ខេត្តកំពង់ឆ្នាំង៖ ច្បាប់ចរាចរណ៍ផ្លូវគោកថ្មី ដែលត្រូវអនុវត្តចាប់ផាកពិន័យ១គុណនឹង៥ដងចាប់ពីថ្ងៃទី០១ ខែមករា ឆ្នាំ២០១៦ទៅ ត្រូវបានសមត្ថកិច្ចនគរបាលចរាចរណ៍ខេត្តនិងក្រុងកំពង់ឆ្នាំង ចុះទៅផ្សព្វផ្សាយបញ្ជ្រៀបដល់ប្អូនៗជាសិស្សានុសិស្សក្នុងវិទ្យាល័យក្រុងកំពង់ឆ្នាំងចំនួន
៣៥០នាក់ ក្នុងគោលបំណងអោយប្អូនៗយល់កាន់តែច្បាស់ពីច្បាប់ចរាចរណ៍ និងហានិភ័យនៃគ្រោះថ្នាក់ចរាចរណ៍។កម្មវិធីនេះបានប្រព្រឹត្តឡើងនៅព្រឹកថ្ងៃទី០៩ ខែធ្នូ ឆ្នាំ ២០១៥ នៅក្នុងវិទ្យាល័យក្រុងកំពង់ឆ្នាំង និងមានការចូលរួមពីអាជ្ញាធរក្រុង លោកនាយក លោកគ្រូអ្នកគ្រូនៅក្នុងវិទ្យាល័យក្រុងកំពង់ឆ្នាំងផងដែរ។
លោក ហង្ស ប៊ុនហាក់ អធិការរងនគរបាលក្រុងកំពង់ឆ្នាំងបានថ្លែងទៅកាន់សិស្សានុសិស្សថា៖ ករណីគ្រោះថ្នាក់ចរាចរណ៍ គឺជាឃាតករបិតមុខយ៉ាងសាហាវនៅលើផ្លូវថ្នល់ ដែលអ្នករងគ្រោះជាច្រើននាក់បានស្លាប់ជាបន្តបន្ទាប់រៀងរាល់ថ្ងៃ ដែលធ្វើអោយប៉ះពាល់ ដល់សេដ្ឋកិច្ចជាតិ និងគ្រួសារយ៉ាងធ្ងន់ធ្ងរ ហើយនៅក្នុងចំណោមអ្នករងគ្រោះទាំងនោះ ភាគច្រើនគឺជាយុវវ័យមានអាយុពី១៥ឆ្នាំដល់២៩ឆ្នាំ ទោះបីគ្រោះថ្នាក់ចរាចរណ៍ជាឃាតករបិតមុខក៍ដោយ តែយើងជាអ្នកប្រើប្រាស់ផ្លូវអាចជៀសវាងពីគ្រោះថ្នាក់ទាំងនេះបាន ដោយគ្រាន់តែយើងជាអ្នកបើកបរចេះគោរពច្បាប់ចរាចរណ៍គ្រប់ពេលវេលា។ នៅក្នុងថ្ងៃនេះការិយាល័យនគរបាលចរាចរ ណ៍ផ្លូវគោកខេត្តនិងក្រុង គឺមានបំណងបញ្ជ្រៀបចំណេះដឹងពីច្បាប់ចរាចរណ៍ផ្លូវគោកថ្មី ដល់ប្អូនៗសិស្សានុសិស្សក្នុងការបើកបរអោយមានសុវត្ថិភាពទាំងខ្លួនឯង និងអ្នកដទៃ គឺបានន័យថាបញ្ជៀសរាល់គ្រោះថ្នាក់ចរាចរណ៍ដល់ខ្លួន នៅលើផ្លូវជាតិតែម្តង។
ដោយឡែកលោក ឈឹម សារុន នាយការិយាល័យចរាចរណ៍ផ្លូវគោកបានអោយដឹងថា៖ នៅក្នុងឆ្នាំ២០១៥នេះ ខេត្តកំពង់ឆ្នាំងមានករណីគ្រោះថ្នាក់ក្នុងឆ្នាំ២០១៥មានការថយចុះ ដោយគ្រោះថ្នាក់ចរាចរណ៍កើតឡើងចំនួន១២៤ករណី បើធៀបនឹងឆ្នាំ២០១៤ គឺថយចុះ១០៦ករណី បណ្តាលអោយមានអ្នកស្លាប់ចំនួន៦៩នាក់ ថយចុះជាងឆ្នាំ២០១៤ ចំនួន៣៤នាក់, បង្ករអោយខូចខាតយានយន្តចំនួន៣៣៩គ្រឿង ថយចុះជាងឆ្នាំ២០១៤ចំនួន២១៨គ្រឿង។ តែទោះបីគ្រោះថ្នាក់ចរាចរណ៍ និងអ្នកស្លាប់មានការថយចុះក៍ដោយ ក៍ការិយាល័យនគរបាលចរាចរណ៍ផ្លូវគោកខេត្តកំពង់ឆ្នាំងនៅតែធ្វើការបញ្ជ្រៀបច្បាប់ចរាចរណ៍ដល់សិស្ស ប្រជាពលរដ្ឋ អ្នកបើកបររថយន្តដឹកម្មករ និងអ្នកប្រើប្រាស់ផ្លូវទាំងអស់ ត្រូវចូលរួមកាត់បន្ថយករណីគ្រោះថ្នាក់ចរាចរណ៍នៅក្នុងខេត្តកំពង់ឆ្នាំងអោយមានកំរិតទាបបំផុត៕
