រាជធានីភ្នំពេញ ៖ ក្រុមអ្នកជំនាញខ្មែរ និងបារាំងបានសន្និដ្ឋានថា បុរសជនជាតិបារាំងលោក Laurent Vallier និងកូនទាំង៤នាក់ ដែលស្លាប់ក្នុងទឹកត្រពាំងក្រោយផ្ទះដោយការពន្លិចរថយន្តកាលពីឆ្នាំ២០១១ គឺជាអំពើឃាតកម្មនិងមិនមែនជាអំពើអត្តឃាតទេ ។
នេះបើតាមការអះអាងរបស់ចៅក្រមសើុបអង្កេតខេត្តកំពង់ស្ពឺ បានឱ្យដឹងកាលពីថ្ងៃទី៦ ឧសភា នេះ ។ សំណុំរឿងនៃការស្លាប់ដ៏អាថ៌កំបាំងរបស់បុរសជនជាតិបារាំង និងកូន៤នាក់ ក្នុងខេត្តកំពង់ស្ពឺ កាលពីចុងឆ្នាំ២០១១ មានពន្លឺថ្មី បន្ទាប់ពីការរកឃើញថាជាការស្លាប់ដោយឃាតកម្ម ។
លោក ឈឹម រិទ្ធី ចៅក្រមសើុបអង្កេត តុលាការខេត្តកំពង់ស្ពឺ ត្រូវបានទីភ្នាក់ងារសារព័ត៌មានបារាំងAFPស្រង់សម្ដីនៅថ្ងៃអង្គារ ហើយវិទ្យុបារាំងRFI ក៏បានផ្សាយដែរថា នោះគឺជាអំពើឃាតកម្មយ៉ាងពិតប្រាកដ ។ តាមវិទ្យុដដែលបានផ្សាយថា បើតាមលោកចៅក្រមថា ការធ្វើកោសល្យវិច័យដែលមានការចូលរួមពីក្រុមអ្នកជំនាញបារាំងបានបង្ហាញថាលោក Laurent Vallier និងកូន4នាក់បានស្លាប់នៅមុនពេលដែលគេយកទៅដាក់ក្នុងរថយន្ត ហើយរុញទម្លាក់ចូលក្នុងទឹកស្រះ ។ មានតែកូនពៅរបស់គាត់ម្នាក់បុ៉ណ្ណោះដែលស្លាប់ក្រោយពេលទម្លាក់ចូលក្នុងទឹក ។
ហេតុផលនេះហើយបណ្តាលឱ្យក្រុមអ្នកសើុបអង្កេតសន្និដ្ឋានថា ជាអំពើឃាតកម្ម ។ ករណីនេះមានការសន្និដ្ឋានពីដំបូងថា បុរសជនជាតិបារាំងអាចធ្វើអត្តឃាតជាមួយកូនទាំង៤នាក់ បុ៉ន្តែក្រុមអ្នកជំនាញការបារាំងដែលបានបញ្ជូនមកដល់កម្ពុជា កាលពីដើមឆ្នាំ២០១៣ ដើម្បីបើកការសើុបអង្កេតលើករណីអាថ៌កំបាំងទាំងឡាយនេះ ហើយលទ្ធផលចុងក្រោយបង្ហាញថា ការស្លាប់របស់បុរសជនជាតិបារាំង និងកូនទាំង៤នាក់ គឺជាអំពើឃាតកម្ម ។
លោកចៅក្រម ឈឹម រិទ្ធី អះអាងថា លោក Vallier ធ្លាប់មានជម្លោះជាមួយគ្រួសារខាងប្រពន្ធដោយសារបញ្ហាដីធ្លី ។ ប្អូនថ្លៃរបស់លោកវ៉ាលីយេ ម្នាក់ធ្លាប់ត្រូវបានតុលាការសាកសួរកាលពីឆ្នាំទៅ ។ យ៉ាងណាក៏ដោយ នៅមិនទាន់មានជនសង្ស័យណាម្នាក់ត្រូវបានចាប់ខ្លួននៅឡើយទេ ហើយការសើុបអង្កេតកំពុងតែបន្តដើម្បីឈានទៅចាប់ខ្លួនជនដៃដល់ ។ តុលាការខេត្តកំពង់ស្ពឺបើកសវនាការលើករណីស្លាប់គ្រួសារលោក Laurrent Vallier ការសើុបអង្កេតរយៈពេលមួយឆ្នាំទៅលើករណីនៃការស្លាប់ដ៏អាថ៌កំបាំងរបស់បុរសជនជាតិបារាំងម្នាក់ និងកូនបួននាក់នៅខេត្តកំពង់ស្ពឺ នោះ តុលាការបានចេញដីកាកោះហៅឪពុកម្តាយលោក Vallier ព្រមទាំងសាក្សីមួយចំនួនទៀតឱ្យចូលខ្លួនមកបំភ្លឺនៅថ្ងៃទី២៤ មករា ២០១៣ ដើម្បីឆ្លើយតបទៅនឹងស្ថានទូតបារាំងដែលបានជំរុញឱ្យមានការសើុបអង្កេតជាលក្ខណៈអន្តរជាតិ ។
លោក ឈឹម រិទ្ធី ចៅក្រមស៊ើបអង្កេតខេត្តកំពង់ស្ពឺ បានថ្លែងពេលនោះឱ្យដឹងថា លោកនឹងចេញដីកាកោះហៅឪពុកក្មេក និងម្តាយក្មេកជនជាតិបារាំងលោក ឡូរ៉ង់ វ៉ាលីយ៉េ ព្រមទាំងមេឃុំ និងសាក្សីនៅក្នុងខេត្តព្រៃវែង ដើម្បីធ្វើការសាកសួរជាថ្មី ។ លោកថា ករណីនេះត្រូវស៊ើបអង្កេតឱ្យហ្មត់ចត់ និងច្បាស់លាស់ ពីព្រោះខាងអាជ្ញាធរបារាំងនៅពុំទាន់អស់ចិត្តនៅឡើយ ។ ចៅក្រមរូបនេះបានថ្លែងថា ស្ថានទូតបារាំងបានជំរុញឱ្យមានការស៊ើបអង្កេតជាលក្ខណៈអន្តរជាតិ ដើម្បីរកយុត្តិធម៌ដល់ជនជាតិបារាំងដែលបានស្លាប់នៅក្នុងខេត្តកំពង់ស្ពឺ ។
ហើយអាជ្ញាធរបារាំងដែលមានដូចជាចៅក្រមស៊ើបអង្កេត មន្ដ្រីក្រសួងការបរទេស និងចូលរួមសហការជាមួយអាជ្ញាធរកម្ពុជា ហើយរំពឹងថា ពួកគេនឹងមកដល់កម្ពុជានៅចុងខែមករានេះ ឬដើមខែកុម្ភៈ ។ ខាងលើនេះជាដំណើររឿងសើុបអង្កេតកាលពីដើមឆ្នាំ២០១៣កន្លងទៅ ។ លោកថា កាលពីថ្ងៃពុធកន្លងទៅ លោកក៏បានធ្វើការសាកសួរឪពុកក្មេក និងម្ដាយក្មេករបស់លោក ឡូរ៉ង់ វ៉ាលីយ៉េ ម្ដងរួចហើយ ទាក់ទិននឹងពួកគាត់ដែលបានដាក់ពាក្យសុំប័ណ្ណកម្មសិទ្ធិលើទ្រព្យសម្បត្ដិពីរកន្លែងរបស់ Laurent Vallier ។
លោកទិត ឈួន ជាឪពុកក្មេកលោកLaurent Vallier ដែលដកស្រង់សម្ដីដោយវិទ្យុបារាំងអន្ដរជាតិ RFI បានថ្លែងឱ្យដឹងថា កាលពីថ្ងៃពុធកន្លងទៅ លោកនិងគ្រួសារត្រូវបានតុលាការកោះហៅមកសាកសួរនៅពេលដែលលោកទាមទារធ្វើប័ណ្ណកម្មសិទ្ធិនៅលើដីកូនរបស់គាត់ ។ ឆ្លើយទៅនឹងការចោទប្រកាន់នោះលោក ទិត ឈួន បានលើកឡើងថា លោកមិនអាចទទួលយកបានទេចំពោះការចោទប្រកាន់បែបនោះ ។
លោកក៏មានការងឿងឆ្ងល់ថា តើបណ្ដាលមកពីមូលហេតុអ្វីបានជាលោកមិនអាចទាមទារកម្មសិទ្ធិលើដីដែលជារបស់កូនស្រីលោកបាន ។ គួរកត់សម្គាល់ថា សពរបស់លោក ឡូរ៉ង់ វ៉ាលីយ៉េ និងកូនតូច៤នាក់ ត្រូវបានទាញចេញពីរថយន្ដដែលលិចក្នុងស្រះទឹកនៅខាងក្រោយផ្ទះរបស់លោក នៅក្នុងខេត្ដកំពង់ស្ពឺ កាលពីខែមករា ឆ្នាំ២០១២ បន្ទាប់ ពីគ្រួសារនេះបានបាត់ខ្លួនយ៉ាងអាថ៌កំបាំង ។
ការស៊ើបអង្កេតបឋមបានបង្ហាញថា លោក វ៉ាលីយ៉េ បានធ្វើអត្ដឃាត និងមនុស្សឃាត ។ លោក ឡូរ៉ង់ វ៉ាលីយ៉េ មានអាយុ ៤២ឆ្នាំ មានភរិយាជាជនជាតិខ្មែរ និងមានកូន៤នាក់ បានបាត់ខ្លួនយ៉ាងអាថ៌កំបាំង កាលពីចុងឆ្នាំ២០១១ ក្រោយពីភរិយារបស់លោកស្លាប់ ៕
