ខេត្តសៀមរាប៖បន្ទាប់ពីរាជពិធីបុណ្យអុំទូកបណ្តែតប្រទីប និងសំពះព្រះខែអកអំបុកនៅតាមបណ្តោយដងស្ទឹងសៀមរាបក្នុងរយះពីរថ្ងៃបានបញ្ចប់រួចមកយុទ្ធនាការសម្អាតអនាម័យបរិស្ថាននៅតាមដងស្ទឹងក្រុងសៀមរាបប្រវត្តិសាស្ត្រប្រកបទៅដោយសោភណ្ឌភាពស្រស់ស្អា
ត់គ្របដណ្តប់ទៅដោយពណ៌បៃតងនិងជាគោលដៅដ៏សំខាន់នៃភ្ញៀវទេសចរណ៍លើពិភពលោកក្នុងការថែរក្សាបាននូវផ្ការំដួល៣ទង ក៏ដូចជាកេរ្តិ៍ឈ្មោះល្បីល្បញលើពិភពលោក ។ ម្យ៉ាងទៀតក៏ជាការបញ្ជ្រាបនូវ ការយល់ដឹង អំពីអនាម័យបរិស្ថាន ដល់ប្រជាពលរដ្ឋក្នុងការបង្កើនកិច្ចសហការរវាងរាជរដ្ឋាភិបាលនិងវិស័យឯកជន អង្គការសង្គមស៊ីវិលលើការងារបរិស្ថានបានធ្វើការអនាម័យនេះទ្បើងវិញបន្ទាប់ពីបុណ្យអុំទូកបណ្តែតប្រទីប សំពះព្រះខែ និង អកអំបុកបានបញ្ចប់វិញហើយនោះ។ ការបើកយុទ្ធនាការសម្អាតអនាម័យ បរិស្ថាន ក្រុងនេះ បានប្រព្រឹត្តទៅក្រោមវត្តមានរបស់លោកពៅពិសិដ្ឋភិបាលរងខេត្តនិងលោកសូប្លាតុងអភិបាលក្រុងសៀមរាប នៅតាមបណ្តោយដងស្ទឹងសៀមរាបកាលពីព្រឹកថ្ងៃទី២៦ខែវិច្ឆិកាឆ្នាំ២០១៥។ដោយមានការអញ្ជើញចូលរួមពីសំណាក់អស់លោកលោកស្រីជាថ្នាក់ដឹកនាំមន្ទីរអង្គភាពមន្ត្រីរាជការ កងកម្លាំងប្រដាប់អាវុធអង្គការសង្គមស៊ីវិលវិស័យឯកជនគរុសិស្សនិស្សិតសិស្សានុសិស្សនិង ប្រជាពលរដ្ឋប្រមាណជាង៥០០នាក់ចូលរួម ។
មានប្រសាសន៍នោះដែរលោកពៅពិសិដ្ឋអភិបាលរងខេត្តក៏បានធ្វើការកោតសរសើរចំពោះស្មារតីយកចិត្តទុកដាក់ក្នុងការចូលរួមសម្អាតទីក្រុងបុរាណប្រវត្តិសាស្ត្របន្ទាប់ពីពិធីបុណ្យអុំទូកអស់ពេលពីរថ្ងៃបានបញ្ចប់ទៅវិញ ។
ក្នុងគោលបំណងជម្រុញឲ្យក្រុងសៀមរាប ក្លាយជាទីក្រុងដែលមានសោភ័ណភាព និង បរិស្ថានស្រស់ស្អាត សក្តិសមជាទីក្រុងទេសចរណ៍ដ៏ល្អឯកផ្អែកលើវប្បធម៌ធម្មជាតិប្រវត្តិសាស្ត្រដ៏យូរលង់និងល្បីល្បាញ។ លោកក៏បានបន្តទៀតថា យុទ្ធនាការអនាម័យបរិស្ថាននាព្រឹកនេះគឺដើម្បីធ្វើឲ្យបរិស្ថានក្នុងក្រុងសៀមរាបបន្ទាប់ពីពិធីបុណ្យអុំទូកបានបញ្ចប់វិញ មានភាពស្រស់ស្អាត គ្មាន សម្រាម និង ថង់ផ្លាស្ទិកនៅតាមដងផ្លូវ និងតាមទីកន្លែងសាធារណៈផ្សេងៗ។ សំខាន់ចំពោះបង ប្អូនធ្វើដំណើរតាមយានយន្តគ្រប់ប្រភេទ នៅតាមដងផ្លូវសាធារណៈ កាន់តែបានយល់ដឹងច្បាស់ និងរួមសហការគ្នាដើម្បីថែរក្សាបរិស្ថានអនាម័យឲ្យបានល្អដោយរក្សាទុកដាក់កាកសំណល់ផ្សេងៗឲ្យមានរបៀបរៀបរយនិងសណ្តាប់ធ្នាប់ល្អសំដៅឲ្យសោភ័ណភាពក្រុងកាន់តែល្អប្រសើរជាលំដាប់ដើម្បីទាក់ទាញភ្ញៀវទេសចរជាតិអន្តរជាតិចូលមកទស្សនាបានជាប់ចិត្តដិតក្នុងអារម្មណ៍ជាមួយនឹងរមណីយដ្ឋានទេសចរណ៍ប្រវត្តិសាស្ត្រដ៏ល្បីល្បាញ ដ៏មហាអស្ចារ្យប្រកបដោយបរិស្ថាន អនាម័យមានផាសុខភាព ដ៏ល្អប្រសើររបស់យើង។លោក ក៏បាន លើកឡើងថា ខេត្តសៀមរាបជាអតីតរាជធានីអាណាចក្រខ្មែរដ៏ខ្លាំងក្លាមួយ និងជាទីក្រុងល្អឯកផ្នែកវប្បធម៌ប្រវត្តិសាស្ត្រមួយនៅអាស៊ីអាគ្នេយ៌ដែលជាកេរ្តិ៍មរតកដ៏សម្បូរបែបជាច្រើនត្រូវបានបន្សល់ទុកឲ្យយើងទើបធ្វើឲ្យខេត្ត សៀមរាបក្លាយជាតំបន់គោលដៅទេសចរណ៍វប្បធម៌ដ៏សំខាន់មួយរបស់ប្រទេសនិង ពិភពលោកដែលបាននឹងកំពុងទាក់ទាញភ្ញៀវទេសចរប្រមាណជិត ៥ លាននាក់ ជារៀងរាល់ឆ្នាំឲ្យមកទស្សនាកម្សាន្ត ទោះបីមានអស្ថេរភាពខ្លះៗនៅក្នុងតំបន់ និងពិភពលោកក្តី។ ទាំងនេះជាមោទនភាពចំពោះវិស័យទេសចរណ៍របស់ខេត្ត ដែលមានសន្ទុះកើនឡើង គួរឲ្យកត់សម្គាល់ដោយអាចប៉ាន់ប្រមាណថា នៅឆ្នាំ ២០២០ ភ្ញៀវអាចកើនឡើងដល់ ៨ លាននាក់។លោកបានបន្តទៀតថាវិស័យទេសចរណ៍នេះគឺជាកម្លាំងចលករជម្រុញដល់ការរីកចម្រើន ផ្នែកហេដ្ឋារចនាសម្ព័ន្ធរូបវ័ន្តជាច្រើនព្រមទាំងជម្រុញការធ្វើវិនិយោគនិងគ្រប់គ្រងដោយហ្មតចត់ផងដែរ។ ការរួមគ្នាបង្កើតយុទ្ធនាការអនាម័យបរិស្ថានដើម្បីចូលរួមអបអរសាទរទិវាជាតិទីក្រុងស្អាតឆ្នាំ២០១៥ ដើម្បីបុព្វហេតុបរិស្ថានទីក្រុងសៀមរាបរបស់យើងក្នុងការជួយលើកកម្ពស់បរិស្ថានអនាម័យក្រុងយើងឲ្យស័ក្តសម ជាទីក្រុងទេសចរណ៍ប្រវត្តិសាស្ត្រ។ដោយសារកិច្ចខិតខំប្រឹងប្រែងរួមគ្នាទាំងនេះចេញ ជាលទ្ធផលល្អគួរឲ្យមោទនៈសម្រាប់បរិស្ថានសង្គម ពីការចូលរួមសហការគ្នា ដើម្បីភាពស្អាត សោភ័ណភាព បរិស្ថានអនាម័យ និងសុខមាលភាពសម្រាប់គ្រប់ក្រុមគ្រួសារ និងសង្គមជាតិយើងជានិច្ចនិរន្តតទៅ។ ក្នុងន័យនេះ យើងទាំងអស់គ្នាដឹងថា នៅទីណាមានបរិស្ថានល្អ ទីនោះមានសុខភាពល្អ ព្រោះបរិស្ថាន និងជីវិតគឺតែមួយអ្វីៗ ដើម្បីបរិស្ថាន បរិស្ថាន គឺដើម្បីអ្វីៗទាំងអស់ ព្រមទាំងសំណូមពរដល់គ្រប់ម្ចាស់រថយន្តឈ្នូលទាំងអស់ ត្រូវយកចិត្តអប់រំ ណែនាំដល់អតិថិជនរបស់ខ្លួន ដែលបានធ្វើដំណើរតាមរថយន្តរបស់ខ្លួន ត្រូវទុកដាក់កាកសំណល់ឲ្យបានល្អ នៅលើរថយន្ត កុំឲ្យពួកគាត់បោះចោល នៅតាមដងផ្លូវសាធារណៈ ដែលធ្វើឲ្យប៉ះពាល់ដល់សោភណ្ឌភាពក្រុង សំខាន់នៅពេលពិធីបុណ្យអុំទូកខាងមុខនេះ ៕
