ខេត្តសៀមរាប នៅចុងសបា្តហ៏នេះក្រុមហ៊ុន Manulife ដែលជាអ្នកឧបត្ថម្ភធំ សម្រាប់ព្រឹត្តិការណ៍រត់ប្រណាំងអន្តរជាតិ ពាក់កណ្តាលម៉ារ៉ាតុង ខួបទី២០ ឆ្នាំ២០១៥ នៅអង្គរវត្ត បានបរិច្ចាគថវិកាទៅកាន់មន្ទីរពេទ្យកុមារអង្គរ(ខេត្តសៀមរាប) ដែលជាមន្ទីរពេទ្យផ្តល់សេវាពិនិត្យ ព្យាបាលជម្ងឺកុមារដោយឥតបង់ប្រាក់ ។
វេជ្ជបណ្ឌិត ងួន ចាន់ភត្ត្រា នាយកមន្ទីរពេទ្យកុមារអង្គរ បានឲ្យដឹងសាវតានៃមន្ទីរពេទ្យកុមារមួយនេះថា ៖ លោក ខេន រ៉ូ ដែលជាអ្នកថតរូបជនជាតិជប៉ុនដ៏ល្បីល្បាញ គឺជាស្ថាបនិកនៃមន្ទីរពេទ្យកុមារអង្គរ ។ លោកបានផ្តួចផ្តើមកសាងមន្ទីរពេទ្យមួយនេះនៅក្នុងឆ្នាំ១៩៩៣ ខណៈពេលដែលលោកបានមកទស្សនកិច្ចនៅខេត្តសៀមរាប និងថតរូបនៅប្រាសាទអង្គរវត្ត ដោយសារតែលោកមានអារម្មណ៍សោកសង្រេង នៅពេលដែលបានឃើញកុមារកម្ពុជាមានជម្ងឺ ខ្វះអាហារូបត្ថម្ភ ដែលបណ្តាមកពីសង្គ្រាម ។ លោក ខេន រ៉ូ បានបង្កើតអង្គការមិត្តគ្មានព្រំដែននៅក្នុងឆ្នាំ ១៩៩៦ ក្រោមការជួយជ្រោមជ្រែងដោយក្រុមប្រឹក្សាភិបាលផ្នែកឯកទេសសុខាភិបាលលំដាប់អន្តរជាតិ សមាគមផ្នែកវិចិត្រសិល្បៈ និងមានអ្នកផ្តល់ជំនួយប្រមាណជា ៦ ០០០នាក់ មកពីគ្រប់ទិសទីលើសាកលលោក មន្ទីរពេទ្យកុមារអង្គរត្រូវបានបង្កើត និង ដំណើរការនៅក្នុងឆ្នាំ ១៩៩៩ ។
លោក នាយកមន្ទីរពេទ្យកុមារអង្គរ បានបង្ហាញឲ្យដឹងថា ៖ ជារៀងរាល់ឆ្នាំ មន្ទីរពេទ្យកុមារអង្គរ បានជួយព្យាបាលជម្ងឺកុមារ ប្រមាណជាង ១៥ម៉ឺននាក់ និងបានបណ្តុះបណ្តាលធនធានមនុស្សក្នុងវិស័យសុខាភិបាលផងដែរ ជាមួយនឹងបេសកម្មចុះសេវាអប់រំសុខភាព ពិនិត្យ ព្យាបាល ជម្ងឺកុមារនៅមូលដ្ឋានជនបទ ។ លោកបានថ្លែងអំណរគុណចំពោះក្រុមហ៊ុន Manulife ជាមួយនឹងការបរិច្ចាគថវិកា ២៥ ០០០ដុល្លា សម្រាប់ជាប្រយោជន៍ដល់ការជួយសង្គ្រោះជីវិតកុមារ ឲ្យចាកចេញពីការគំរាមកំហែងសុខភាព ដោយសារជម្ងឺផ្សេងៗនោះ ។
លោក ROY GORIប្រធានអគ្គនាយកប្រតិបត្តិនៃក្រុមហ៊ុន Manulife ប្រចាំតំបន់អាស៊ី មានប្រសាសន៍ថា ក្រុមហ៊ុន Manulife មានប្រពៃណីផ្សារភ្ជាប់ធុរកិច្ចរបស់ខ្លួនជាមួយនឹងកិច្ចការជួយសង្គមលើវិស័យមនុស្សធម៌ ។ លោកបានបន្តថា Manulife បានជួយដល់ប្រជាសហគមន៍នៅទូទាំងតំបន់អាស៊ីជាច្រើនឆ្នាំមកហើយ ហើយក៏កំពុងជួយបន្តទៀត ។ លោកបានបង្ហាញអារម្មណ៍ថា ៖ Manulife ពិតជាសោមនស្ស និងមានមោទនភាព ដែលបានរួមចំណែកគាំទ្រដល់កិច្ចដំណើរការរបស់មន្ទីរពេទ្យកុមារអង្គរ ។ វាពិតជាអស្ចារ្យខ្លាំងណាស់ ដែលចាប់តាំងពីឆ្នាំ១៩៩៩ មកទល់នឹងបច្ចុប្បន្ននេះ មន្ទីរពេទ្យកុមារអង្គរ ព្យបាលជម្ងឺជូនកុមារកម្ពុជា បានប្រមាណ ១លាន ៥សែននាក់ ។ លោកបន្តទៀតថា ការគាំទ្រមន្ទីរពេទ្យកុមារអង្គរ គឺជាឆន្ទៈរបស់ក្រុមហ៊ុន ដើម្បីបានជួយដល់ក្រុមគ្រួសារកម្ពុជា កសាងអនាគតដ៏ប្រសើរមួយ ព្រោះកុមារ គឺជា ទំពាំងស្នងឬស្សី ៕
