ខេត្តឧត្តរមានជ័យ ប្រើប្រាស់ហ្គាសជំនួសសាំង យ៉ាងហោចមានមនុស្ស៧នាក់ បានរងរបួសយ៉ាងធ្ងន់ធ្ងរ ពីការផ្ទុះធុងហ្គាសនៅក្នុងរថយន្តកាមរីហើម១គ្រឿង ដោយគេសង្ស័យថា រយន្តដែលរងការផ្ទុះហ្គាសនោះ បានកែច្នៃ ប្រព័ន្ធភ្លើងខុសបច្ចេកទេស ពីការប្រើសាំងមកហ្គាស។ ហេតុការណ៍រងគ្រោះថ្នាក់នោះ បានកើតឡើងកាលពីល្ងាចថ្ងៃចុងសប្តាហ៍កន្លងទៅនេះ ស្ថិតក្នុងភូមិព្រះចំបក់ ឃុំផ្អាវ ស្រុកត្រពាំងប្រាសាទ ខេត្តឧត្តរមានជ័យ ។នៅក្រោយហេតុការណ៍នេះ ជនរងគ្រោះទាំង៧នាក់ ត្រូវបានគេបញ្ជូនទៅសង្គ្រោះបន្ទាន់ នៅក្នុងមន្ទីរពេទ្យបង្អែកស្រុកអន្លង់វែង ។ សាក្សីដែលជាសាច់ញ្ញាតិជនរងគ្រោះ បាននិយាយថា អ្នកដែលរងរបួសនៅក្នុងការផ្ទុះ ធុងហ្គាសរថយន្តនេះ មានចំនួន៧នាក់ ក្នុងនោះមានទាំងក្មេងចាស់ ប្រុសនិងស្រី ហើយម្ចាស់រថយន្តដែលរងការផ្ទុះនេះ បានរងរបួសធ្ងន់ ត្រូវគេស្គាល់ឈ្មោះដាំ សុផាត អាយុ៣៤ឆ្នាំ ត្រូវជាប្តីរបស់ស្ត្រីឈ្មោះសំ អូន អាយុ៣២ឆ្នាំ រស់នៅភូមិអូរជញ្ជៀន ឃុំអន្លង់វែង ស្រុកអន្លង់វែង ខេត្តឧត្តរមានជ័យ ជិះរថយន្តប្រភេទកាមរីឆ្លាម ពណ៌ប្រផេះ ពាក់ស្លាកលេខ ភ្នំពេញ ២-៦៦៩៧។ សាក្សីបាននិយាយទៀតថា នៅមុនពេលកើតហេតុ ម្ចាស់រថយន្តនេះ បានបើកមកចូលលេងផ្ទះបងប្អូននៅក្នុងភូមិឃុំខាងលើ នៅពេលនោះអ្នកជិះនៅក្នុងរថយន្តនោះ បានចេញពីរថយន្តមិនទាន់អស់ផង ក៏ស្រាប់តែគេឃើញមានស្នូរផ្ទុះចេញ ពីគូថរថយន្តយ៉ាងកងរំពង ធ្វើឲ្យម្ចាស់ផ្ទះ និងសាច់ញ្ញាតិរួមដំណើរទាំងអស់ បានរងនូវការគ្រោះថ្នាក់ ពីការផ្ទុះធុនហ្គាសនៅក្នុងរថយន្តនេះ ហើយអ្វីដែលគួរឲ្យអាសូរបំផុតនោះ គឺកុមារតូចៗពីរបីនាក់ បានរងរបួសយ៉ាងធ្ងន់ធ្ងរ។ សមត្ថកិច្ចបាននិយាយថា ការផ្ទុះធុងហ្គាសនេះ គឺបណ្តាលមករថយន្តនេះ បានកែច្នៃប្រព័ន្ធភ្លើងប្រើបាស់។
