ខេត្តសៀមរាប៖នាថ្ងៃទី១៩ខែវិច្ឆិកាឆ្នាំ២០១៥នេះនៅរដ្ឋបាលសាលាខេត្តសៀមរាប មានបើកកិច្ចប្រជុំស្តីពីស្ថានភាពក្រុមហ៊ុនសម្បទានដីសេដ្ឋកិច្ច ក្នុងខេត្តសៀមរាប ក្រោមអធិបតីភាពលោក ប៊ិន ឈិនឧបនាយករដ្ឋមន្ត្រីប្រធានអាជ្ញាធរជាតិដោះស្រាយទំនាស់ដីធ្លីនិងជាប្រធាន
គណៈកម្មការអន្តរក្រសួង ដើម្បីត្រួតពិនិត្យវាស់វែងនិងវាយតម្លៃសម្បទានដីសេដ្ឋកិច្ច។ កិច្ចប្រជុំនេះដោយមានការចូលរួមពីសំណាក់ឯកឧត្តមអភិបាលខេត្តប្រធានក្រុមប្រឹក្សាខេត្ត សមាជិកគណៈកម្មការអន្តរក្រសួង និងអស់លោកជា សមាជិកអនុគណៈកម្មការថ្នាក់មានថ្នាក់ដឹក នាំមន្ទីរ អង្គភាព និង អាជ្ញាធរស្រុកពាក់ព័ន្ធផងដែរ ។
តាមរបាយការណ៍ដែលលោក ឃឹម ប៊ុនសុង អភិបាលខេត្ត បានបញ្ជាក់ថា ខេត្តសៀមរាបមានផ្ទៃដីសរុប ១លាន៥៤ពាន់៤៤២ហិចតា ដែលមានក្រុមហ៊ុនសម្បទានដីសេដ្ឋកិច្ច មកវិនិយោគ ចំនួន ១៤ក្រុមហ៊ុន ស្ថិតនៅក្នុងភូមិសាស្ត្រ០៤ស្រុកគឺស្រុកវ៉ារិនបន្ទាយស្រីស្វាយលើនិងស្រុកជីក្រែង ហើយដីទាំងនោះស្ថិតក្រោមការគ្រប់គ្រងរបស់ក្រសួងបរិស្ថាន និង កសិកម្មរុក្ខាប្រមាញ់ និង នេសាទ ។ ឯកឧត្តមបានបន្តថា យោងតាមកិច្ចប្រជុំ ក្នុងការចុះពិនិត្យស្ថានភាព ក្រុមហ៊ុនសម្បទានដីសេដ្ឋកិច្ច ក្រោមការណែនាំរបស់ឯកឧត្តមឧបនាយករដ្ឋមន្ត្រី ប៊ុន ឈិន ដោយឈរលើចំណុចសំខាន់ទាំងនោះជាមូលដ្ឋាន ខេត្តបានចុះពិនិត្យប្រជុំវាយតម្លៃទៅលើរបាយការណ៍របស់គណៈកម្មការអន្តរក្រសួង ដែលបានសម្រេចលុបគម្រោងវិនិយោគក្រុមហ៊ុនដែលមិនបានអនុវត្តទៅតាមកិច្ចសន្យានៃការវិនិយោគ ចំនួន០៤ក្រុមហ៊ុនក្នុងនោះក្រុមហ៊ុនប៊ីវីប៊ី,ក្រុមហ៊ុនលីយ៉េរ៉ាប់ប៊ើក្រុមហ៊ុនបានយ៉ាគ្រុបនិង មួយក្រុមហ៊ុនទៀតមិនទាន់មានសេចក្តីសម្រេចពីរាជរដ្ឋាភិបាល។ក្នុងនោះដែរអនុគណៈកម្មការថ្នាក់ខេត្ត បានបន្តផែនការចុះពិនិត្យទៅលើក្រុមហ៊ុនចំនួន៤ទៀត រួមមាន ក្រុមហ៊ុន បៀនហៀកអ៊ិនវេសមេន ,ក្រុមហ៊ុន ស៊ី អរ ស៊ី ខេ២ , ក្រុមហ៊ុនសំរោងរ៉ាប់ប៊ើ និង ក្រុមហ៊ុន អ៊ីចស៊ែល ខាសធើរ ដែលវិនិយោគដំណាំកៅស៊ូ ។
ក្រោយពីក្តាប់បាននូវរបាយការណ៍របស់អនុគណៈកម្មការថ្នាក់ខេត្ត និង សេចក្តីរាយការណ៍ផ្ទាល់របស់ មន្ទីរ អង្គភាព និង អាជ្ញាធរស្រុករួចមក មានប្រសាសន៍នោះដែរលោក ឧបនាយករដ្ឋមន្ត្រី ប៊ិន ឈិន ក៏បាន សង្កត់ធ្ងន់ចំពោះបណ្តាក្រុមហ៊ុនក្នុងការសិក្សារុករករ៉ែ នៅក្នុងភូមិសាស្ត្រមួយចំនួនក្នុងខេត្តសៀមរាប ដែលបានធ្វើ ឲ្យមានផលប៉ះពាល់ផលប្រយោជន៍របស់ប្រជាពលរដ្ឋតំបន់នោះ គឺត្រូវមានការប៉ះប៉ូវជូនដល់ប្រជាពលរដ្ឋទាំងនោះ ។ ម្យ៉ាងទៀតគ្រប់បណ្តាមន្ទីរ អង្គភាពពាក់ព័ន្ធទាំងអស់ ត្រូវរួមសហការគ្នា ក្នុងការចុះត្រួតពិនិត្យ និង គ្រប់គ្រង់ទីតាំងទាំងនោះឲ្យបាន ព្រមទាំងត្រូវកំណត់ពេលវេលាក្នុងការសិក្សា រុករករ៉ែ ដើម្បីកុំឲ្យបងប្អូនប្រជាពលរដ្ឋ មានការព្រួយបារម្ភបាត់ដីអាស្រ័យផលរបស់ពួកគាត់ ដែលធ្វើឲ្យមានការថ្នាំងថ្នាក់ដល់រាជរដ្ឋាភិបាល ។ ចំពោះ បណ្តាក្រុមហ៊ុនសម្បទានដីសេដ្ឋកិច្ចណាដែលមិនបានអនុញ្ញាតឲ្យក្រុមគណៈកម្មការចូលទៅត្រួតពិនិត្យនោះ ត្រូវ កំណត់ឲ្យបានច្បាប់ ដើម្បីគណៈកម្មការថ្នាក់ជាតិមានវិធានការចំពោះក្រុមហ៊ុននោះ ។ លោកប៊ិន ឈិន ក៏បានលើកផងដែរ រាល់ដីសម្បទានដែលរាជរដ្ឋាភិបាលបានលុបហើយនោះ គឺត្រូវគ្រប់គ្រងដោយក្រសួងបរិស្ថាន និង អាជ្ញាធរខេត្តរួមទាំងរដ្ឋបាលព្រៃឈើផងដែរ។ចំពោះការផ្តល់នូវប័ណ្ណកម្មសិទ្ធិ យើងមិនអនុញ្ញាតឲ្យជនណាដែលបានចូលមកកាន់កាប់ដីក្រោយបទបញ្ជាលេខ០១បបរបស់រាជរដ្ឋាភិបាល ព្រមទាំងត្រូវត្រួតពិនិត្យពីសាវតាឲ្យច្បាស់លាស់អ្នកដែលចូលមកកាន់កាប់ហើយដីដែលនៅសល់ទាំងនោះ អាជ្ញាធរខេត្តជាអ្នកគ្រប់គ្រងទទួលខុសត្រូវ។ក្នុងនោះដែរឯកឧត្តមឧបនាយករដ្ឋមន្ត្រី ក៏បានលើកឡើងនូវគោលការណ៍មួយចំនួនដើម្បីជាទុនសម្រាប់គណៈកម្មកាថ្នាក់ខេត្ត កំណត់ពីផលប៉ះពាល់មួយចំនួនរបស់ក្រុមហ៊ុនសម្បទានដីសេដ្ឋកិច្ច ទៅលើផល ប្រយោជន៍របស់ប្រជាពលរដ្ឋ និង សម្បត្តិធម្មជាតិនៅក្នុងតំបន់នោះនិងកំណត់ឲ្យបានត្រឹមត្រូវ អំពីទំហំផ្ទៃដីដាំដុះរបស់ក្រុមហ៊ុនទៅលើផ្ទៃដីសម្បទានដីសេដ្ឋកិច្ចឲ្យបានច្បាស់លាស់ ហើយនៅពេលខាងមុខនេះគណៈកម្មការ ថ្នាក់ជាតិ នឹងចុះទៅត្រួតពិនិត្យតាមក្រុមហ៊ុនទាំងនោះផងដែរ ៕
