សៀមរាប៖ ប្រជាពលរដ្ឋមកពីសង្កាត់អំពិល ក្រុងសៀមរាប ប្រមាណជាង១០០នាក់ បានលើកគ្នាមកកាន់តុលាការសាលាដំបូងខេត្ត ដើម្បីសុំឲ្យស្ថាប័ននេះដោះលែងចៅសង្កាត់ របស់ពួកគេ។
ការតវ៉ានេះពលរដ្ឋប្រមាណជាង១០០នាក់បានធ្វើឡើងកាលពីរសៀលថ្ងៃទី៣១ ធ្នូ នៅមុខសាលាដំបូងខេត្តសៀមរាប។
ចៅសង្កាត់អំពិល គឺលោក ហ៊ាង សារី ត្រូវបានតុលាការឃុំខ្លួនកាលពីព្រឹកថ្ងៃទី៣០ខែធ្នូ២០១៥ ក្រោមការចោទប្រកាន់ថាបានផ្ដល់ឯកសារដោយទុច្ចរិត និងពីបទសមគំនិតអំពើប៉ះពាល់ដល់សម្បត្ដិសាធារណៈ ករណីដីធ្លីនៅក្នុងតំបន់ឧទ្យានអង្គរ។
ប៉ុន្តែការចោទប្រកាន់នេះត្រូវបានច្រានចោលដោយប្រជាពលរដ្ឋ ដូច្នេះទើបពួកគាត់លើកគ្នាមកតវ៉ា។ ប្រជាពលរដ្ឋបានលើកឡើងថា លោកចៅសង្កាត់បានធ្វើតាមអ្វីដែលសម្តេច តេជោបញ្ជា។
តំណាងប្រជាពលរដ្ឋឈ្មោះ យិន សុគន្ធា បានថ្លែងថា លោក ហ៊ាង សារី ជាចៅសង្កាត់ល្អ ប្រជាពលរដ្ឋត្រូវការរូបលោកមកធ្វើជាចៅសង្កាត់បន្តទៀត។ ដូច្នេះប្រជាពលរដ្ឋសុំឲ្យតុលាការដោះលែងលោក ហ៊ាង សារី បាននៅក្រៅឃុំ។
គួរបញ្ជាក់ថា ការលើកគ្នាមកតវ៉ានេះ មិនមានការប៉ះទង្គិចណាមួយរវាងពលរដ្ឋ និងកម្លាំងសមត្ថកិច្ចទេ ហើយការតវ៉ាធ្វើបានប្រមាណជា៣០នាទី ក៏បានរំសាយបន្ទាប់ពីលោក វរសេនីយ៍ឯក ស្រី យូរ៉ា មេបញ្ជាការរងកងរាជអាវុធហត្ថខេត្តសៀមរាប បានធ្វើការណែនាំដល់ ប្រជាពលរដ្ឋឲ្យពួកគាត់នាំគ្នាផ្តិតមេដៃធ្វើជាសំណើដាក់ជូនតុលាការវិញ៕
វេហាស៍
