ខេត្តកំពង់ឆ្នាំង៖ គ្រូបង្រៀនវិទ្យាល័យព្រះបាទសុរាម្រឹត ម្នាក់បានរងរបួសធ្ងន់ និងយុវជនម្នាក់ទៀតបានរងរបួសស្រាល ក្នុងករណីគ្រោះថ្នាក់ចរាចរណ៍ដែលមួយបានកើតឡើងនៅម៉ោង ១១ និង០០នាទី ព្រឹកថ្ងៃទី១៦ ខែវិច្ឆិកា ឆ្នាំ២០១៥ នៅលើផ្លូវជាតិលេខ៥ ចំណុចមុខវិទ្យាល័យ
ព្រះបាទសុរាម្រឹត ស្ថិតក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ខណៈដែលជនរងគ្រោះទាំង២នាក់ជិៈម៉ូតូ បុកពីក្រោយ។
សមត្ថកិច្ចនគរបាលក្រុងកំពង់ឆ្នាំង បានអោយដឹងថា៖ គ្រូបង្រៀនរងគ្រោះមាន ឈ្មោះ សុទ្ឋ ប៊ុនធឿន អាយុ៤៨ឆ្នាំ មានទីលំនៅ ភូមិកណ្តាល សង្កាត់កំពង់ឆ្នាំង ក្រុងកំពង់ឆ្នាំង ។ មុនពេលកើតហេតុគាត់បានជិៈម៉ូតូ ម៉ាកហុងដា សេ១២៥ ពាក់ស្លាកលេខ កំពង់ឆ្នាំង 1B. 5484 ក្នុងទិសដៅពីជើង ទៅត្បូង លុះមកដល់ចំណុចកើតហេតុ គាត់បានបត់ឆ្វេង ចូលសាលាវិទ្យាល័យ ក៏ស្រាប់តែត្រូវ យុវជន ឈ្មោះ សេង ប៊ុនដារ៉ា អាយុ២៦ឆ្នាំ មានទីលំនៅភូមិឡទឹកត្រី សង្កាត់កំពង់ឆ្នាំង ជិៈម៉ូតូហុងដា សេ១២៥ ពាក់ស្លាកលេខ ពោធិ៏សាត់ 1A.4435 បើកមកពីក្រោយបុកពេញទំហឹងតែម្តង បណ្តាលអោយ ដួលលើថ្នល់ជាតិ និងរងរបួសលោកគ្រូបង្រៀនធ្ងន់ ចំណែកអ្នកបុកពីក្រោយគ្រាន់តែរងរបួសស្រាល ។
ក្រោយពេលកើតហេតុ រថយន្តសង្គ្រោះរបស់ មន្ទីរពេទ្យបានដឹកជនរងគ្រោះទៅសង្គ្រោះនៅក្នុងមន្ទីរពេទ្យខេត្ត ។ ចំណែកម៉ូតូទាំង២គ្រឿង ត្រូវបានសមត្ថកិច្ចនគរបាលយកទៅរក្សាទុកនៅអធិការដ្ឋាននគរបាលក្រុង ដើម្បីកសាងសំណុំរឿងដោះស្រាយតាមនិតិវិធីច្បាប់៕
