ខេត្តកំពង់ឆ្នាំង៖ មន្ត្រីក្រុមការងារក្រសួងធនធានទឹកនិងឧតុនិយម ដឹកនាំដោយ លោក លឹម វីរៈ អគ្គនាយករងកិច្ចការបច្ចេកទេស នៅរសៀលថ្ងៃទី២៧ ខែវិច្ឆិកា ឆ្នាំ២០១៥នេះ បានចុះត្រួតពិនិត្យ និងធ្វើការជួសជុលទំនប់បា រាំង ស្ថិតក្នុងសង្កាត់ផ្សារឆ្នាំង ក្រុងកំពង់ឆ្នាំង ដែល
បានរងការខូចខាតដោយទឹកហូរច្រោះ ដើម្បីសម្រួលដល់ការធ្វើដំណើរជូនប្រជាពលរដ្ឋ។នៅក្នុងពេលនោះក៏មានការចូលរួម ពីលោក ហៀង ម៉េង ប្រធាននាយកដ្ឋានវិស្វកកម្ម លោក សូ ផល្លី លោក សុខ តារា ប្រធានការិយាល័យវិស្វកកម្ម នៃក្រសួងធនធានទឹក និងឧតុនិយម លោក ដោក ប៊ុនថុន ប្រធានមន្ទីរធនធានទឹក និងឧតុនិយមខេត្តកំពង់ឆ្នាំងផងដែរ។
លោក ដោក ប៊ុនថុន ប្រធានមន្ទីរធនធានទឹក និងឧតុនិយមខេត្តកំពង់ឆ្នាំង បានអោយដឹងថា៖ នៅទ្វារទំនប់ទឹក ផ្នែកខាងកើតត្រូវទឹកហូរច្រោះដាច់ផ្លូវអស់ប្រវែងប្រមាណ ១៥ម៉ែត្រ នៅព្រឹកថ្ងៃទី២៧ ខែវិច្ឆិកា ឆ្នាំ២០១៥នេះ មន្ទីរធនធនទឹកខេត្តបានដឹកដីច្រកក្នុងការ៉ុងយកទៅទប់ទឹកដើម្បីសម្រួលដល់ការធ្វើចរាចរណ៍របស់ប្រជាពលរដ្ឋ និងការពារកុំអោយានរការហូរច្រោះដាច់ផ្លូវបន្ថែមទៀត ។
ដោយឡែកនៅរសៀលថ្ងៃដដែលនេះ ក្រុមការងាររបស់ក្រសួងធនធានទឹក ក្រោមបញ្ជាផ្ទាល់របស់ឯកឧត្តម លឹម គានហោ រដ្ឋមន្ត្រីក្រសួងធនធានទឹក បានចាត់តាំងអោយលោកលឹម វីរៈ អគ្គនាយករងកិច្ចការបច្ចេកទេស ក៏បានចុះមកត្រួតពិនិត្យដោយផ្ទាល់ និងអោយធ្វើការជូសជុលជាបន្ទាន់ ដោយទប់ការហូរទឹកច្រោះដាច់ផ្លូវនៅទំនប់លើនេះ ដើម្បីអោយជួសជុលផ្លូវនៅលើទំនប់នេះ ដែលប្រជាពលរដ្ឋបានធ្វើដំណើរឆ្លងកាត់រាល់ថ្ងៃធ្វើកាដំណើរបានស្រួលឡើងវិញ។
លោក សូ ផល្លី ជាប្រធានការិយាល័យវិស្វកម្ម នៅក្នុងក្រុមការងារក្រសួងធនធានទឹកបានអះអាងថា៖ ចាប់ពីរសៀលថ្ងៃនេះទៅ ក្រុមការងារនឹងធ្វើការដឹកដីគ្រួសក្រហមចាក់បំពេញកន្លែងដែលទឹកហូរច្រោះដាច់ គឺត្រូវធ្វើការជួសជុលជាបន្ទាន់ ហើយនៅថ្ងៃស្អែក ទី២៨ ខែវិច្ឆិកា ឆ្នាំ២០១៥នេះ នឹងអាចរួចរាល់ហើយ ដើម្បីសម្រួលចរាចរណ៍ជូនប្អូនប្រជាពលរដ្ឋក្នុងភូមិកណ្តាល សង្កាត់ផ្សារឆ្នាំងធ្វើដំណើរបានស្រួលបួលឡើងវិញតាមផ្លូវលើទំនប់បារាំងនេះ ៕
