ខេត្តសៀមរាប៖ កាលពីចុងសប្តាហ៏កម្លាំងការិយាល័យបទល្មើសព្រហ្មទណ្ឌកងរាជអាវុធហត្ថខេត្តបានចុះប្រត្តិបត្តិការបង្ក្រាបករណីល្បែងស៊ីសងខុសច្បាប់(ឆ្នោតយួន)មួយកន្លែង នៅក្នុងក្រុងសៀមរាប។
ហេតុការចុះបង្ក្រាបល្បែងស៊ីសងខុសច្បាប់(ឆ្នោត)មួយកន្លែងកាលពីវេលាម៉ោង២និង៣០នាទីរសៀលថ្ងៃទី២៦ខែធ្នូឆ្នាំ២០១៥ស្ថិតនៅពីខាងលិចផ្សារសម្តេចតេជោដើមក្រឡាញ់ ក្នុង ភូមិទក្សិណត្បូង សង្កាត់គោកចក ក្រុងសៀមរាប ដឹកនាំបញ្ជាផ្ទាល់ ដោយលោក ថា ដាលុច ប្រធានមន្ទីរយុត្តិធម៌ កងរាជអាវុធហត្ថខេត្ត។
លោកវរសេនីយ ថា ដាលុច ប្រធានមន្ទីរយុត្តិធម៌ កងរាជអាវុធហត្ថខេត្តបានប្រាប់ថា ក្នុងការចុះបង្ក្រាបករណីល្បែងស៊ីសងខុសច្បាប់ខាងលើនេះ គឺយោងតាមបទបញ្ជាលោក ឧត្តមសេនីយត្រី ប៉ោ វណ្ណនិត មេបញ្ជាការកងរាជអាវុធហត្ថខេត្តបានឱ្យកម្លាំងក្រោមឱវាទ ចុះប្រត្តិបត្តិការរហូតឈានដល់ធ្វើការឃាត់ខ្លួនបានជនញៀនល្បែងនិងមេកន្ទុយលេខ ប្រុស ស្រី ចំនួន៤នាក់ រួចបញ្ជូនមកកាន់ទីបញ្ជាការកងរាជអាវុធហត្ថខេត្តដើម្បីធ្វើការសួរនាំ។លោកបន្តថា ក្រោយពីធ្វើការឃាត់ខ្លួនបានអ្នកញៀនល្បែង(ឆ្នោត)និងមេឆ្នោត ខាងលើ មានទី១/ឈ្មោះ
ចាន់ ប៊ុនថង ភេទប្រុស អាយុ ៣៥ឆ្នាំ (មេឆ្នោត)រស់នៅភូមិទក្សិណត្បូង សង្កាត់គោកចក ក្រុងសៀមរាប ទី២/ ឈ្មោះ ទៀង ទីណុច ភេទប្រុស អាយុ៣០ឆ្នាំ (អ្នកចាក់)ស្នាក់នៅភូមិទក្សិណត្បូង សង្កាត់គោកចក ក្រុងសៀមរាប ទី៣/ឈ្មោះ ក្រូច ស្រីញ្ញា ភេទស្រី អាយុ២១ឆ្នាំ(អ្នកចាក់) រស់នៅភូមិវាល សង្កាត់គោកចក ក្រុងសៀមរាប និងទី៤/ ឈ្មោះ មាស កុសល ភេទស្រីអាយុ៣១ឆ្នាំមានទីលំនៅភូមិសាលាកន្សែង សង្កាត់ស្វាយដង្គំ ក្រុងសៀមរាប(អ្នកចាក់) ព្រមទាំងដកហូតបានវត្ថុតាងរួមមានៈអាញ្ញាប័ណ្ណ បើកឱ្យលក់ឆ្នោតខ្មែរចំនួន១សន្លឹក,ទូរស័ព្ទដៃចំនួន១គ្រឿង,ទូរស័ព្ទដៃសម្រាប់មើលលេខឆ្នោតចំនួន១គ្រឿង,ប្រាក់ខ្មែរចំនួន១លាន៥៣ម៉ឺនរៀល,ប្រាក់ដុល្លារចំនួន១២៨ដុល្លារ,និងសម្ភារៈសម្រាប់កត់ឆ្នោតមួយចំនួនផងដែរ។
លោកបានបញ្ជាក់ទៀតថា បច្ចុប្បន្នកម្លាំងជំនាញរបស់ការិយាល័យបទល្មើសព្រហ្មទណ្ឌកងរាជអាវុធហត្ថខេត្តកំពុងរៀបចំសំណុំរឿងបញ្ជូនទៅតុលាការនៅថ្ងៃទី២៧ខែធ្នូឆ្នាំ២០១៦ ដើម្បីចាត់ការតាមនិតិវិធីច្បាប់៕
