(ខេត្តព្រៃវែង)ការ៉ាស់សាំងតូតាល់នៅអ្នកលឿងត្រើយខាងកើតស្ថិតក្នុងភូមិ ៤ ឃុំព្រែកខ្សាយ “ខ” ស្រុកពាមរក៍ខេត្តព្រៃវែង បានសាងសង់រំលោភលើផ្លូវសាធារណៈដោយគ្មានខ្លាចញញើតច្បាប់ និងគ្មានស្តាប់ការណែនាំរបស់អាជ្ញាធរខេត្តព្រៃវែង ។ ការ៉ាស់សាំងតូតាល់ដែលសាងសង់រំលោភលើផ្លូវសាធារណៈត្រូវបានស្គាល់ឈ្មោះថៅកែ គឺ លោកនៅ សុខា ជាអ្នកមានមួយរូបនៅតំបន់អ្នកលឿងត្រើយខាងកើត ហើយធ្លាប់ធ្វើព្យុះធ្វើភ្លៀងធ្វើអោយអាជ្ញាធរខេត្តព្រៃវែងឈឺក្បាលបន្តិចនោះទេ នៅកន្លងមក ។ ជាក់ស្តែងដូចករណីការ៉ាស់តូតាល់ដែលសាងសង់រំលោភលើផ្លូវសាធារណៈ អាជ្ញាធរខេត្តបានហៅម្ចាស់ទៅធ្វើកិច្ចសន្យាអោយរុះរើស្ថាកសញ្ញាតូតាល់ចេញអោយផុតពីផ្លូវសាធារណៈ តែម្ចាស់ការ៉ាស់សាំងរូបនេះ យល់ព្រមអោយតែរួចពីមាត់ ទីបំផុតការ៉ាស់សាំងតូតាល់នៅដដែលហាក់ផ្គើននិងអាជ្ញាធរស្រុក និងអាជ្ញាធរខេត្តព្រៃវែងថែមទៀតផង ។
ទាំងនេះសរបញ្ជាក់អោយឃើញពីភាពកុំសោយរបស់អាជ្ញាធរខេត្តព្រៃវែងអសមត្ថភាព ព្រោះម្ចាស់ការ៉ាស់សាំង តូតាល់មិនព្រមអនុវត្តតាមកិច្ចសន្យា ។ គួររំលឹកដែរថា កាលពីថ្ងៃទី ២២ ខែ តុលា ឆ្នាំ ២០១៥ លោក ម៉ុក ធារី អភិបាលរងខេត្តព្រៃវែង បានចុះត្រួតពិនិត្យ ឃើញថា សាង់សង់រំលោភលើផ្លូវសាធារណៈមែន ។ លុះដល់ថ្ងៃទី ២៦ ខែ តុលា ឆ្នាំ ២០១៥ អាជ្ញាធរខេត្តបានចេញលិខិតអញ្ជើញម្ចាស់ការ៉ាស់តូតាល់មកធ្វើកិច្ចសន្យារុះរើស្លាកសញ្ញាតូតាល់ អោយផុតពីផ្លូវសាធារណៈ តែមកទល់ពេលនេះម្ចាស់ការ៉ាស់សាំងតូតាល់មួយនេះ មិនអនុវត្តតាមកិច្ចសន្យារបស់អាជ្ញាធរខេត្តព្រៃវែងនោះទេ ។ ប្រជាពលរដ្ឋអ្នកលក់បន្តិបន្តួចនៅក្បាលការ៉ាស់សាំងតូតាល់ត្រូវបានម្ចាស់ការ៉ាស់ដេញចេញមិអោយលក់ ដើម្បីរំលោភយកដីធ្វើកម្មសិទ្ធិរបស់ខ្លួនដោយឥតអៀនខ្មាស់ ។ ពួកគាត់បានលើកឡើងទៀតថារាល់ថ្ងៃ ពួកគាត់មិនអាចសង្ឃឹមអាជ្ញាធរខេត្តព្រៃវែងបានទេ ព្រោះដំណោះស្រាយជាមួយអ្នកមានដែលរំលោភលើដី និងផ្លូវសាធារណៈគឺមិនសូវមានប្រសិទ្ធភាពនោះទេ។ ដូច្នេះពួកគាត់ប្រាកដជាគ្មានកន្លែងលក់ដូរបន្តិចបន្តួចសំរាប់ចិញ្ចឹមជីវិតទៀតឡើយ ។
លោក ម៉ុក ធារី អភិបាលរងខេត្តព្រៃវែង បានបញ្ជាក់យ៉ាងច្បាស់ ពាក់ព័ន្ធនឹងការ៉ាស់សាំងតូតាល់ ប្រាប់កម្ពុជាថ្មីថា ការ៉ាស់សាំងតូតាល់នៅអ្នកលឿង មិនគោរពតាមកិច្ចព្រមព្រៀង ហាក់មើលស្រាលអាជ្ញាធរខេត្តព្រៃវែងហើយ និងហៅម្ចាស់ការ៉ាស់តូតាល់ មកធ្វើកិច្ចសន្យាជាថ្មីម្តងទៀត នៅក្នុងសប្តាហ៍នេះអោយរុះរើស្លាកសញ្ញាតូតាល់ចេញ ពីផ្លូវសាធារណៈធ្វើយ៉ាងណាអោយម្ចាស់ការ៉ាស់សាំងរូបនេះចេះគោរពច្បាប់ផង ។ 
