផុត ព្រោះបច្ចុប្បន្នលោក នៅ សាត កំពុងធ្វើព្យុះភ្លៀងយ៉ាងសម្បើមណាស់ និងប្រព្រឹត្តអំពើពុករលួយ ជាពិសេសគ្មានចេតនាធ្វើការងារបម្រើប្រជាពលរដ្ឋក្នុងមូលដ្ឋានទេ ជាងនេះទៀត
មន្ត្រីរូបនោះមិនគោរពតួនាទី និងភារកិច្ចរបស់ខ្លួននោះឡើយ ហើយរាល់ឯកសារដីធ្លីរបស់ប្រជាពលរដ្ឋក្នុងស្រុកកណ្តាលស្ទឹង កំពុងកកស្ទះគ្រប់កន្លែងម្នាក់ៗកំពុងរង់ចាំធ្វើ ប័ណ្ណកម្មសិទ្ធិ ដើម្បីយកមកប្រើប្រាស់ស្របតាមផ្លូវច្បាប់ ។ រីឯការងារសុំច្បាប់អនុញ្ញាតិសាងសង់វិញ បើម្ចាស់សំណង់មិនរត់ច្បាប់សាងសង់តាម រយៈបក្ខពួករបស់ក្រុមលោក នៅ សាត ទេ គឺគេមិនចុះហត្ថលេខាផ្តល់ច្បាប់ឲ្យឡើយ ហើយបច្ចុប្បន្ន កំពុងកើតមានបញ្ហានៅក្នុងមូលដ្ឋាន គួរឲ្យព្រួយបារម្ភបំផុតលើគ្រួសារប្រជាពលរដ្ឋក្រីក្រនោះ ។ •មន្ត្រីត្អូញត្អែរពីរឿងលំបាកថាលោកប្រធានបង្កើតបកក្ខពួក និងមិនដែលចូល
កន្លែងធ្វើការ មន្ត្រីជាច្រើនរូបបានត្អូញត្អែរថា លោកនៅ សាត មិនត្រឹមតែប្រព្រឹត្តភាពមិនប្រក្រតីក្នុងការចុះហត្ថលេខាលើឯកសារធ្វើប្លង់ដីដល់ប្រជាពលរដ្ឋនោះទេ សូម្បីតែមន្ត្រីថ្នាក់ក្រោមក៏លោកមិនរាប់រកដែរ ការដឹកនាំរបស់គាត់បង្កើតបក្ខពួកនិយមនៅក្នុងកន្លែងធ្វើការ ពិសេសលោកនៅ សាត មិនចូលកន្លែងធ្វើការបង្កការលំបាកដល់មន្ត្រីថ្នាក់ក្រោមពេលត្រូវការជួបលោកដើម្បីចុះហត្ថលេខាលើឯកសារផ្សេងៗ ក៏ដូចឯកសារធ្វើប្លង់ដីឲ្យប្រជាពលរដ្ឋនៅក្នុងមូលដ្ឋាន ។ មន្ត្រីខាងលើបន្ថែមថា លោកនៅ សាត ជាមន្ត្រីដុះស្លែមួយរូប កាន់ជាប្រធានការិយាល័យសុរិយោដីស្រុកកណ្តាលស្ទឹង រាប់សិបឆ្នាំមកហើយ ហើយមួយរយៈចុងក្រោយនេះ លោកនៅ សាត បានដៃកំពុងធ្វើព្យុះភ្លៀង និងការដឹកនាំខុសឆ្គង ដោយមិនប្រើមន្ត្រីចាស់ៗដែលមានជំនាញច្បាស់លាស់ទេ គឺគេប្រើតែបក្ខពួករបស់ខ្លួនតែប៉ុណ្ណោះ ។
ចំពោះរឿងពុករលួយក្នុងការចុះហត្ថលេខាលើឯកសារធ្វើប្លង់ដីកន្លងមក មន្ទីររៀបចំដែនដីនគរូបនីយកម្ម សំណង់ ខេត្ត និងក្រសួងបានដឹងរឿងរ៉ាវខុសឆ្គងរបស់លោក នៅ សាត ច្បាស់ណាស់ ហើយបានបង្កើតសវនកម្មចុះត្រួតពិនិត្យដល់ការិយាល័យរៀបចំដែនដីននៅស្រុកកណ្តាលស្ទឹង ប៉ុន្តែក្រោយមកស្ងាត់រហូតដោយគ្មានការបញ្ជាក់ និងដោះស្រាយឲ្យបានត្រឹមត្រូវណាមួយឡើយ ។
មន្ត្រីបានត្អូញត្អែរដោយសង្កត់ធ្ងន់ថា អ្វីដែលលោកនៅ សាត កំពុងប្រព្រឹត្ត គឺវាផ្ទុយទៅនឹងកំណែទម្រង់ស៊ីជម្រៅរបស់រាជរដ្ឋាភិបាល ដែលបានខិតខំធ្វើការកែទម្រង់ដល់ទីជម្រៅលើគ្រប់វិស័យ និងលប់បំបាត់ឲ្យខានតែបានចំពោះបញ្ហាការប្រព្រឹត្តអំពើពុករលួយ បក្ខពួកនិយម ចុះហេតុអ្វីលោកប្រធានការិយាល័យរៀបចំដែនដីនគរូបនីយកម្ម សំណង់ និង
សុរិយោដីស្រុកកណ្តាលស្ទឹងរូបនេះ នៅតែហ៊ានប្រព្រឹត្តអំពើខុសឆ្គងជាបន្តបន្ទាប់យ៉ាងដូច្នេះ…? ទាក់ទិននឹងករណីខាងលើ លោក ប៉ាវ ផល្លា ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដី ខេត្តកណ្តាល បានប្រាប់ឲ្យដឹងថា លោកទើបតែឡើងកាន់ជាប្រធានមន្ទីរ ហើយកាលនៅជាអនុប្រធានមន្ទីរ លោកមិនទទួលបន្ទុកស្រុកកណ្តាលស្ទឹង ដូច្នេះ លោកដឹងពុំច្បាស់ដែរ ។
លោកប៉ាវ ផល្លា បន្ថែមថា ការដឹកនាំខុសឆ្គងរបស់មន្ត្រីណាម្នាក់ យើងត្រូវធ្វើការអនុវត្តទៅតាមផ្លូវច្បាប់ ហើយលើករណីនេះ ប្រសិនបើរឿងពិត នឹងត្រូវធ្វើការដោះស្រាយជាបន្ទាន់ មិនទុកឲ្យដំបៅរីករាលដាលអូសបន្លាយតទៅទៀតទេ ៕
