បន្ទាយមានជ័យ ៖ ដើម្បីរក្សាបាន នូវសន្តិសុខសណ្តាប់ធ្នាប់ និងកិច្ចការពារបូរណៈភាពទឹកដី និងទប់ស្កាត់បទល្មើសឆ្លងដែន ជារៀងរាល់ថ្ងៃនគរបាលរដ្ឋបាល និងនគរបាលព្រំដែនរបស់ខេត្តបន្ទាយមានជ័យ បានអនុវត្តន៍ ការងារការពារផ្សព្វផ្សាយគោលនយោបាយភូមិឃុំមាន
សុវត្ថិភាពជូនដល់ពលរដ្ឋគ្រប់មូលដ្ឋាន និងល្បាតជាប្រចាំតាមបន្ទាត់ព្រំដែនកម្ពុជាថៃ ។
ជាក់ស្ដែងកាលពីចុងសប្តាហ៍នេះលោក អាត់ ខែម ស្នងការនគរបាលខេត្តបន្ទាយមានជ័យ បានចុះត្រួតពិនិត្យ និងពង្រឹង ដល់កងនគរបាលតាមបន្ទាត់ព្រំដែន កម្ពុជា-ថៃនៃវរៈសេនាតូចនគរបាលការពារព្រំដែន៩១១ និង៨០៧ ក្នុងមូលដ្ឋានរបស់ស្រុក-ក្រុងចំនួន៤ រួមមាន បន្ទាត់ព្រំដែនក្រុងប៉ោយប៉ែត ស្រុកអូរជ្រៅ ស្រុកស្វាយចេក ស្រុកថ្មពួក ។ ក្នុងការចុះត្រួពិនិត្យ និងពង្រឹងកិច្ចការងារព្រំដែននេះ លោក អាត់ ខែម បានមានប្រសាសន៍ថា ក្នុងនាមកងកម្លាំងឈរតាមបន្ទាត់ព្រំដែនត្រូវធ្វើយ៉ាងណា ទប់ស្កាត់អោយបាននូវឧក្រឹតកម្មឆ្លងដែន បទល្មើសឆ្លងដែន និងការពារអោយបានបូរណៈភាពទឹកដី និងបង្កើនកិច្ចសហប្រតិបត្តិការណ៍ ជាមួយភាគីថៃ ហើយធ្វើយ៉ាងណាជៀសអោយឆ្ងាយ ពីការឃុបឃឹតប្រព្រឹត្តិបទល្មើសជាដាច់ខាត ។ ជាមួយនិងការលើកឡើងខាងលើនេះលោកក៏បានកោតសរសើដល់កងកម្លាំងដែលជានិច្ចជាកាល តែងអនុវត្តន៍បានយ៉ាងខ្ជាប់ខ្ជួន នូវការងារល្បាត និងទំនាក់ទំនងជាមួយភាគីថៃ ធ្វើព្រំដែនមានស្ថេរភាព និងសន្តិភាព បង្ករលក្ខណៈងាយស្រួលដល់ប្រជាពលរដ្ឋ ។ មិនថែមតែប៉ុណ្ណោះ ក្រៅពីការងារស្នូល ក៏បានរួមចំណែកយ៉ាខ្លាំង ក្នុងកិច្ចការសង្គមដូចជាការងារជួយសាងសង់ផ្ទះជូនប្រជាពលរដ្ឋ ជួយពួកគាត់ដែលជួបគ្រោះធម្មជាតិ ។
ក្រៅពីកិច្ចការងារព្រំដែន បើនិយាយពីការងារនគរបាលរដ្ឋបាល និងជំនាញវិញ ក៏មិនខុសពីនគរបាលការពារព្រំដែនដែរ គឺតែងតែល្បាតទាំងយប់ទាំងថ្ងៃ និងការពារតាមគោលដៅសំខាន់ ៗ នៃមុខសញ្ញា របស់ក្រុមទុច្ចរិតដែលប៉ុនប៉ងធ្វើសកម្មភាពល្មើសនានា និងធ្វើការផ្សព្វផ្សាយគោលនយោបាយភូមិឃុំមានសុវត្ថិភាព និងបន្តការធ្វើអត្តសញ្ញាណប័ណ្ណជូនពលរដ្ឋ ៕
