ភ្នំពេញ ៖ ស្ត្រីជាមេអណ្តើកម្នាក់ ត្រូវសាលាដំបូងរាជធានីភ្នំពេញ កាលពីថ្ងៃទី០៨ ខែឧសភា ឆ្នាំ២០១៤ ផ្តន្ទាទោសដាក់ពន្ឋនាគារ៤ឆ្នាំ ពីបទជួញដូរមនុស្សឆ្លងដែនខុសច្បាប់ ទៅធ្វើជាស្រី ពេស្យាចារនៅប្រទេសថៃ ។ ប្រធានក្រុមប្រឹក្សាជំនុំជម្រះ លោក សួស សំអាត បានប្រកាសសាលក្រមផ្តន្ទាទោស ឈ្មោះ ជ្រា លីនដា អាយុ២៣ឆ្នាំ ដាក់ពន្ឋនាគារ៤ឆ្នាំ ។
ជនជាប់ចោទ ត្រូវបានសមត្ថកិច្ចនគរបាលប្រឆាំងការជួញដូរមនុស្សនិងការពារ អនីតិជនរាជធានី ឃាត់ខ្លួនកាលពីថ្ងៃទី២៣ ខែសីហា ឆ្នាំ២០១៣ ដោយយោងលើពាក្យបណ្តឹងរបស់ជនរងគ្រោះ២នាក់។ ក្នុងពាក្យបណ្តឹងរបស់ជនរងគ្រោះបានចោទប្រកាន់ថា ជនសង្ស័យដែលជាអ្នកធ្វើការក្នុងភោជនីយដ្ឋានមួយបានបបួលពួកនាង ទាំងពីរដែលជាអ្នកជួលផ្ទះ ជិតខាងគ្នា ធ្វើដំណើរទៅកាន់ខេត្តកោះកុង ។
ពេលទៅដល់ទីនោះ មានមនុស្សស្រីម្នាក់មកនាំដើរចេញពីផ្សារមួយក្នុងខេត្តដោយឆ្លង កាត់បន្ទាយទាហាន រួចធ្វើដំណើរឆ្លងកាត់ភ្នំ អស់ពេលជាង៣ម៉ោងទើបចូលដល់ដីថៃ គឺស្រុកខ្លងស្រ៊ុន។ ពេលទៅដល់ទឹកដីថៃ អ្នកជូនដំណើរបាននាំពួកនាងចូលក្នុងផ្ទះបនមួយកន្លែង ពេលនោះស្ត្រីម្នាក់បានសួរពួកនាងថា តើព្រមធ្វើស្រីបនទេ? ពួកនាងបានប្រកែកទើបមេបននៅស្រុកខ្លងស្រ៊ុន ដេញនាងឱ្យវិលមកស្រុកខ្មែរវិញ ហើយក៏រៀបចំពាក្យបណ្តឹងប្តឹងឈ្មោះ ជ្រា លីនដា តែម្តង ៕ 
