(ព្រៃវែង)៖ប្រធានផ្សារករអណ្តើកអត់មានកន្លែងទុកដាក់កាកសំណល់សំរាម យកចិញ្ចើមផ្លូវជាតិចាក់គរសំរាម ធ្វើអោយប៉ះពាល់សណ្តាប់ធ្នាប់សាធារណៈ មិនតែប៉ុណ្ណោះ ជះក្លិនស្អុយ ឆ្អេះឆ្អាបដល់ប្រជាពលរដ្ឋ និងអ្នកធ្វើដំណើរ និងបំពុលបរិស្ថានយ៉ាងធ្ងន់ធ្ងរ ដោយឡែក
អាជ្ញាធរស្រុកកំពង់ត្របែក និងមន្ត្រីបរិស្ថានមិនខ្ចីយកភ្នែកមើលនោះទេ។
ភាពចន្លោះប្រហោងរបស់អាជ្ញាធរដែនដី និងមន្ត្រីបរិស្ថានបែបនេះ ធ្វើអោយប្រជាពលរដ្ឋរិះគន់យ៉ាងខ្លាំងថា គ្មានការទទួលខុសត្រូវ មិនដែលរវីរវល់ទៅនឹងអ្វីដែលជាភាពអសកម្ម និងផលប៉ះពាល់នៅក្នុងមូលដ្ឋាន ជាក់ស្តែងដូចជា គំនរសំរាមនេះតែម្តង ចាក់គរចោលជាប់ចិញ្ចើមផ្លូវជាតិ រាប់ឆ្នាំមកហើយ មិនដែលឃើញអាជ្ញាធរស្រុកកំពង់ត្របែក យកភ្នែកមើល រឺក៏រកកន្លែងទុកដាក់កាកសំណល់សំរាម អោយបានត្រឹមត្រូវកុំអោយមានការចាក់ពាសវាលពាសកាលបែបនេះ ។
តាមពិត ចំពោះការវិនិយោគផ្សារ អាជ្ញាធរដែនដីតម្រូវអោយប្រធានផ្សាររកកន្លែង ទីតាំងសំរាប់យកកាកសំណល់សំរាមចាក់គរអោយបានត្រឹមត្រូវ ហើយនៅអោយឆ្ងាយពីផ្ទះប្រជាពលរដ្ឋ កុំអោយប៉ះពាល់ក្លិនស្អុយប៉ះពាល់ដល់សុខភាពរបស់ពួកគាត់ ។ ចុះមូលហេតុអ្វីបានជាប្រធានផ្សារមួយនេះ អត់មានកន្លែងទុកដាក់សំរាមបែជាយកចិញ្ចើមផ្លូវជាតិចាក់គរចោលយ៉ាងអនាធិបតេយ្យរាប់ឆ្នាំមកហើយ ដោយឥតអៀនខ្មាស់ ហើយថែមទាំងបំពុលបរិស្ថានយ៉ាងធ្ងន់ធ្ងរទៀតផង ។ ចំនែកអាជ្ញាធរស្រុកកំពង់ត្របែកគ្មានចាប់អារម្មណ៍លើបញ្ហានេះ រឺមួយគំនរសំរាម គឺជាសួនច្បារលំអរភ្ញៀវទេសចរណ៍ ៕
