បន្ទាយមានជ័យ ៖ យុវជនម្នាក់បានស្លាប់ និងម្នាក់ទៀតបានរងរបួសធ្ងន់បន្ទាប់ពីរថយន្តកែច្នៃដឹកទឹកកក បើកបត់មិនប្រយ័ត្នបុកម៉ូតូ កាលពីព្រឹកថ្ងៃទី១៤ ធ្នូ ២០១៥ នៅតាមបណ្តោយផ្លូវជាតិលេខ៥ ស្ថិតក្នុងភូមិសាលាដែន ឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ ។
លោក ផុន ទីណូ នាយរងផ្នែកសណ្តាប់ធ្នាប់នៃអធិការស្រុកមង្គលបូរី បានអោយដឹងថា គ្រោះថ្នាក់ចរាចរខាងលើកើតឡើងបណ្តាលមកពីរថយន្តកែច្នៃដឹកទឹកកកពណ៌ខៀវមួយគ្រឿងគ្មានស្លាកលេខ បើកបរដោយឈ្មោះ ចៅ យឺន ភេទប្រុស អាយុ៥២ឆ្នាំ ក្នុងទិសដៅពីកើតទៅលិច លុះដល់ចំនុចកើតហេតុក៏បត់ឆ្វេងចូលរោងចក្រផលិតទឹកកក ស្របពេលនោះមានម៉ូតូ១គ្រឿងម៉ាកហុងដា ស្គុបពី ពណ៌ក្រហមលាយសរ ពាក់ស្លាកលេខ បន្ទាយមានជ័យ 1G 1861 ជិះគ្នា២នាក់បោះពួយយ៉ាងលឿនស្របទិសគ្នា ចាប់ហ្វ្រាំងមិនជាប់ទៅបុកកាងមុខខាងឆ្វេងរថយន្តខាងលើ បណ្តាលអោយអ្នកបើកម៉ូតូឈ្មោះ ថា ធី ភេទប្រុស អាយុ២០ឆ្នាំ រងរបួសធ្ងន់បាក់ឆ្អឹងដើមដៃខាងឆ្វេង និងអ្នករួមដំណើរម្នាក់ទៀតឈ្មោះ ថា តាន ភេទប្រុស អាយុ១៥ឆ្នាំ ស្លាប់នៅហ្នឹងកន្លែង ។
ក្រោយកើតហេតុ សមត្ថកិច្ចបានឃាត់ខ្លួនអ្នកបើករថយន្តបង្ករ ហើយទាំងរថយន្ត និងម៉ូតូត្រូវបានសមត្ថកិច្ចនគរបាលស្រុកមង្គលបូរីនាំយកមករក្សាទុកនៅអធិការស្រុកមង្គលបូរីដើម្បីចាត់ការតាមនីតិវិធី ចំណែកជនរងគ្រោះត្រូវបាននាំយកទៅសង្គ្រោះនៅមន្ទីរពេទ្យបង្អែកមិត្តភាពកម្ពុជា-ជប៉ុនស្រុកមង្គលបូរី រីឯសបជនរងគ្រោះត្រូវបក្រុមគ្រួសារយកទៅធ្វើបុណ្យតាមប្រពៃណី ៕
