សៀមរាប៖សិស្សានុសិស្សប្រមាណជិត៤០នាក់ ដែលរៀននៅវិទ្យាល័យគោកដូង ក្នុងឃុំគោកដូង ស្រុកអង្គរជុំ ខេត្តសៀមរាប បានកើតរោគចម្លែកដោយពួកគេបានស្រែកទ្រហោរយំទាំងមិនដឹងហេតុ ហើយករណីនេះត្រូវបានអ្នកភូមិ និងអាណាព្យាបាលសិស្សដាក់ការសង្ស័យថា
ជាអំពើរបស់ព្រាយបីសាច។
ស្ត្រីឈ្មោះមាស ណាស៊ី រស់នៅភូមិគោកដូង ដែលកូនស្រីរបស់គាត់មានអាការៈចម្លែកនេះដែរ បាននិយាយថា កូនរបស់គាត់បានកើតមានអាការៈចម្លែក ដោយស្រែកយំទន់ខ្លួនកាលពីថ្ងៃទី១៣ខែធ្នូកន្លងទៅ។ ស្ត្រីរូបនេះបន្តថា ដោយឃើញបែបនេះគាត់បានយកកូនទៅឲ្យគ្រូស្រោចទឹក។
ស្ត្រីមាស ណាស៊ី បន្តថា លុះមកដល់ព្រឹកថ្ងៃទី១៥ នេះខាងសាលា បាននិមន្តលោកសូត្រមន្តក៏ស្រាប់តែកូនគាត់និងសិស្សដទៃផ្សេងទៀតចាប់ផ្តើម យំទៀតកាន់តែខ្លាំង។
បើតាមការសាកសួរអ្នកភូមិនិងលោកនាយកវិទ្យាល័យគោកដូង បានឲ្យដឹងស្រដៀងគ្នាពីសភាពសិស្សថា ពួកគាត់បានសាកសួរទៅកូនសិស្សទាំងនោះអំពីមូល ហេតុដែលនាំឲ្យពួកគេយំ ពួកគេប្រាប់ថា មិនដឹងទេ គ្រាន់តែធ្ងន់ក្បាលហើយចង់យំ។
បើតាមការពីលោកតា ធាម អាយុ ៧៥ឆ្នាំ រស់នៅជិតវិទ្យាល័យ កើតហេតុខាងលើ និងជាអ្នកដែលត្រូវបានអ្នកភូមិពឹងពរឲ្យជួយស្រោចទឹកដល់ សិស្សានុសិស្សទាំងនោះ បានមានប្រសាសន៍ឲ្យដឹងថា តាំងពីកកើតសាលានេះ មិនដែលមានកើតហេតុដូច្នេះទេ ។
លោកតា ធាម បន្តទៀតថា ដោយនៅជិតសាលានោះគឺជាទួលបុរាណ ហើយចម្ងាយមួយម៉ែត្រពីសាលាមានប្រសាទបុរាណមួយដែលអ្នកភូមិហៅថាគោគដូន លោកកតាបញ្ជាក់នេះជាជំនឿដោយធ្វើសាលាមិនបានសុំម្ចាស់ទឹកម្ចាស់ដីឲ្យបាបត្រឹមត្រូវ។
ចំណែកនាយកវិទ្យាល័យគោកដូង លោក សុខ ស៊ីផា ក៏បានឲ្យដឹងដែរថា សិស្សានុសិស្ស ក្នុងសាលារបស់លោកបានកើតមានអាការៈចម្លែក នេះតាំងតែពីថ្ងៃ១១ ខែធ្នូមកម្ល៉េះ តែមានចំនួនប្រមាណជាដប់នាក់ទេ។ លោកបន្តថា ដោយឃើញដូច្នេះអាណា ព្យាបាលសិស្សខ្លះក៏បាននាំគា្នយកកូនទៅពេទ្យ និងខ្លះនាំយកទៅរកគ្រូខ្មែរដើម្បីស្រោចទឹក តែទោះជាយ៉ាង នេះក្តីក៏ហេតុការណ៍ចម្លែកនេះនៅតែកើតបន្តបន្ទាប់។
ដោយឃើញដូច្នេះអ្នកស្រុក និងលោកគ្រូអ្នកគ្រូក៏បាននាំគ្នារៀបចំពិធីសែនព្រេន និងនិមន្តលោកមកសូត្រមន្ត ប៉ុន្តែក្នុងពេលដែលព្រះសង្ឃ កំពុងសូត្រធម៌នោះ ក៏ស្រាប់តែកូនសិស្សទាំងនោះនាំគ្នាស្រែកយំកាន់តែច្រើនឡើងរហូតដល់ជិត៤០នាក់ ក្នុងនោះមានសិស្សប្រុសតែម្នាក់គត់។
ចំពោះហេតុការណ៍ចម្លែកនេះ ទាំងនាយកសាលានិងប្រជាពលរដ្ឋ បាននាំគ្នាសន្និដ្ឋានថា ជាអំពើរបស់ព្រាយបីសាច ដូច្នេះហើយបានជាពួកគាត់បាននាំគ្នារៀបចំពិធីសែនព្រេនដល់ខ្មោចព្រាយទាំងនោះ៕
ដោយ វេហាស៍
