រាជធានីភ្នំពេញ៖ រថយន្តដឹកកម្ទេចក្រណាត់គេចជង្ហុកស្រាប់តែក្រឡាប់ចាក់ចោលអស់ តែសំណាងល្អអ្នកបើករថយន្តនិងព្រូរមិនមានរងរបួសអ្វីគ្រាន់តែរងការភិតភ័យប៉ុណ្ណោះ។ ហេតុការខាងលើកើតឡើងកាលពីម៉ោង10និង20នាទីព្រឹកថ្ងៃទី07 ខែឧសភា ឆ្នាំ2014 ដែលស្ថិតនៅតាមបណ្តោយផ្លូវវ៉េងស្រេងភូមិដំណាក់ធំ3 សង្កាត់ស្ទឹងមានជ័យ ខណ្ឌមានជ័យ។
បើតាមសំដីសមត្ថកិច្ចដែលបានចុះដល់គោលដៅខាងលើបានប្រាប់ថា អ្នកបើករថយន្តមានឈ្មោះ ត្រេន តុល ភេទប្រុស អាយុ20ឆ្នាំស្នាក់នៅផ្ទះថៅកែនៅព្រែកព្នៅ ចំណែកព្រូររថយន្តឈ្មោះ ហ៊ី សាំ ភេទប្រុស អាយុ29ឆ្នាំ ទាំង2នាក់មានស្រុកកំណើត ភូមិឃុំងួង ស្រុកជើងព្រៃខេត្តកំពង់ចាម (មិនមានរងរបួសទេគ្រាន់រងការភិតភ័យ)។
បើតាមការរៀបរាប់របស់អ្នកបើករថយន្តបានប្រាប់ថា មុនកើតហេតុរូបគេទាំង2នាក់បានទៅដឹកកម្ទេចក្រណាត់ចេញពីឃ្លាំងនៅក្នុងសង្កាត់ទួលសង្កែ ខណ្ឌឫស្សីកែវគោលបំណងយកទៅឲ្យម៉ូយនៅក្រុងតាខ្មៅដោយបើកតាមផ្លូវវ៉េងស្រេងក្នុងទិសដៅពីកើតទៅ។
ទៅដល់ចំណុចខាងលើជាផ្លូវឈួសឆាយថ្មីបានគេចជង្ហុកក៍ជ្រុលផុងកង់ម្ខាងក្រឡាប់តែម្តង ប៉ុន្តែសំណាងល្អមិនមានរងរបួស។ ក្រោយកើតហេតុសមត្ថកិច្ចមូលដ្ឋានបានចុះទៅដល់កន្លែងកើតហេតុ ប៉ុន្តែដោយរថយន្តខាងលើពេលក្រឡាប់មិនមានប៉ះពាល់អ្នកដ៍ទៃ ដូចនេះគ្រាន់តែឲ្យខាងម្ចាស់រថយន្តរករថយន្តមកស្ទូចខ្លួនឯងទៅ៕
