សៀមរាបៈ បទល្មើសនេសាទបានកើតឡើងពេញផ្ទៃទឹក ដោយសារតែការប្រើប្រាស់បទល្មើសនេសាទដោយខុសច្បាប់ ដែលត្រូវបានគេសង្ស័យថា បណ្តាលមកពីមានការ បើកភ្លើងខៀវ ពីសមត្ថកិច្ចផ្នែករដ្ឋបាលជលផលដំដែក និងសង្កាត់រដ្ឋបាលជលផលកំពង់ឃ្លាំង ដោយពុំមានការអើពើរ និងទប់ស្កាត់បង្ក្រាបម្តងណាឡើយ ។
ទិដ្ឋភាពបទល្មើសនេសាទ ស្ថិតនៅក្នុងឃុំកំពង់ឃ្លាំង ស្រុកសូទ្រនិគមន៍ ខេត្តសៀមរាប បានកើតឡើងយ៉ាងពេញផ្ទៃទឹក ដោយមានភ្លើងភ្លឺរន្ទាលដូចជាទីក្រុងកណ្តាលទន្លេសាប មិនតែប៉ុណ្ណោះកាណូតតូចធំ មិនតិចពី៣០គ្រឿងបានដង្ហែរគ្នាក្នុងផ្ទៃបឹងទន្លេសាប ធ្វើសកម្មភាពរុញស៊ីប យ៉ាងព្រងើយ ដោយមិនខ្វល់ពីការខុសច្បាប់ម្តងណាឡើយ ដែលសកម្មភាពប្រព្រឹត្តបទល្មើសនេសាទនេះ ត្រូវបានប្រភពព័ត៌មាន បានបញ្ជាក់ថា ជនដែលធ្វើសកម្មភាព ប្រើប្រាស់ឧបករណ៍នេសាទខុសច្បាប់ បានបង់លុយជូនដល់សមត្ថកិច្ចជំនាញ ក្នុងឆ្នុក១បង់លុយ ៣លានរៀល ក្នុងមួយរដូវ ចំណែកការរុញស៊ីប បង់ក្នុងមួយគ្រឿង ៦លានរៀល ក្នុងមួយរដូវ ទើបបានពួកគេអាចនេសាទត្រីបានដោយមិនចាំបាច់ភ័យព្រួញ និងខ្លាចសមត្ថកិច្ចឯទៀតមកចាប់។
ពាក់ព័ន្ឋទៅនឹងការចោទប្រកាន់ថា សមត្ថកិច្ចផ្នែករដ្ឋបាលជលផល ដំដែក បានឃុបឃិតគ្នាជាមួយនិង ជនប្រព្រឹត្តបទល្មើសនេសាទខុសច្បាប់ មានមន្ត្រីផ្នែករដ្ឋបាលជលផលមួយរូប សុំមិនឲ្យបញ្ចេញឈ្មោះ បានអះអាងថា លោកទទួលស្គាល់ថា បទល្មើសដាក់ឆ្នុក មុនបុណ្យអុំទូកគឺមានពិតប្រាកដមែន លុះក្រោយពិធីបុណ្យប្រជាពលរដ្ឋមួយចំនួនធំ បាននាំសារឡើងមកវិញហើយ ដោយសារតែទឹកស្រកលឿន ចំនែកការរុញស៊ីប គឺកំពុងតែមានធ្វើសកម្មភាពដដែល ។
សូមបញ្ជាក់ថា ឧបករណ៍នេសាទខុសច្បាប់ទាំងនេះ គឺជាឧបករណ៍ដែលត្រូវបានហាមឃាត់ ពីសំណាក់ក្រសួងកសិកម្មរុក្ខាប្រម៉ាញ់ និងនេសាទ ដោយសារតែជាឧបករណ៍ ដាក់អំពូលភ្លើង បញ្ជោតសត្វល្អិតឲ្យចូលមកលេងភ្លើង លុះក្រោយមក សត្វល្អិតបានធ្លាក់ចូលទឹក ត្រូវបានត្រីតូច ធំ ចាប់តាំងពីទំហំកន្លះហ៊ុន រហូតដល់ត្រីធំ ត្រូវបានជាប់នៅ ក្នុងឧបករណ៍ឆ្នុក ដែលមានលក្ខណៈជាចងមុងផ្ងាជើង ចំណែកការរុញស៊ីប គឺជាការប្រើប្រាស់សំណាញ់កន្រងវែងបណ្តោយទូក ចងឈើជាចំពាមលើក្បាលទូកហើយរុញ ឧបករណ៍ទាំងនេះមានភាពអន្តរាយដល់មឆ្ឆាជាតិយ៉ាងធ្ងន់ធ្ងរ តែបែជាលោក ព្រិន សាវិន នាយខណ្ទរដ្ឋបាលជលផលសៀមរាប មិនខ្ចីធ្វើជាដឹងជាលឺនោះទេ ថែមទាំងបណ្តែត បណ្តោយឲ្យមានការ នេសាទខួបប្រាំងខួបវស្សា។
ប្រជាពលរដ្ឋដែលបានឃើញហេតុការសកម្មភាព នេសាទរបស់ជនជាតិវៀតណាម និងឈ្មួញមួយចំនួន ដែលបាននិង កំពុងតែឃុបឃិតគ្នាបំផ្លាញមឆ្ឆាជាតិ មានការព្រួយបារម្ភណ៍ និងបានសុំឲ្យអ្នកសារព័ត៌មាន ធ្វើការចុះផ្សាយដើម្បីឲ្យ ថា្នក់ដឹកនាំ ក្រសួងកសិកម្ម បានដឹងខ្លះ ដើម្បីមានវិធានការទប់ស្កាត់ បើមិនដូច្នេះទេ មឆ្ឆាជាតិនិងត្រូវរលាយហិនហោចមិនខានឡើយ 
។ ដោយ ប៊ុន រដ្ឋា
