ខេត្តសៀមរាប ៖ យុវជនម្នាក់ជិះម៉ូតូត្រូវឡានដឹកដីបុក ហើយកិនស្លាប់ភ្លាមៗនៅនឹងកន្លែងយ៉ាងអាណោចអាធ័មគួរឱ្យសង្វែក ខណៈជនរងគ្រោះជិះម៉ូតូធ្លាក់ជង្ហុកដួលលើផ្លូវក្នុងដំណើរច្រាសទិសគ្នា ពីត្បូងមកជើង រីឯអ្នកបើកឡានដឹកដី បើករត់ដែរ តែត្រូវសមត្ថកិច្ចដេញប្រ
ម៉ាញ់តាមក្របួចជាប់។ហេតុការណ៍គ្រោះថ្នាក់ចរាចរនេះ កើតឡើងកាលពីម៉ោង ២និង ៣០នាទី ថ្ងៃទី១៧ ខែវិច្ឆិការ ឆ្នាំ២០១៥លើដងផ្លូវគ្រួសក្រហមលេខ២៦៦ ស្ថិតក្នុងភូមិត្រពាំងភ្លោះ ឃុំពង្រលើ ស្រុកជីក្រែង ខេត្តសៀមរាប។
លោកវរសេនីយ៍ទោ តូច សាកល អធិការនគរបាលស្រុកជីក្រែង បានប្រាប់ នៅរសៀលថ្ងៃទី១៨ ខែវិច្ឆិការនេះថា មុនពេលកើតហេតុមានពលរដ្ឋបានរាយការណ៍មកសមត្ថកិច្ចនគរបាលស្រុកថា មានរថយន្តដឹកដីបុកម៉ូតូរហូតដល់ស្លាប់។លោកបន្តថា ភ្លាមៗនោះលោកបានដាក់កម្លាំងជំនាញឱ្យចុះទៅដល់កន្លែងកើតហេតុ រួចធ្វើការវាស់វែង។លោកបញ្ជាក់ថា ជនរងគ្រោះមានឈ្មោះ ចេង សំណាង ភេទប្រុស អាយុ៣០ឆ្នាំ ទីលំនៅ ភូមិអូរ ឃុំខ្វាយ ស្រុកជីក្រែង បើកបរម៉ូតូម៉ាកសេ១២៥ ស៊េរីឆ្នាំ២០១៥ ពណ៌ខ្មៅ ពាក់ស្លាកលេខសៀមរាប1T-4010 ក្នុងដំណើរពីត្បូងទៅជើង។ចំណែករថយន្តដឹកដីប្រភេទបែន ម៉ាកហ៊ីយ៉ាន់ដាយពណ៌លឿង ពាក់ស្លាកលេខAT153-0025 បើកបរដោយឈ្មោះតាន់ ផង ភេទប្រុស អាយុ៣៥ឆ្នាំ មានស្រុកកំណើតបឹងក្រាញ់ ឃុំស្វាយលួង ស្រុកកណ្តៀង ខេត្តពោធិ៍សាត់ បច្ចុប្បន្នស្នាក់នៅក្នុងក្រុមហ៊ុនរបស់ចិន ដែលកំពុងធ្វើផ្លូវទំនប់ម្កាក់ក្នុងស្រុកជីក្រែង។
លោកបញ្ជាក់បន្ថែមថា មុនដំបូង ជនរងគ្រោះបានជិះម៉ូតូពីទិសខាងត្បូងទៅជើង លុះដល់ចំណុចកើតហេតុម៉ូតូនោះ ក៏បានធ្លាក់ជង្ហុកដួល ហើយស្របពេលជាមួយគ្នានោះមានរថយន្តប្រភេទបែនដឹកដី បើកយ៉ាងលឿនក្នុងដំណើរបញ្ច្រាស់ទិសគ្នា ក៏បានបុកហើយកិនស្លាប់ភ្លាមៗនៅនឹងកន្លែងតែម្តង។បន្ទាប់ពីកើតហេតុតៃកុងឡានព្យាយាមបើករត់គេច បានប្រមាណជាង១០គីឡូម៉ែត្រ ទើបកម្លាំងរបស់លោកស្ទាក់ចាប់ជាប់នៅចំណុចប៉ុស្តិ៍នគរបាលឃុំខ្វាវ តែម្តង។បច្ចុប្បន្នសមត្ថកិច្ចនគរបាលបានប្រគល់សាកសពឱ្យទៅក្រុមគ្រួសារយកធ្វើបុណ្យតាមប្រពៃណី ។ចំណែកតៃកុងដែលបានឃាត់ខ្លួននោះ សមត្ថកិច្ចនគរបាលនៃអធិការស្រុកជីក្រែងរៀបចំសំណុំរឿងបញ្ជូនទៅកាន់ការិយាល័យនគរបាលចរាចរណ៍ខេត្ត ដើម្បីចាត់ការបន្ត រីឯគ្រួសារជនរងគ្រោះបានមកដាក់ពាក្យបណ្តឹងនៅអធិការនគរបាលស្រុក ដោយទាមទារប្រាក់ជម្ងឺចិត្តចំនួន៣៥០០ដុល្លារ និងសុំថ្លៃជួសជុលម៉ូតូ និងយកមកធ្វើបុណ្យតាមប្រពៃណី។
ចំណែករថយន្តបង្កនិងម៉ូតូជនរងគ្រោះ សមត្ថកិច្ចបានយកទៅរក្សាទុកនៅអធិការដ្ឋាននគរបាលស្រុកជីក្រែងរង់ចាំ ដោះស្រាយតាមផ្លូវច្បាប់៕
វេហាស៍
