ព្រះវិហារនារីអ្នកសារព័ត៌មានម្នាក់បានស្លាប់បាត់បង់ជីវិតនៅនឹងកន្លែងកើតហេតុនិងសហការីម្នាក់ទៀតរងរបួសធ្ងន់ខណះជនរងគ្រោះទាំង២នាក់ជិះម៉ូតូវ៉េវអាល់ហ្វា១គ្រឿងក្នុងល្បឿនលឿនស្រាប់តែមានរថយន្តកាមរីកែច្នៃតទ្រុង១គ្រឿងទៀតបើកបរក្នុងទិសដៅច្រាស់ទិសគ្នារ៉េចង្កូតទៅបុកពេញទំហឹងតែម្តងកាលពីវេលាម៉ោង៧និង៤០នាទីព្រឹកថ្ងៃទី០៦ធ្នូ២០១៥។
ទីកន្លែងកើតហេតុការណ៍ស្ថិតនៅក្បែរស្ពានថ្មអូរប្រាំព្យាមស្រុកគូលែនជាប់ព្រំប្រទល់ស្រុកស្វាយលើខេត្តសៀមរាបរីឯតៃកុងរថយន្តត្រូវសមត្ថកិច្ចកងរាជអាវុធហត្ថប្រចាំព្រំប្រទល់និងនគរបាលស្រុកគូលែនឃាត់ខ្លួនបានភ្លាមៗ។
សាក្សីបានអោយដឹងថាភាគីជនរងគ្រោះធ្វើដំណើរពីខេត្តព្រះវិហារឆ្ពោះទៅកាន់ខេត្តសៀមរាបចំណែកភាគីម្ខាងទៀតធ្វើដំណើរពីខេត្តសៀមរាបត្រទ្បប់ទៅកាន់ខេត្តព្រះវិហារវិញប៉ុន្តែចៃដន្យអាក្រក់ក៍ជួបហេតុការណ៍គ្រោះថ្នាក់ចរាចរតែម្តង។នារីរងគ្រោះត្រូវរថយន្តបង្កបើកកិនបែកក្បាលធ្លាយខួរនៅលើដងផ្លូវជាតិលេ៦៤គួរអោយអណោចអធ័ម។
សាក្សីបន្តថាជនរងគ្រោះទាំង២នាក់នេះជាភ្នាក់ងារទូរទស្សន៍អនទ្បាញអ៊េមអេសជេ(MSJTVONLINE)នៅខេត្តកំពង់ធំ។ម៉ូតូជនរងគ្រោះម៉ាកវ៉េវអាល់ហ្វាពណ៌ក្រហមពាក់ស្លាកលេខកំពង់ធំ១F៤០០១។
សមត្ថកិច្ចមូលដ្ឋានបានអោយដឹងថាសពនារីរងគ្រោះឈ្មោះផៃភារម្យអាយុ៤២ឆ្នាំរស់នៅភូមិសាលាសន្ទុកឃុំកកោះស្រុកសន្ទុកខេត្តកំពង់ធំនិងឈ្មោះប្រាក់ថាភេទប្រុសអាយុ៤៥ឆ្នាំជាអ្នកបើកបរម៉ូតូរស់នៅភូមិស្រទ្បៅទងឃុំបល្ល័ង្គស្រុកបារាយណ៍ខេត្តកំពង់ធំរងរបួសធ្ងន់ត្រូវបានបញ្ជូនទៅសង្គ្រោះព្យាបាលនៅមន្ទីរពេទ្យបង្អែកខេត្តព្រះវិហារ។សមត្ថកិច្ចបន្តថាតៃកុងរថយន្តល្មើសឈ្មោះទីរ៉ាវុធភេទប្រុសជាទាហានកងពលតូចអន្តរាគមន៍លេខ៩នៅអូរជុញស្រុកជាំក្សាន្តដែលរថយន្តរបស់គាត់ពាក់ស្លាកលេខភ្នំពេញ២E៩៣៤៤ពណ៌ផ្ទៃមេឃ។
សមត្ថកិច្ចបញ្ជាក់ថាតៃកុងរថយន្តត្រូវបាននាំខ្លួនទៅកាន់អធិការដ្ឋាននគរបាលស្រុកគូលែនដើម្បីកសាងសំណុំរឿងបញ្ចូនទៅកាន់តុលាការខេត្តរីឯរថយន្ដបង្កហេតុនិងម៉ូតូរងគ្រោះត្រូវបានសមត្ថកិច្ចនគរបាលជំនាញចរាចរធ្វើការរក្សាទុកដើម្បីដោះស្រាយទៅតាមផ្លូវច្បាប់៕
មង្គល
