រាជធានីភ្នំពេញៈ ផ្លូវចោមចៅឬផ្លូវវេង ស្រេង បានចាប់ផ្តើមយក លុយពីរថយន្តគ្រប់ ប្រភេទដែលបានឆ្លងកាត់ចាប់ពីថ្ងៃទី០១ធ្នូ២០១៥នេះតទៅ បន្ទាប់ពីផ្លូវនេះទើបបានជួសជុលចាក់បេតុងរួច ដោយក្រុមហ៊ុនភ្នំពេញថូវេ ដែលបានការអនុញ្ញាត និងទទួលសិទ្ធិវិនិយោគ តាមរូប
ភាព (B.O.T)ពីរាជរដ្ឋាភិបាល ។នៅពេលក្រុមហ៊ុនខាងលើនេះ បានចាប់ផ្តើមយកលុយភ្លាម ព្រឹកព្រលឹមអុល ថ្ងៃទី០១ធ្នូ២០១៥ យានយន្តគ្រប់ប្រភេទបានកកស្ទះណែនណាន់តាន់តាប់ ចាប់ពីស្តុបលូ៥ រហូតដល់បញ្ឈរបង់ប្រាក់ ហើយអ្វីដែលបង្កឱ្យមានការកកស្ទះនោះ គឺការអនុវត្តតម្រូវឱ្យរថយន្តទេសចរណ៍តូច(រថយន្តគ្រួសារ) ត្រូវបង់លុយឆ្លងកាត់ក្នុងតម្លៃ១១០០រៀល ដែលធ្វើឱ្យមានការភ្ញាក់ផ្អើលជាខ្លាំង ព្រោះកន្លងមកបញ្ឈរបង់ប្រាក់នេះ យកលុយតែរថយន្តធំៗ និងរថយន្តដឹកជញ្ជូនធ្វើអាជីវកម្មតែប៉ុណ្ណោះ ។យោងតាមសេចក្តីជូនដំណឹងរបស់សាលារាជធានីភ្នំពេញចុះថ្ងៃទី១៨វិច្ឆិកា២០១៥បានឲ្យដឹងថា ក្នុងគោលបំណងធ្វើឲ្យរាជធានីភ្នំពេញមានការប្រែប្រួលមុខមាត់ថ្មីទាំងសណ្តាប់ធ្នាប់ ចរាចរណ៏ របៀបរៀបរយសាធារណៈ សោភណ្ឌ័ភាពជាពិសេសដើម្បីកាត់បន្ថយការកកស្ទះចរាចរណ៏ដែលកើតមានឡើងស្ទើតែរាល់ថ្ងៃនៅក្នុងរាជធានីភ្នំពេញ រាជរដ្ឋាភិបាលបានឯកភាពជាគោលការណ៏ឲ្យសាលារាជធានីភ្នំពេញចុះកិច្ចសន្យាសម្បទានជាថ្មីជាមួយក្រុមហ៊ុន ភ្នំពេញថូវេ ដើម្បីសាងសង់ពង្រីកផ្លូវ ចាប់ពីសួនចោមចៅ ដល់ច្រមុះជ្រូកស្ទឹងមានជ័យ ដោយធ្វើការពង្រីកទទឹងពី១០ទៅ២៨ម៉ែត្រ ចាក់បេតុងកម្រាស់២តឹក មានសួនច្បារកណ្តាល ដាក់បង្គោលភ្លើង ស្លាកសញ្ញាចរាចរ គូសគំនូសចរាចរ និងដាក់លូ១ម៉ែត្រកន្លះសងខាង ដែលត្រូវចំណាយទុនវិនិយោគថ្មីចំនួន១០.៥៧៦.០០០ដុល្លាអាមេរិក ។សេចក្តីជូនដំណឹងនោះបានឲ្យដឹងទៀតថា ដោយក្រុមហ៊ុនបានចំណាយទុនបែបនេះ សាលារាជធានីភ្នំពេញ បានអនុញ្ញាតឲ្យក្រុមហ៊ុន យកតម្លៃសេវាថ្មីលើយានយន្តដែលធ្វើចរាចរឆ្លងកាត់ផ្លូវវិនិយោគនេះ ចាប់ពីថ្ងៃទី០១ធ្នូ២០១៥តទៅ គឺសម្រាប់រថយន្តតូច តាក់ស៊ី pick up មួយយក១ពាន់រៀល រថយន្តពី១២ទៅ២៤កៅអី២ពាន់រៀល រថយន្តពី២៥ទៅ៤៥កៅអី និងរថយន្តដឹកទំនិញធន់មធ្យមក្រោម២តោនកន្លះ៤ពាន់រៀល រថយន្តដឹកទំនិញធន់ធ្ងន់ចាប់ពី២តោនកន្លះឡើងទៅ៨ពាន់រៀល និងរថយន្តសណ្តោង១ម៉ឺនរៀល ហើយចាប់ពីឆ្នាំទី១០ ដល់ឆ្នាំទី៣០តម្លៃមានការកើនឡើង៥០០រៀលសម្រាប់ឡានតូច និង២ពាន់រៀលសម្រាប់ឡានធំ ។ ដោយឡែក សម្រាប់រថយន្តដែលមិនយកថ្លៃមាន៖ ក្បួនរថយន្តប្រតិភូ ,រថយន្តកងយោធពលខេមរៈភូមិន្ទ ,នគរបាលជាតិ ,កាកបាតក្រហម ,អគ្គីភ័យ និងរថយន្តសង្គ្រោះបន្ទាន់ ក្នុងពេលធ្វើបេសកកម្ម ។ចំណែកឯរថយន្តប្រជាពលរដ្ឋនៅតំបន់អមសង់ខាងផ្លូវ ដែលគ្មានផ្លូវផ្សេង ដើម្បីចេញ ចូល មិនតម្រូវឲ្យបង់ថ្លៃនោះទេ តែត្រូវមានការទំនាក់ទំនង ដើម្បីបានឯកសារសម្គាល់ពីក្រុមហ៊ុនសិន ។គួររំលឹកថា ផ្លូវចោមចៅឬផ្លូវវេង ស្រេងនេះ បានបើកការដ្ឋានកាលពីថ្ងៃទី២១វិច្ឆិកា ២០១៣ ជាប្រភេទផ្លូវវិ និយោគ(B.O.T)ក្នុងប្រវែង៦៥០០ម៉ែត្រ ទទឹង២៨ម៉ែត្រ ចាប់ពីច្រមុះជ្រូកស្ថានីយ៍ប្រេងសូគីម៉ិចស្ទឹងមានជ័យ ដល់រង្វង់មូលចោមចៅ ដោយចាក់បេតុងឆ្អឹងដែក មានកំរាស់២តឹក ដែលមានសាច់បេតុងសុទ្ធ២២ម៉ែត្រ មាន៣គន្លងទៅ៣គន្លងមក មានសួនច្បារចំកណ្តាល២ម៉ែត្រកន្លះ និងចិញ្ចើមផ្លូវ៣ម៉ែត្រសងខាងផងដែរ។ ហើយការស្ថាបនាមានរយៈពេល១៤ខែនិងចំណាយថវិកាអស់ជាង១០លានដុល្លាសហរដ្ឋអាមេរិកដែលជាថវិកាវិនិយោគរបស់ក្រុមហ៊ុន ភ្នំពេញថូវេ ។ទាក់ទិន្នទៅនឹងការយកលុយថ្លៃរថយន្តខាងលើនេះ មានប្រតិកម្មភ្លាមៗពីប្រជាពលរដ្ឋជុំវិញការយកលុយពីរថយន្តគ្រួសារនៅបញ្ឈរបង់ប្រាក់ផ្លូវវេងស្រេង ដោយមហាជនបាននិយាយថា ការតម្រូវឱ្យមានការបង់ថ្លៃរថយន្តឆ្លងកាត់នេះ គ្មាននរណាម្នាក់បានដឹងមុននោះទេ តែអ្នកលក់សំបុត្របាននិយាយថា សាលារាជធានីបានអនុញ្ញាតឱ្យយកចាប់ពីថ្ងៃទី១ធ្នូ នេះតទៅ ។
