បន្ទាយមានជ័យ ៖ ប្តីប្រពន្ធចំណាស់២នាក់ត្រូវបានស្លាប់ភ្លាមៗហ្នឹងកន្លែង ក្នុងហេតុការណ៍គ្រោះថ្នាក់ចរាចរ រថយន្តក្រុងដឹងអ្នកដំណើរ KSO បើកបុកម៉ូតូ កាលពីថ្ងៃទី១៩ វិច្ឆិកា ២០១៥ នៅលើផ្លូវជាតិលេខ៥ ត្រង់ចំនុចមុខវត្តពោធិសូរិយារាម ក្នុងស្រុកអូជ្រៅ ខេត្តបន្ទាយមានជ័យ
តាមការអោយដឹងពីលោក ឆេងអ៊ី សុខា អធិការស្រុកអូរជ្រៅ បានអោយដឹងថា រថយន្តដែលបង្ករគ្រោះថ្នាក់ចរាចរខាងលើ ជារថយន្តក្រុងដឹកអ្នកដំណើររបស់ក្រុមហ៊ុន KSO ពាក់ស្លាក លេខភ្នំពេញ 3C 1175 បើកបរពីលិចទៅកើត លុះដល់ចំនុចកើតហេតុក៏ទៅបុកម៉ូតូមួយគ្រឿងម៉ាកហុងដាឌ្រីម សេរីឆ្នាំ ២០១៥ គ្មានស្លាកលេខ ក្នុងទិសដៅច្រាស បណ្តាលអោយអ្នកជិះម៉ូតូ ២នាក់ប្តីប្រពន្ធ មានឈ្មោះ ថៃ ចក់ ភេទ ប្រុស អាយុ ៦០ ឆ្នាំនិងប្រពន្ធឈ្មោះជុំ ង៉ា ភេទ ស្រី អាយុ ៥៨ ឆ្នាំអ្នកទាំង២មានទីលំនៅ ភូមិដំរីលើ ឃុំសឿ ស្រុកមង្គលបុរី ខេត្តបន្ទាយមានជ័យ ស្លាប់នៅនិងកន្លែង ចំណែកតៃកុងបានរត់គេចខ្លួនបាត់ស្រមោល ។
ហេតុការណ៍គ្រោះថ្នាក់ចរាចរនេះត្រូវបាលោក សួន នីប៉ូ នាយរងការិយាល័យចរាចជើងគោកនៃស្នងការនគរបាលខេត្តបន្ទាយមានជ័យ សន្និដ្ឋានថា បណ្តាលមកពីរថយន្តក្រុងក្រុមហ៊ុន KSO ឡើងជែងក្នុងស្ថានភាពគ្រោះថ្នាក់ លើផ្លូវសាធារណៈ ។
ក្រោយកើតហេតុ សពជនរងគ្រោះទាំង២នាក់ប្តីប្រពន្ធ ត្រូវបានកម្លាំងសមត្ថកិច្ចប៉ូលីសស្រុកអូរជ្រៅដឹកយកមកប្រគល់ជូនសាច់ញ្ញាត ដល់គេហដ្ឋានក្នុងភូមិដំរីលើ ឃុំសឿ ស្រុកមង្គលបុរី ខេត្តបន្ទាយមានជ័យ ចាត់ចែងធ្វើបុណ្យតាមប្រពៃណី ចំណែករថយន្តក្រុងបង្ករគ្រោះថ្នាក់ ត្រូវបានសមត្ថកិច្ចស្ទូចមករក្សាទុកនៅអធិការស្រុកអូរជ្រៅ៕
