សៀមរាប ៖ ជនសង្ស័មួយក្រុមបន្លំខ្លួនធ្វើជាចូលទិញមួកសុវត្ថិភាពនិងកាតទូរស័ព្ទពីហាងប្តូរប្រាក់មួយកន្លែង រួចឆ្លៀតឧិកាសលួចយកលុយពីជនរងគ្រោះអស់ជិតមួយម៉ឺនដុល្លា។
អនុសេនីយ៍ឯកអ៊ុយ ចយ នាយការិយាល័យបទល្មើសព្រហ្មទណ្ឌ នៃកងរាជអាវុធហត្ថខេត្ត
សៀមរាប បានឲ្យដឹងថា កាលពីវេលាម៉ោង ៧និង៤០នាទី ព្រឹកថ្ងៃទី១៤ខែធ្នូ ឆ្នាំ២០១៥ មានជនល្មើសមួយក្រុមមានគ្នាបួននាក់ក្នុងនោះមានស្រីម្នាក់ បានបន្លំខ្លួនចូលទៅទិញមួកសុវត្ថិភាព ប្តូរប្រាក់នៅហាងប្តូរប្រាក់យីហោ ជីនលី ដែលស្ថិតនៅក្នុងភូមិតាភុល សង្កាត់ស្វាយដង្គុំ ក្រុងនិងខេត្តសៀមរាប ។ លោកន្តថា ក្នុងពេលនោះពួកជនសង្ស័យទាំងនោះបានលួចយកប្រាក់ និងកាតទូរស័ព្ទរបស់ជនរងគ្រោះ ដែលសរុបអស់ជិតមួយម៉ឺនដុល្លាអាមេរិក។
ជនរងគ្រោះនៅក្នុងអំពើលួចនោះមានឈ្មោះ មឿន ស្រីផល អាយុ៣៥ឆ្នាំ មានទីលំនៅកន្លែងកើតហេតុខាងលើ។ ជនរងគ្រោះបានប្រាប់សមត្ថកិច្ចថា ទ្រព្យសម្បត្តិដែលជនល្មើសលួចទៅនោះ មានប្រាក់ដុល្លាចំនួន៦០០០ដុល្លា ប្រាក់រៀលចំនួនប្រាំមួយលានរៀល និងកាតទូរស័ព្ទប្រមាណជា២០០ដុល្លា។
លោកអនុសេនីយ៍ឯក អ៊ុយ ចយ ឲ្យដឹងបន្តទៀតថាករណីនេះខាងសមត្ថកិច្ចកំពុងធ្វើការស្រាវជ្រាវ ដើម្បីចាប់ជនសង្ស័យមកផ្តន្ទាទោសតាមច្បាប់៕
វេហាស៍
