ខេត្តសៀមរាប៖បង្គន់អនាម័យសាធារណៈ១កន្លែងមានកម្ពស់១ជាន់ចែកជាពីរផ្នែក ដែលផ្នែកខាងលើជាបណ្តាល័យផ្តល់ព័ត៌មាននិងផ្នែកខាងក្រោមជាបន្ទប់អនាម័យ ដែលមានបង្គន់បន្ទរបង់ចំនួន៩និងបង្គន់នោម៧ព្រមទាំងបំពាក់នូវឧបករណ៍អនាម័យមួយចំនួន ទៅតាមស្តង់ដារ
អន្តរជាតិដោយចែកជាបង្គន់ប្រុសស្រីដែលជាជំនួយរបស់សមាគមបង្គន់ពិភពលោក ដែលផ្តល់តាមរយៈការឧបត្ថម្ភរបស់ទីក្រុងស៊ូវ៉ុន នៃសាធារណរដ្ឋកូរ៉េដែលមានទីតាំងស្ថិតនៅក្នុង ភូមិត្រពាំងសេះ សង្កាត់គោកចក ក្រុង ខេត្តសៀមរាប ត្រូវបានសម្ពោធបើកឲ្យប្រើប្រាស់ជាផ្លូវការកាលពីរសៀល ថ្ងៃទី ១៧ ខែវិច្ឆិកា ឆ្នាំ២០១៥ ក្រោមអធិបតីភាពឯ.ឧ ឧក តារារិទ្ធិ អនុរដ្ឋលេខាធិការក្រសួងទេសចរណ៍ លោក យ៉ុម តែយ៉ុង អភិបាលក្រុងស៊ូវ៉ុន និង ជាប្រធានសមាគមបង្គន់ពិភពលោក និង លោក ស៊ិន រុន អភិបាលរង នៃ គណៈអភិបាលខេត្តសៀមរាប ដោយមានការចូលរួពីភ្ញៀវជាតិ អន្តរជាតិ និស្សិត គរុសិស្ស ប្រជាពលរដ្ឋផងដែរ ។
ក្នុងកិច្ចស្វគមន៍របស់លោកស៊ិនរុនបានបញ្ជាក់ថា ខេត្តសៀមរាបជាផ្ទះរបស់បេតិកភណ្ឌពិភពលោកដ៏រុងរឿង ដែលសម្បូរបែបទៅដោយសំណង់ប្រាសាទបុរាណ ដែលបានបន្សល់ទុកកាលពីសម័យចក្រប្រភពខ្មែរជាងមួយពាន់ឆ្នាំមុខរួមទាំងរមណីដ្ឋានធម្មជាតិ ហើយបានកំពុងក្លាយជាកម្លាំងចលករមួយក្នុងការទាក់ទាញភ្ញៀវទេសចរនៅលើពិភពលោក ចូលមកទស្សនាកម្សាន្ត ។ ដើម្បីធានាឲ្យបានពីកំណើននៃភ្ញៀវទេសចរណ៍នៅខេត្ត ប្រវត្តិសាស្ត្រមួយនេះ អាជ្ញាធរខេត្ត អាជ្ញាធរជាតិអប្សរា និងកម្លាំងសមត្ថកិច្ច រួមទាំងក្រសួងទេសចរណ៍ បានរួម សហការគ្នា ក្នុងការថែរក្សាការពារ សន្តិសុខ សណ្តាប់ធ្នាប់ ក្នុងការធានាឲ្យបាននិរន្តរភាពនៃកំណើនភ្ញៀវទេសចរ។ ឯកឧត្តមបានបញ្ជាក់ថា ដោយកត្តានេះហើយដើម្បីអនុវត្តទៅតាមយុទ្ធនាការ (ទីក្រុងស្អាត រមនីយដ្ឋានស្អាត និង សេវាល្អ )ខេត្តបានធ្វើការអភិវឌ្ឍន៍ហេដ្ឋារចនាសម្ព័ន្ធរូបវន្តនិងអរូបវន្តក្នុងគោលដៅរួមគ្នា ដើម្បីឲ្យទីក្រុងសៀមរាប ក្លាយជាក្រុងស្រស់ស្អាតនឹងមានបរិស្ថានល្អ។ ម្យ៉ាងទៀតការសម្ពោធដាក់ឲ្យប្រើប្រាស់បង្គន់អនាម័យសាធារណៈ នៅក្រុងសៀមរាប គឺមានសារៈសំខាន់បំផុតនៃក្រុងទេសចរណ៍លំដាប់ពិភពលោក ដើម្បីលើកកម្ពស់ទីក្រុងប្រវត្តិ សាស្ត្ររបស់យើងផងដែរ ។
មានប្រសាសន៍នោះដែរ លោក យ៉ុម តែយ៉ុង អភិបាលក្រុងស៊ូវ៉ុន បានលើកឡើងថា នេះជាលើកទី២ហើយបន្ទាប់ពីរាជធានីភ្នំពេញក្នុងការសម្ពោធដាក់ឲ្យប្រើប្រាស់ជាផ្លូវការ នូវបង្គន់អនាម័យសាធារណៈលើទឹកដីសៀមរាបអង្គរ ក្រោយពីការបើកសម្ពោធដាក់ឲ្យដំណើរការប្រើប្រាស់ហើយនឹងបង្គន់អនាម័យនេះនឹងត្រូវពិភពលោកទទួល ស្គាល់ ។តាមរយៈបង្គន់អនាម័យនេះក៏ជាវប្បធម៌ដ៏ត្រចះត្រចង់ ដែលត្រូវមនុស្សជាតិយើងគ្រប់រូបត្រូវគាំទ្រវប្បធម៌ របស់ខ្លួន ពីព្រោះថាយើងគ្រប់រូបត្រូវការចាំបាច់បំផុតទៅលើអនាម័យ និង បរិស្ថាននៅជុំវិញខ្លួន ។ ក្នុងនោះដែរ ឯកឧត្តមក៏មានសង្ឃឹមផងដែរថា ទៅពេលអនាគតនៅកម្ពុជា និង មានការរីកចម្រើនពីវប្បធម៌បង្គន់ តាមរយៈនៃការ បណ្តុះបណ្តាល ផ្សព្វផ្សាយ អប់រំជូនដល់ប្រជាពលរដ្ឋ បានយល់ច្បាស់ អំពីអត្ថប្រយោជន៍ អំពីអនាម័យបរិស្ថានហើយសមទ្ធិផលថ្មីមួយនេះក៏ជាចំណងដៃថ្មីរបស់ទីក្រុងស៊ូវ៉ុន ជូនដល់ប្រជាពលរដ្ឋខេត្តសៀមរាប ក្នុងការបម្រើដល់ វិស័យទេសចរណ៍ទៀតផង ។
មានប្រសាសន៍នោះដែរលោកឧកតារារិទ្ធិបានបញ្ជាក់អនាម័យល្អ គឺនាំមកនូវសុខភាពល្អដល់យើងគ្រប់គ្នា។ខេត្តសៀមរាបជាក្រុងមួយមានបរិស្ថានល្អ គឺតម្រូវឲ្យប្រជាពលរដ្ឋគ្រប់រូបបន្ទោបង់នៅនឹងបង្គន់ឲ្យបានត្រឹមត្រូវ បើមិនដូច្នោះទេវានឹងបង្កើតនូវបញ្ហាជាច្រើនដល់យើង ។ ដូច្នេះការផ្តល់ជូនបង្គន់សាធារណៈ ដែលជាជំនួយ របស់សមាគមបង្គន់ពិភពលោកក្រោមការជួយឧបត្ថម្ភថវិការបស់ទីក្រុងស៊ូវ៉ុននៃសាធារណរដ្ឋកូរ៉េ ដែលចំគោលដៅនិងបំណងប្រាថ្នាដែលយើងចង់បាន។ដើម្បីធ្វើឲ្វប្បធម៌បង្គន់នេះ កាន់តែឲ្យស៊ីជម្រៅដល់ប្រជាជន យើងជាយុវជន គ្រប់រូប ត្រូវធ្វើជាគំរូ ក្នុងការអប់រំ ផ្សព្វផ្សាយជាសាធារណៈ ក្នុងការរួមចំណែកកាត់បន្ថយនូវការបំពុលបរិស្ថានអនាម័យនៅកម្ពុជាក៏ដូចនៅខេត្តសៀមរាប ដែលជាជង្រុកប្រមូលផ្តុំនៃភ្ញៀវទេសចរទៀតផង ៕
