ខេត្តសៀមរាប អគារសិក្សា ១ខ្នង មាន២បន្ទប់ ធ្វើអំពីថ្ម ប្រកក្បឿង ដែលជាអំណោយរបស់សាលាអនុវិទ្យាល័យ វែសស្ត្រីង ប្រទេសសិង្ហបុរី ផ្តល់ជូនដល់សិស្សានុសិស្សសាលាបឋមសិក្សាល្វា ស្ថិតក្នុងភូមិល្វា ឃុំត្រពាំងធំ ស្រុកប្រាសាទ បាគង ខេត្តសៀមរាប ផ្តល់តាមរយៈក្រុមហ៊ុន Global Heritage Tours ត្រូវបានបើកសម្ពោធដាក់ឲ្យប្រើប្រាស់ជាផ្លូវការ កាលពីចុងសប្តាហ៍ ថ្ងៃទី០៦ ខែ ធ្នូ ឆ្នាំ ២០១៥ ក្រោមអធិបតីភាពលោកស្រីគួយណាលីនឃឹមប៊ុនសុង អនុប្រធានគណៈកម្មាធិការសាខាកាកបាទក្រហមខេត្តដោយមានការអញ្ជើញចូលរួមពីអាជ្ញាធរស្រុក ម្ចាស់ជំនួយ និង សប្បុរសជនរួមទាំងអស់លោកលោកស្រីជាមន្ត្រីរាជការសិស្សានុសិស្សនិង ប្រជាពលរដ្ឋផងដែរ ៕
បន្ទាប់ពីកិច្ចស្វាគមន៍របស់លោក ភូ សំអាត អភិបាលស្រុកប្រាសាទបាគង និង សេចក្តីរាយការណ៍ពីការ សាងសង់របស់លោកស្រី អាយរីន វ៉ុន ប្រធានក្រុមហ៊ុនទេសចរណ៍ Global Heritage Tours បានបញ្ជាក់ឲ្យដឹង ពីការចំណាងសាងសង់សរុប ថវិកាអស់ ជាង៣ម៉ឺនដុល្លា ដោយមានការបំពាក់នូវសម្ភារៈ បរិក្ខាសិក្សាផងដែរ ។
បន្ទាប់ពីចំណាប់អារម្មណ៍របស់អ្នកគ្រូ ជេនីស តី តំណាងវ៉ែសស្ត្រីសិខិនដេរីស្គូលសាំងហ្កសពូរ តាមរយៈ គម្រោងខាងផ្នែកអប់រំរួចមក លោកស្រី គួយ ណាលីន ឃឹម ប៊ុនសុងក្នុងនាមលោក ឃឹម ប៊ុនសុងប្រធានគណ:កម្មាធិការសាខាកាកបាទក្រហមកម្ពុជាខេត្តនិង ជាអភិបាលនៃគណ:អភិបាលខេត្តសៀមរាបក៏បានពាំនាំនូវការសាកសូរសុខទុក្ខដោយក្ដីនឹករលឹកជ្រាលជ្រៅជូនចំពោះលោកគ្រូអ្នកគ្រូបងប្អូនប្រជាពលរដ្ឋនិងក្មួយៗទាំងអស់ដែលវត្តមាននៅទីនេះ។ លោកជំទាវបានបញ្ជាក់ថាការបណ្តុះបណ្តាលនូវធនធានមនុស្សគឺជាកត្តាដ៏ ចំបងនៃគ្រឹះរឹងមាំក្នុងកិច្ចអភិវឌ្ឍន៍មូលដ្ឋាន ដើម្បីភាពរីកចម្រើនរបស់ប្រជាពលរដ្ឋយើងផងដែរ។ក្រោមការដឹកនាំដ៏ឈ្លាសវៃរបស់សម្ដេចអគ្គមហាសេនាបតីតេជោហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជាសមិទ្ធិផលសង្គមជាតិជាច្រើនបានរីកដុះដាលលើគ្រប់វិស័យដោយបានយកចិត្តទុកដាក់ខ្ពស់ក្នុងវិស័យអប់រំសិក្សាធិការចាប់ពីថ្នាក់មត្តយ្យសិក្សាបឋមសិក្សាមធ្យមសិក្សា រហូតដល់ឧត្តមសិក្សា ដែលជាស្ថាប័នមួយដ៏សំខាន់ ក្នុងការកសាងធនធានមនុស្សតាមរយ:ការបណ្ដុះបណ្ដាលចំណេះដឹងចំណេះធ្វើរួមទាំងបច្ចេកវិទ្យាទៀតផង។ លោកជំទាវ ក៏បានលើកឡើងថា ទាក់ទិននឹងការងារអប់រំនេះការបណ្ដុះបណ្ដាលចំណេះដឹងនៅបឋមសិក្សាពិតជាមានសារ: សំខាន់ណាស់ចំពោះក្មួយៗដែលស្ថិតក្នុងវ័យកុមារយុវជន គឺជាសរសស្តម្ភគ្រឹះរឹងមាំក្នុងកិច្ចអភិវឌ្ឍន៍ប្រទេស ។ ម្យ៉ាងទៀត លោកគ្រូអ្នកគ្រូ បានបង្ហាត់បង្រៀនទាំងចំណេះដឹងទូទៅ ក៏ដូចជាបានយល់ដឹងពីសីលធម៌ សុជីវធម៌ក្នុងការរស់នៅប្រចាំថ្ងៃរួមទាំងទំនៀមទម្លាប់ប្រពៃណីជាតិផងដែរ មុននឹងក្មួយៗឈានទៅមធ្យមសិក្សាជាបន្តបន្ទាប់ទៀត។ លោកស្រី គួយ ណាលីន ឃឹម ប៊ុនសុង ក៏បានបញ្ជាក់ថា នេះជាសមទ្ធិផលថ្មីមួយ សម្រាប់កូនចៅប្រជាជនក្នុងភូមិល្វា ពីព្រោះថាពីមួយឆ្នាំទៅមួយឆ្នាំចំនួនកុមារដែលស្ថិតក្នុងវ័យសិក្សាចេះតែកើនឡើងជាលំដាប់ដែលទាមទារនូវតម្រូវការអាគារសិក្សាថ្មីៗថែមទៀតសម្រាប់ក្មួយៗចូលរៀន។ហើយអាគារសិក្សាថ្មីនេះក៏បានចូលរួមចំណែកកាត់បន្ថយការលំបាករបស់ក្មួយៗដោយត្រូវធ្វើដំណើរទៅសិក្សានៅសាលាមួយទៀតឆ្ងាយពីផ្ទះសំបែងរបស់ខ្លួនរួមទាំងការបារម្ភពីសុវត្ថិភាពក្នុងការធ្វើដំណើររបស់កូនៗទៅសាលារៀនឆ្ងាយពីសំណាក់ឪពុកម្ដាយទៀតផង។ក្នុងនោះដែរលោកជំទាវក៏បានធ្វើការផ្តាំផ្ញើនិង សំណូមពរលោកនាយក លោកគ្រូអ្នកគ្រូយកចិត្តទុកដាក់ប្រើប្រាស់និងថែរក្សាអាគារសិក្សាថ្មី១ខ្នងនេះឲ្យបានល្អ ប្រើប្រាស់បានយូរអង្វែងក៏ដូចជារួមគ្នាបំផុសស្មារតីសហគមន៍សាមគ្គីគ្នាជួយជួសជុលក្នុងករណីចាំបាច់ណាមួយដើម្បីបន្តនូវទំនុកចិត្តពីសំណាក់សប្បុរសជនដែលបានបរិច្ចាគថវិកាសាងសង់អគារនេះ សូមឲ្យបងប្អូនដែលជាឪពុក ម្ដាយអាណាព្យាបាលបន្ដយកចិត្តទុកដាក់អប់រំកូនចៅឲ្យខិតខំរៀនសូត្រនិងជៀសវាងឲ្យឆ្ងាយពីអំពើអបាយមុខទាំងឡាយសំខាន់គ្រឿងញៀនដែលនាំឲ្យប៉ះពាល់ដល់សុខភាពនិងស្ថេរភាពសង្គមជាតិ។សម្ដែងអំណរគុណដ៏ជ្រាលជ្រៅជូនចំពោះវេស្ត៍ស្ព្រីងសឺខុនដែរីស្គូលសាំងហ្គាពួរមានអ្នកគ្រូជេនីសតីជាតំណាងដែលមានសន្ដានចិត្តសប្បុរសធម៌ឧបត្ថម្ភថវិកាសាងសង់អាគារសិក្សាថ្មី១ខ្នង ក៏ដូចជាជួយជួសជុលឲ្យបានសមរម្យឡើងវិញក្នុងការរួមចំណែកកសាងធនធានមនុស្សនិងកសាងហេដ្ឋារចនាសម្ព័ន្ធក្នុងវិស័យអប់រំនៅកម្ពុជាក៏ដូចខេត្តសៀមរាប ដែលជាគោលដៅភ្ញៀវទេសចរណ៍លើពិភពលោកព្រមទាំងសូមឲ្យសប្បុរសជនបន្តនូវប្រពៃណីរបស់ខ្លួន ជួយដល់សកម្មភាពអភិវឌ្ឍន៍ហេដ្ឋារចនាសម្ព័ន្ធតាមបណ្ដាក្រុងស្រុកក្នុងខេត្តសៀមរាបផងដែរ ៕
