ភ្នំពេញ ៖គ្រោះថ្នាក់ចរាចរមួយបានកើតឡើងដោយសារការបើកបរខ្វះការប្រុងប្រយ័ត្ន និងមិនចេះ អាធ្យាស្រ័យអោយគ្នាទៅវិញទៅមក បណ្ដាអោយបុរស២នាក់រងរបួសស្រាលខណៈដែលជិះម៉ូតូ មិនប្រយ័ត្នបុកចំរថយន្តតាក់ស៊ីមួយគ្រឿងកំពុងបត់ឆ្វេងចំណុចផ្លូវបែកជាបួន បង្កអោយរងការខូចខាត ទាំងសងខាង។ ប្រភពព័តមានពីកន្លែងកើតហេតុបានអោយដឹងថា គេបានឃើញបុរស២នាក់ជិះម៉ូតូសង់ឌ្រីមC125 ១គ្រឿង ស៊េរី២០១៤ពណ៌ខ្មៅ ពាក់ស្លាកលេខ ភ្នំពេញ 1BW-5699 ធ្វើដំណើរតាមផ្លូវព្រះសីហនុ ក្នុងទិសដៅពីលិចទៅកើតលុះមកដល់ចំណុចកែងផ្លូវលេខ១០៥មិនប្រយ័ត្នក៏បានជ្រុលទៅបុក
រថយន្តតាក់ស៊ីម៉ែតរបស់ក្រុមហ៊ុនមហាកំផែង១គ្រឿង ពាក់ស្លាកលេខ ភ្នំពេញ 2X-9985 ចំពីជំហៀង ផ្នែកខាងស្ដាំងពេញទំហឹងបណ្តាលឲ្យម៉ូតូនិងរថយន្តរងការខូចខាតទាំងសងខាង។ ហេតុការណ៍នេះបានកើតឡើងកាលពីវេលាម៉ោង១០និង២០នាទីយប់ថ្ងៃទី១២ខែកុម្ភៈឆ្នាំ២០១៤
ត្រង់ចំណុចផ្លូវបែកជាបួន ស្ថិតក្នុងសង្កាត់បឹងកេងកងទី២ ខណ្ឌចំការមន។ ក្រោយពេលកើតហេតុភាគីទាំងសងខាងប្រកែកគ្នាយកត្រូវរៀងខ្លួន ហើយសមត្ថកិច្ចក៏បានចុះមក អន្តរាគមន៍ភ្លាមៗផងដែរទើបសម្រេចបញ្ចប់រឿងដោយភាគីទាំងសងខាងសុខចិត្តយកម៉ូតូនិងរថយន្តទៅជួសជុលដោយខ្លួនឯង៕ 
