ភ្នំពេញ ៖ ទំពាំងស្នងឫស្សី គឺពាក្យរបស់ចាស់បុរាណខ្មែរយូរណាស់មកហើយ។ បច្ចុប្បន្ននេះ ពាក្យនេះនៅតែត្រូវបានមនុស្សខ្មែរប្រើប្រាស់បានយ៉ាងទូលំទូលាយ។ ធាតុពិតនៃអត្ថន័យនៃពាក្យនេះ បានឆ្លុះបញ្ចាំងពីសង្គមមនុស្សបច្ចុប្បន្ន ជាមួយនឹងមនុស្សអតីតកាល ព្រោះតែមនុស្សគ្រប់រូបមិនមានជីវិតអមតទេ ហើយមនុស្សគ្រប់ជំនាន់ តាមធម្មជាតិត្រូវតែបន្តវេនជាបន្តបន្ទាប់។
ដូច្នេះ ការថែរក្សាវប្បធម៌នៃ សង្គមជាតិមួយត្រូវតែបន្តវេនទៅតាមសម័យកាល ហើយវាត្រូវតែវិវឌ្ឍតាមជីវភាព និងកម្រិតយល់ដឹងរបស់មនុស្ស។ ក្នុងន័យនេះ មនុស្ស ដែលមានតួនាទីជាអ្នកថែរក្សាវប្បធម៌ គឺត្រូវតែជាមនុស្ស ដែលមានចំណេះ ដឹង ភាពស្រមើស្រមៃច្នៃប្រឌិតឲ្យស្របទៅតាមសម័យកាល បើមិនដូច្នេះទេ វប្បធម៌នោះនឹងមិនអាចរីករាលដាលបានទេ។
សម្រាប់ជនជាតិខ្មែរយើង បានចាត់ទុកយុវជនជាសរសេរទ្រូងរបស់ប្រទេសជាតិ ពោលគឺពួកគេជាមនុស្ស ដែលរឹងមាំប្រកបដោយឆន្ទៈ និងចំណេះដឹង ហើយអាចកសាងមាតុភូមិមួយឲ្យរីកចំរើនទៅមុខបាន។ ដូច្នេះ បើចង់ឲ្យវប្បធម៌របស់ជាតិសាសយើងរីកចំរើនទៅបាន គឺពិតជាអាស្រ័យលើយុវជន? បច្ចុប្បន្ននេះ វប្បធម៌របស់បរទេសបានរីកដុះដាលក្នុងសង្គមខែ្មរយ៉ាខ្លាំង ហើយឥទ្ធិពលនេះបានចូលមកចាប់តាំងពីមានការរីកចំរើននៃការទាក់ទងធ្វើជំនួញជាមួយប្រទេសជិតខាងតាំងពីយូរលង់ណាស់មកហើយ។
យ៉ាងណាមិញ ការហូរចូលនៃវប្បធម៌បរទេសតាំងពីសម័យអតីតកាលមក វាមិនសូវជាមានឥទ្ធិពលលឿន ហើយខ្លាំងនោះទេ ពោលគឺដើម្បីផ្សព្វផ្សាយគេត្រូវការចំណាយពេលវេលាយូរណាស់។ ជាក់ស្តែងដូចជា ឥទ្ធិពលរបស់ព្រះពុទ្ធសាសនា និងព្រាហ្មសាសនាក្នុងប្រទេសកម្ពុជា ត្រូវចំណាយពេលវេលារាប់រយឆ្នាំ ទើបអាចជ្រាបចូលក្នុងវប្បធម៌របស់ខ្មែររហូតមកដល់សម័យបច្ចុប្បន្ន។ ចំណែកឯ ក្នុងពេលបច្ចុប្បន្នវិញ ការផ្សាយនៃប្រព័ន្ធផ្សព្វផ្សាយ ដែលមានដូចជាវិទ្យុទូរទស្ស៍បានដើតួនាទីយ៉ាងសំខាន់ក្នុងការផ្សព្វផ្សាយវប្បធម៌បរទេសក្នុងសង្គមខ្មែរ។ ឬសគល់នៃវប្បធម៌បរទេស ដែលបានហូរចូលក្នុងប្រទេសកម្ពុជាក្នុងសតវត្សទី២០ និងទី២១ នេះបានស្រោចឥទ្ធិពលរបស់ខ្លួន ភាកច្រើនទៅលើស្រទាប់យុវវ័យ។ ការហូរចូលនៃវប្បធម៌បរទេសនេះ បាននឹងកំពុងតែពន្លិចវប្បធម៌របស់ខ្មែរយើង។ យ៉ាងណាមិញ ការចម្លងវប្បធម៌បរទេសមួយចំនួន ក៏មានប្រយោជន៍សម្រាប់សង្គមខ្មែរបច្ចុប្បន្ន ដែលតម្រូវឲ្យមនុស្សរស់នៅបែបស៊ីវីល័យ ទំនើបនិយម ហើយការរស់នៅបែបនេះ គឺជាការជួយលើកស្ទួយនួវរបៀបរស់នៅបែបបុរាណមួយចំនួនធំ។
ដូច្នេះការហូរចួលនៃវប្បធម៌បរទេស ប្រៀបបាននឹងកាំបិតមុខពីរ ដែលអាចប្រើសម្រាប់គោលបំណងអាក្រក់ ក៏បាន និងប្រើក្នុងគោលបំណងល្អក៏បាន។ យើងបានដឹងហើយថាការហូរចូលនៃវប្បធម៌បរទេសក្នុងសង្គមខ្មែរ ភាគច្រើនមានឥទ្ធិពលទៅលើយុវវ័យ។ ជាក់ស្តែងដូចជាបច្ចុប្បន្ននេះ ខ្សែភាពយន្តកូរ៉េ និងចម្រៀងកូរ៉េបាននឹងកំពុងតែវាយលុកយ៉ាងខ្លាំង នៅលើទីផ្សារនៃប្រទេសកម្ពុជា ហើយភាគច្រើននៃយុវជនខ្មែរបានចម្លងម៉ូដសក់ ការស្លៀកពាក់មួយចំនួនតាមរយៈភាពយន្តទាំងនោះ។
យ៉ាងណាមិញ ការចម្លងទាំងអស់នេះវាមិនខុសទាស់អ្វីនោះទេ ប៉ន្តែគួរណាស់តែយុវជនមួយចំនួននោះ ស្គាល់ និងឲ្យតម្លៃនៃការស្លៀកពាក់បែបខ្មែរ ដែលជាវប្បធម៌ខ្មែរ តាំងពីយូរណាស់មកហើយនោះ។ ការស្លៀកពាក់លេចលើ ខើចក្រោមនេះ បានធ្វើឲ្យមានការរិះគន់យ៉ាងខ្លាំងពីសំណាក់មហាជនទូទៅ។ តួយ៉ាងដូចជាពេលថ្មីនេះ មានតារាល្បីមូយចំនួនបានថតរូបភាពរបស់ខ្លួនបង្ហោះតាមរយៈបណ្តាញសង្គម ដែលបង្ហាញពីការស្លៀកពាក់មិនសមជានារីខ្មែរសោះឡើយ។
តើនេះឬ ជាវប្បធម៌របស់ខ្មែរ? ទោះបីជាការស្លៀកពាក់នេះ បង្ហាញពីភាពទំនើបនិយមក៏ពិតមែន ប៉ុន្តែវាបានធ្វើឲ្យមនុស្សមួយចំនួនសើចចំអកឲ្យទៅវិញទេ។ ដូច្នេះ ដើម្បីឲ្យវប្បធម៌របស់ជាតិយើងបានរីកសុះសាយ ដូចបទចម្រៀងពង្សាវតាខ្មែរ គួរណាស់តែយើងនាំគ្នាអនុវត្តឲ្យបានត្រឹមត្រូវ ទោះបីជាយើងមិនអាចអនុវត្តឲ្យបានគ្រប់ពេលវេលាក៏ដោយ តែបើយើងចូលរួមអនុវត្តនៅតាមរដូវកាល។
ឧទាហរណ៍ដូចជាបុណ្យចូលឆ្នាំ ឬភ្ជុំបិណ្ឌ ជាដើម យើងនឹងអាចថែរក្សាវប្បធម៌របស់យើងបាន។ យុវជនជាធនធានមួយ ដែលមិនអាចខ្វះបានឡើយក្នុងការចូលរួមចំណែកក្នុងចែករំលែកនូវវប្បធម៌របស់ជាតិសាសរបស់យើងទៅកាន់បណ្តារប្រទេសផ្សេងៗទៀត៕
