សៀមរាប៖ បុរសជាជនបរទេសពីរនាក់និងខ្មែរឥស្លាមម្នាក់ ត្រូវកម្លាំងនគរបាលចាប់ឃាត់ខ្លួនរួចបញ្ជូនទៅតុលាការពាក់ព័ន្ធនឹងការបើកកន្លែងលេងល្បែងស៊ីសង។
ប្រធានការិយាល័យនគរបាលព្រហ្មទណ្ឌកំរិតស្រាល ខេត្តសៀមរាប លោកវរៈសេនីយ៍ទោ
ភឹង ចន្តារ៉េត បានឲ្យដឹងនៅព្រឹកថ្ងៃទី០៩ ខែធ្នូ នេះថា ការចាប់ឃាត់ខ្លួនជនបរទេសទាំង បីនាក់នេះបានធ្វើឡើងកាលពីវេលាម៉ោង២៣និង០០នាទី យប់ថ្ងៃទី០៧ ខែធ្នូ ឆ្នាំ២០១៥ នៅផ្សារភ្ញាជ័យ ភូមិភ្ញាជ័យ សង្កាត់ស្វាយដង្គំ ក្រុងសៀមរាប។ លោកបន្តថា ក្នុងចំណោមជនទាំងបីនាក់ មានពីរនាក់ជាជនជាតិម៉ាឡេស៊ី គឺឈ្មោះ Sya Didy Binsallehuddin ភេទប្រុស អាយុ៣២ឆ្នាំ និងឈ្មោះ Goh Joo Sheng ភេទប្រុស អាយុ៣២ឆ្នាំ។ ចំណែកម្នាក់ទៀតឈ្មោះ នី សុហ្វ្រី ភេទប្រុស អាយុ៣០ឆ្នាំ ជាខ្មែរឥស្លាម។
លោកភឹង ចិន្តារ៉េត បន្តថា ៣នាក់ក្នុងចំណោម១នាក់ក្រោយពេលធ្វើតេស្ត ឈ្មោះGOH JOOS SHENG ភេទប្រុស ជាជនជាតិម៉ាឡេស៊ី មានសារធាតុញៀន(ប្រភេទមេតំហ្វេតាមីន)ការចាប់ខ្លួនអ្នកទាំងបីនេះ ដោយសារពួកគេជាប់ពាក់ព័ន្ធ នឹងការបើកកន្លែងលេងល្បែងស៊ីសងខុសច្បាប់ ប្រភេទហ្គេមបាញ់ត្រី ។ លោកបន្តថា បន្ទាប់ពីចាប់ឃាត់ខ្លួន អ្នកទាំងបីនិងវត្ថុតាងត្រូវបានបញ្ជូនទៅតុលាការនៅរសៀលថ្ងៃទី០៩ ខែធ្នូឆ្នាំ២០១៥នេះដើម្បីចាត់ការតាមច្បាប់៕
ដោយ ខេង ឧត្តម
