បន្ទាយមានជ័យ ៖ ជនសង្ស័យប្រើហឹង្សាដោយចេតនាកាប់បុរស២នាក់បានរងរបួសធ្ងន់ស្រាល រឿងជំរះស្មៅប៉ះទុយោទឹកបែក ត្រូវបានសមត្ថកិច្ចប៉ូលីស្រុមង្គលបូរីធ្វើការឃាត់ខ្លួន កាលពីល្ងាចថ្ងៃទី០៣ ធ្នូ ២០១៥ នៅក្នុងភូមិអញ្ចាញ ឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ ។
លោក ស៊ី ឌី អធិការស្រុកមង្គលបូរីបានអោយដឹងថា ជនសង្ស័យដែលប្រើហឹង្សាខាងលើមានឈ្មោះ ឡុក សា ភេទប្រុស អាយុ២៧ឆ្នាំ មានទីលំនៅភូមិឃុំកើតហេតុ បានប្រើកាំបិតតាំងតោសរ កាប់ទៅលើឈ្មោះ ចាយ ជី ភេទប្រុស អាយុ៤០ បែកឆ្អឹងកែងដៃខាងឆ្វេង និងកាប់ទៅលើឈ្មោះ លឹម ធារិន របួសស្រាលត្រង់ករខាងក្រោយ ។ លោកបន្តថា ករណីហឹង្សានេះផ្តើមចេញពី ឪពុករបស់ជនសង្ស័យជំរះស្មៅក្បែផ្ទះប៉ះទុយោទឹកស្អាតជនរងគ្រោះបណ្តាលអោយបែក ហើយមិនទទួលខុសត្រូវពេលជនរងគ្រោះសួនាំ បែជាជនសង្ស័យកើតជាកំហឹងក្លាយទៅជាហឹង្សាតែម្តង ។
ក្រោយកើតហេតុ ជនសង្ស័យត្រូវបានសមត្ថកិច្ចប៉ូលីសស្រុកមង្គលបូរីធ្វើការឃាត់ភ្លាម និងបញ្ជូនមកស្នងការនគរបាលខេត្តដើម្បីរៀបចំបញ្ជូនបន្តទៅតុលាការចាត់ការតាមនីតិវិធីច្បាប់ ៕
