(ខេត្តកណ្តាល) អាជីវកម្មបូមខ្សាច់អនាធិបតេយ្យឥតច្បប់ជាច្រើនកន្លែង នៅស្រុកលើកដែក ខេត្តកណ្តាល កំពង់ដំណើរការបានយ៉ាងរលូនជាយូរឆ្នាំមកហើយ ។ ទោះបីបច្ចុប្បន្នអាជីវកម្មបូមខ្សាច់ត្រូវបានរាជរដ្ឋាភិបាលចេញអាជ្ញា ប័ណ្ណអោយកំពង់ផែភ្នំពេញគ្រប់គ្រងតាមដងទន្លេមេគង្គក្រោម ដើម្បីកុំអោយមានភាពអនាធិបតេយ្យ និងបាត់បង់ចំណូលថវិការដ្ឋ ។ ប៉ុន្តែសព្វថ្ងៃក្រុមឈ្មួញខិលខូចនៅតែបន្តលួចធ្វើអាជីវកម្មបូមខ្សាច់បានយ៉ាងស្រួលបែបនេះប្រហែលជាមានភ្លើងខៀវ រឺក៏ជាក្រុមសមត្ថកិច្ចស្រុកលើកដែកហើយមើលទៅ ទើបគ្មានសមត្ថកិច្ច និងអាជ្ញាធរចុះទៅទៅបង្ក្រាបក្រុមឈ្មួញខិលខូចបែបនេះ ។
ប្រជាពលរដ្ឋបានលើកឡើងទៀតថា អាជីវកម្មបូបខ្សាច់ជាច្រើនកន្លែងនៅស្រុកលើកដែក កើតមានយូរណាស់មកហើយ សព្វថ្ងៃឈ្មួញធ្វើសកម្មភាពលួចបូមនៅពេលយប់ លុះព្រឹកឡើងគេផ្អាកសកម្មភាពយ៉ាងស្ងៀមស្ងាត់បំផុត ។ ពួកគាត់បានបន្តទៀតថា គាត់មានការព្រួយបារម្មណ៍យ៉ាងខ្លាំង ព្រោះអាជីវកម្មបូមខ្សាច់នៅស្រុកលើកដែកកំពង់បង្កអោយមានការបាក់ដីច្រាំងទន្លេកាន់តែខិតជិតមកដល់ផ្ទះរបស់ពួកគាត់ហើយ ។ ចំណែកអាជ្ញាធរស្រុកលើកដែក មិនដែលឃើញចុះមកត្រួតពិនិត្យ រឺក៏មានចំណាត់ការបង្ក្រាបក្រុមអាជីវកម្មបូមខ្សាច់នោះទេ ។
ក្រុមអជីករដែលកំពង់លក់ខ្សាច់រាល់ថ្ងៃបានប្រាប់កម្ពុជាថ្មីថា គំនរខ្សាច់របស់ពួកគាត់ដាក់លក់រាល់ថ្ងៃ គឺក្រុម របស់លោក រដ្ឋា និងលោក រស់ ចន្ថា អធិការស្រុកលើកដែកជាអ្នកបូមអោយ ។ អាជីវករបានបន្តទៀតថា នៅស្រុកលើកដែក បើអ្នកណាចង់បើកដេប៉ូលក់ខ្សាច់ រឺក៏ទិញខ្សាច់ គឺត្រូវទាក់ទងលោក រដ្ឋា និងលោក រស់ ចន្ថា ព្រោះអ្នកទាំងពីរជាអ្នកផ្គត់ផ្គង់ និយាយអោយស្រួលយល់គឺកាង ផ្តាច់មុខរឿងបូមខ្សាច់នៅស្រុកលើកដែក ព្រោះលោកទាំងពីរគឺជា សមត្ថកិច្ចប៉ូលីស ហើយជាអធិការស្រុកលើកដែកថែមទៀត ដូច្នេះហើយបានជាគ្មានការបង្ក្រាប ។
ពាក់ព័ន្ធទៅនឹងការចោទប្រកាន់ខាងលើ លោក រដ្ឋា បានអះអាងថា លោកមិនបានបូមខ្សាច់ដាក់តាមដេប៉ូនោះទេ គ្រាន់តែបូមដាក់វត្តប្រគេនលោកធ្វើសាលាឆាន់ ហើយយកថ្លៃប្រេងពីលោកបន្តិចបន្ទួច ។ ចំណែកលោក រស់ ចន្ថា អធិការស្រុកលើកដែក មិនមែនលោកជាអ្នកបូមនោះទេ បើរដ្ឋាគេជាអ្នកបូមទៅសួរ រដ្ឋានោះទៅ ចំណែកខ្សាច់ដែលបូមដាក់វត្តគឺបូមប្រគេនលោក ។ ហើយពាក្យចោទប្រកាន់ គឺមិនពិតនោះទេ លោក បូមខ្សាច់មែន 
តែបូមធ្វើផ្លូវដាច់ និងប្រគេនលោកតែប៉ុណ្ណោះ ។
