ខេត្តសៀមរាប៖ សមត្ថកិច្ចចម្រុះរួមមានៈនគរបាលសេដ្ឋកិច្ចខេត្ត,នគរបាលអធិការស្រុកក្រឡាញ់ ,និងមន្ត្រីសុខាភិបាលខេត្តសៀមរាប បានចុះប្រតិបត្តិការត្រួតពិនិត្យ រហូតឈានដល់ធ្វើការឆែកឆេរ ទីតាំងឱសថ ស្ថាន មួយកន្លែងជ្រកក្រោយស្លាកយីហោ សមាគមន៍គ្រូពេទ្យគន្ធធម៌កម្ពុជា ដកហូតបានថ្នាំ១០៣មុខនិងស៊ីរ៉ូម៣២៣ដប បិត ទីតាំងបណ្តោះអសន្ន។
ក្នុងប្រតិបត្តិការចុះត្រួតពិនិត្យរហូតដល់ឆែកឆេរទីតាំងខាងលើនោះធ្វើឡើងពេញ១ថ្ងៃ គឺ ថ្ងៃទី០៨ ខែធ្នូ ឆ្នាំ២០១៥ ស្ថិតនៅក្នុងផ្ទះលក់ឱសថជ្រកក្រោយស្លាកយីហោ សមាគមន៍គ្រូពេទ្យគន្ធធម៌កម្ពុជា ក្នុងភូមិកំពង់ថ្កូវ ឃុំកំពង់ថ្កូវ ស្រុកក្រឡាញ់ ខេត្តសៀមរាប ដែលដឹកនាំដោយ លោក សឿន សេន នាយការិយាល័យនគរបាលប្រឆាំងបទល្មើសសេដ្ឋកិច្ចខេត្តនិង លោក កើត វណ្ណារ៉េត ព្រះរាជអាជ្ញាអមសាលាដំបូងខេត្ត។
លោក សឿន សេន នាយការិយាល័យនគរបាលប្រឆាំងបទល្មើសសេដ្ឋកិច្ចខេត្តបានប្រាប់ថា ដោយមានការសហការជាមួយកម្លាំងមូលដ្ឋាននិងមន្ទីរសុខាភិបាលខេត្ត ទើបកម្លាំងជំនាញបានធ្វើការឆែកឆេរបានភ្លាមៗតាមបញ្ជារបស់លោក កើត វណ្ណារ៉េត ព្រះរាជអាជ្ញាអមសាលាដំបូងខេត្តលោកបន្តថា បន្ទាប់ពីធ្វើការឆែកឆេររួចមក កម្លាំងជំនាញបានធ្វើការឃាត់ខ្លួនស្ត្រីជាម្ចាស់ទីតាំងនិងជាជនជាតិចិនម្នាក់និងស្ត្រីជាអ្នកបកប្រែម្នាក់ រួចយកមកកាន់ការិយាល័យដើម្បីធ្វើការសួរនាំ។
លោកបានបញ្ជាក់ថា ម្ចាស់ទីតាំងមានឈ្មោះ តាំង លីហ៊ាង ភេទស្រីអាយុ៤៧ឆ្នាំជាជនជាតិចិន កាន់ប៉ាស្ព័រលេខ E១១២១៩៨០២ បានចូលមកបើកឱសថស្ថានជ្រកក្រោមយីហោ សមាគមន៍គ្រូពេទ្យគន្ធធម៌កម្ពុជា ក្នុងអំឡុងឆ្នាំ២០០៨ នេះមានរយៈពេលជិត៧ឆ្នាំមកដល់បច្ចុប្បន្ន។ចំណែកអ្នកបកប្រែមានឈ្មោះ ឡេង មួយគៀង ភេទស្រីអាយុ២៨ឆ្នាំ មានមុខងារជាអ្នកមើលការខុសត្រូវនិងអ្នកបើកប្រែផង មានទីលំនៅភូមិ ឃុំកើតហេតុខាងលើ។លោកបានបញ្ជាក់ទៀតថា ក្រោយពីធ្វើការឃាត់ខ្លួនជនជាតិចិន កម្លាំងជំនាញក៏បានដកហូតវត្ថុតាងរួមមានៈថ្នាំគ្រាប់សរុបមានចំនួន១០៣ មុខ ស្មើនឹង ១៤១៨១១គ្រាប់ និងស៊ីរ៉ូមចំនួន៣២៣ដប ព្រមទាំងធ្វើការបិតទីតាំងឱសថស្ថាននោះជាបណ្តោះអសន្ន ដោយសារគ្មានចុះបញ្ជីការ ស្តីពីច្បាប់គ្រប់គ្រងឱសថស្ថាន ស្ត្រីជនជាតិចិន ត្រូវបានកម្លាំងជំនាញ រៀបចំសំណុំរឿង បញ្ជូនទៅតុលាការចំណែកវត្ថុតាងជាថ្នាំពេទ្យនិងស៊ីរ៉ូម ត្រូវបានកម្លាំងជំនាញប្រគល់ឱ្យខាងមន្ទីរសុខាភិបាលដើម្បីចាត់ការបន្ត៕
