សៀមរាបៈ បទល្មើសរុញស៊ីបបានកើនឡើងជាង១០០ទូកបន្តកន្ទុយគ្នា ធ្វើសកម្មភាពក្នុងភូមិសាស្ត្រទឹកដីឃុំកំពង់ឃ្លាំង ពេជ្រចក្រី មាត់ខ្លា បង្ករភាពអានាធិបតេយ្យដោយគ្មាន សមត្ថកិច្ចណាអើពើ ធ្វើឲ្យមហាជនមានការព្រួយបារម្ភណ៍ ចំពោះការបាត់បង់មឆ្ឆាជាតិ បាត់បង់ធនធានធម្មជាតិ ជាពិសេសគឺបំផ្លាញជីវៈចម្រុះគ្រប់សព្វបែបយ៉ាងនៅក្នុង ទន្លេសាប ដោយសារតែការខ្វះចន្លោះប្រហោងរបស់សមត្ថកិច្ច ផ្នែករដ្ឋបាលជលផល ដំដែក។
ឃុំកំពង់ឃ្លាំងផ្នែកនៃបឹងទន្លេសាប នៅពេលយប់ហាក់បីដូចជាទីក្រុងមួយ នៅកណ្តាលទន្លេសាប ប្រកបដោយភ្លើងភ្លឺ រន្ទាលពេញផ្ទៃទឹក ប្រជានេសាទដាក់ឆ្នុក និងរុញស៊ីប ដែលទិដ្ឋភាពបទល្មើសនេសាទ ស្ថិតនៅក្នុងឃុំកំពង់ឃ្លាំង ស្រុកសូទ្រនិគមន៍ ខេត្តសៀមរាប កាណូតតូចធំ មិនតិចពី១០០គ្រឿងបានដង្ហែរគ្នាក្នុងផ្ទៃបឹងទន្លេសាប ធ្វើសកម្មភាពរុញស៊ីប យ៉ាងព្រងើយ ដោយមិនខ្វល់ពីការខុសច្បាប់ម្តងណាឡើយ ។
ពាក់ព័ន្ឋទៅនឹងការចោទប្រកាន់ ថាសមត្ថកិច្ចផ្នែករដ្ឋបាលជលផលដំដែក ខ្វះវិធានការគ្រប់គ្រង់បទល្មើសនេសាទ ដែលប្រជានេសាទតែងតែលួចប្រើប្រាស់ឧបករណ៍នេសាទដោយខុសច្បាប់នេះ គឺពុំអាចធ្វើកាតទំនាក់ទំនងតាមទូរ ស័ព្ទពីលោក អ៊ុន បានឡើយ ដោយសារទូរស័ព្ទមិនអាចហៅចូលបាន ដោយឡែកឧបករណ៍នេសាទនេះ មិនមែន មានតែដាក់ឆ្នុក និងរុញស៊ីបនោះទេ គឺមានការដាក់ដៃ ដាក់សាច់របាំងស្បៃមុងរាប់ពាន់ម៉ែត្រទៀត ដែលកំពុងតែដាក់ ពេញផ្ទៃទឹក ។
សូមបញ្ជាក់ថា ឧបករណ៍នេសាទខុសច្បាប់ទាំងនេះ គឺជាឧបករណ៍ដែលត្រូវបានហាមឃាត់ ពីសំណាក់ក្រសួងកសិកម្មរុក្ខាប្រម៉ាញ់ និងនេសាទ ដោយសារតែជាឧបករណ៍ ដាក់អំពូលភ្លើង បញ្ជោតសត្វល្អិតឲ្យចូលមកលេងភ្លើង លុះក្រោយមក សត្វល្អិតបានធ្លាក់ចូលទឹក ត្រូវបានត្រីតូច ធំ ចាប់តាំងពីទំហំកន្លះហ៊ុន រហូតដល់ត្រីធំ ត្រូវបានជាប់នៅ ក្នុងឧបករណ៍ឆ្នុក ដែលមានលក្ខណៈជាចងមុងផ្ងាជើង ចំណែកការរុញស៊ីប គឺជាការប្រើប្រាស់សំណាញ់កន្រងវែងបណ្តោយទូក ចងឈើជាចំពាមលើក្បាលទូកហើយរុញ ឧបករណ៍ទាំងនេះមានភាពអន្តរាយដល់មឆ្ឆាជាតិយ៉ាងធ្ងន់ធ្ងរ តែបែជាលោក ព្រិន សាវិន នាយខណ្ទរដ្ឋបាលជលផលសៀមរាប មិនខ្ចីធ្វើជាដឹងជាលឺនោះទេ ថែមទាំងបណ្តែត បណ្តោយឲ្យមានការ នេសាទខួបប្រាំងខួបវស្សា។
ដោយ ប៊ុន រដ្ឋា
