ធនាគារជាតិនៃកម្ពុជាទើបបានចេញសេចក្តីប្រកាសព័ត៌មានអំពីការចេញផ្សាយធនប័ត្រប្រភេទ ៥០.០០០រៀលគំរូថ្មីមួយទៀត។ សេចក្តីប្រកាសព័ត៌មានបានបញ្ជាក់ថា ដើម្បីចូលរួមអបអរសាទរ ព្រះរាជពិធីបុណ្យចម្រើនព្រះជន្ម ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ក្នុងគម្រប់ព្រះជន្មាយុ៦១ យាងចូល៦២ ព្រះវស្សា ដែលនឹងប្រព្រឹត្តទៅនៅថ្ងៃទី ១៣-១៤-១៥ ខែឧសភា ឆ្នាំ២០១៤ ខាងមុខនេះ សម្តេចអគ្គមហា សេនាបតីតេជោ ហ៊ុន សែន នាយរករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតអោយធនាគារ ជាតិនៃកម្ពុជាបោះផ្សាយ ទន្ទឹមគ្នានឹងធនបត្រផ្សេងទៀត និងដាក់អោយចរាចរធនប័ត្រប្រភេទ ៥០.០០០រៀល ជាផ្លូវការក្នុងព្រះរាជាណាចក្រកម្ពុជាចាប់ពីថ្ងៃទី៦ ខែឧសភា ឆ្នាំ២០១៤នេះតទៅ។ ក- លក្ខណៈទូទៅ ៖ -ទំហំធនប័ត្រ ៖ បណ្តោយ ១៥៥ មម និងទទឹង ៧២ មម -ពណ៌ចម្បង គឺពណ៌សា្លទុំ និងពណ៌ត្នោត ខ- ផ្ទៃខាងមុខ ៖ -ផ្នែកកណ្តាល ខាងស្តាំត្រូវបានរំលេចឡើងនូវព្រះឆាយាល័ក្ខណ៍លើពីមុខបញ្ឆិត ចំហៀងខាងឆ្វេងនៃអតីតព្រះមហាក្សត្រ ព្រះបរមរតនកោដ្ឋ ខាងឆ្វេងមានលេខ «៥០០០០» នៅពី លើគេ បន្ទាប់មកគឺជាហត្ថលេខរបស់ទេសាភិបាល និងអគ្គបេឡា ព្រមទាំងរូបជើងពានទ្រព្រះខ័ន ព័ទ្ធជុំវិញដោយកម្រងផ្កា និងក្បាច់ភ្ញីទេស និងនៅខាងក្រោមមានលេខ-មាលា ដែលបោះពុម្ពដោយ ទឹកខ្មៅ រូបចម្លាក់នាគក្បាល៧ ដែលយកគំរូតាមរូបចម្លាក់ថ្មនៅប្រាសាទបាលីលេយ្យជិតអង្គរធំ និងអក្សរ «ប្រាំម៉ឺនរៀល» ព្រមទាំងអក្សរ «អ្នកក្លែងក្រដាសប្រាក់នឹងត្រូវផ្តន្ទាទោសតាមច្បាប់» នៅគែមខាងក្រោមនោះ និងមានខ្សែសុវត្ថិភាពទំហំ ១,២ មម កាត់ទទឹងក្រដាសប្រាក់ពីលើដល់ ក្រោម។ -ផ្នែកខាងស្តាំ ជ្រុងលើមានអក្សរ «ធនាគារនៃកម្ពុជា» ព្រមទាំងមានលេខ-មាលាដែល ត្រូវបានបោះពុម្ពដោយទឹកខ្មៅពណ៌ក្រហមនៅពីក្រោមនោះ និងជ្រុងខាងក្រោមមានលេខ «៥០០០០» និង «50000» នៅបន្តបន្ទាប់គ្នា។ -ផ្នែកខាងឆ្វេង មានលេខ «50000» ព្រាលៗដែលត្រូវបានបោះពុម្ពតាមបន្ទាត់បញ្ឈរ ព្រមទាំងមាននិមិត្តសញ្ញា ពិសេសសម្រាប់ជនពិការភ្នែកនៅពីក្រោមនោះ និងនៅកៀនខាងឆ្វេង មាន Hologram ទំហំ ១០ មម ប្រកបដោយបច្ចេកវិទ្យា និងស្តង់ដារកម្រិតខ្ពស់កាត់ទទឹងក្រដាស ប្រាក់ពីលើដល់ក្រោម។ គ- ផ្ទៃខាងខ្នង ៖ -ផ្នែកកណ្តាល ត្រូវបានរំលេចឡើងនូវរូបភាពប្រាសាទបាគងនៃក្រុមប្រាសាទរលួស ក្នុងខេត្តសៀមរាប និងមានអក្សរ «ប្រាំម៉ឺនរៀល» នៅពីក្រោមនោះ។ -ផ្នែកខាងស្តាំ មានរូបភាពកូនដំរីឈរទម្លាក់ប្រមោយចុះក្រោមដែឡយកគំរូតាមរូប ចម្លាក់ថ្មនៅប្រាសាទកោះកេរ ក្នុងឃុំស្រយ៉ង់ ខេត្តព្រះវិហារ និងមានលេខ «៥០០០០» នៅពីក្រោម នោះ ព្រមទាំងលេខ «50000» ដែលត្រូវបានបោះពុម្ពតាមបន្ទាប់បញ្ឈរនៅកៀនខាងស្តាំ។ -ផ្នែកខាងឆ្វេង ខាងលើមានអក្សរ «ធនាគារជាតិនៃកម្ពុជា» និង «NATIONAL BANK OF CAMBODIA» នៅបន្តបន្ទាប់គ្នា ព្រមទាំងលេខ «២០១៣» នៅពីក្រោមនោះ និងនៅជ្រុងខាង ក្រោមមានលេខ «៥០០០០»។ ចាប់ពីថ្ងៃចេញប្រកាសនេះតទៅ ធនប័ត្រប្រភេទ ៥០០០០រៀល គំរូថ្មី ត្រូវបានដាក់ធ្វើចរាចរ ទន្ទឹមគ្នាជាមួយនឹងធនប័ត្រប្រភេទផ្សេងៗទៀតដែលត្រូវបានចេញផ្សាយកន្លងមក។ សាធារណជន គ្រប់រូបត្រូវពិនិត្យ-សម្គាល់ធនប័ត្រគំរូថ្មីនេះអោយបានច្បាស់លាស់ដើម្បីជៀសវាងការភាន់ច្រឡំ៕
