ព្រះវិហារ៖បែកធ្លាយព័ត៌មានអោយដឹងថាឈ្មួញទ្បាវនៅស្រុកមឿងខូងខេត្តចំប៉ាសាក់ជាប់ស្រុកឆែបខេត្តព្រះវិហារដែលមានព្រំដែនទឹកជាប់គ្នាត្រង់ច្រកទ្វារទន្លេល្ពៅកំពង់ស្រទ្បៅត្រូវការទិញឈើប្រណឹតបេងធ្នង់នាងនួនចំនួន១០០ម៉ែត្រគូបដែលឈើប្រណឹតទាំងនោះមាន
ប្រភពចេញពីតំបន់ព្រំដែនប្រាសាទព្រះវិហារ។
សេចក្ដីរាយការណ៍បានអោយដឹងថាមានក្រុមសមត្ថកិច្ចមួយក្តាប់តូចជាឈ្មួញឈើខិលខូចនៅខេត្តព្រះវិហារបានសំរុកដឹកឈើប្រណីតបេងធ្នង់នាងនួនចេញពីស្រុកជាំក្សាន្តទាំងយប់ទាំងថ្ងៃឆ្ពោះទៅកាន់ព្រំដែនទ្បាវតាមផ្លូវជាតិលេខ៩អស់រយះពេលជាង២ខែមកហើយរីឯសមត្ថកិច្ចគ្រប់ស្ថាប័នមិនបង្ក្រាប។ឆ្មាំឃ្លាំមើលបទល្មើសព្រៃឈើបានអោយដឹងថាមានរថយន្តម៉ាកសាំយ៉ុង២ទៅ៣គ្រឿងដឹកឈើប្រណីតពេញៗណែនជាញឹកញាប់ទៅកាន់ព្រំដែនទ្បាវកាងផ្តាច់មុខដោយក្រុមសមត្ថកិច្ចតាមដងផ្លូវជាតិលេខ៦២និងលេខ៩។
ប្រភពព័ត៌មានបន្តថារថយន្តល្មើសដឹកឈើប្រណីតទាំងនោះឆ្លងកាត់ពីមុខសង្កាត់រដ្ឋបាលព្រៃឈើកន្ទួតនិងផ្នែករដ្ឋបាលព្រៃឈើឆែបសរុបប្រមាណ៥០០ដងហើយប៉ុន្តែមិនដែលឃើញលោកជ័យរ៉េតនិងលោកគឹមជេតថាវីចាប់បង្ក្រាបទប់ស្កាត់បាន១ដងណាទ្បើយគឺសង្ស័យមានការឃុបឃិតនិងត្រូវរ៉ូវគ្នា។រីឯឈ្មួញឈើដុះស្លែម្នាក់ទៀតឈ្មោះគិតរស់នៅទីរួមស្រុកគូលែនដឹកឈើប្រណីតឈើលេខ១និងសន្លឹកទ្វារកែច្នៃចេញពីស្រុកត្បែងមានជ័យខេត្តព្រះវិហារយកទៅលក់នៅខេត្តសៀមរាបរាល់យប់ក៍សមត្ថកិច្ចមិនបង្ក្រាបអ្វីទាំងអស់។
លោកជ័យរ៉េតនាយសង្កាត់រដ្ឋបាលព្រៃឈើកន្ទួតបានអោយដឹងនៅព្រឹកថ្ងៃទី៣១ធ្នូ២០១៥ថាគាត់មិនបានដឹងពីឈ្មួញដឹកឈើនាងនួនកាត់តាមដែនសមត្ថកិច្ចរបស់គាត់ឆ្ពោះទៅកាន់ស្រុកឆែបដើម្បីលក់អោយឈ្មួញទ្បាវជាប់ព្រំដែននោះទេ។ដោយទ្បែកនៅពេលថ្មីៗនេះគាត់ចាប់បានរថយន្តសាំយ៉ុង១គ្រឿងដឹកឈើលេខ១ដើម្បីបង់ប្រាក់ផាកពិន័យហើយរថយន្តល្មើសកំពុងរក្សាទុកនៅទ្បើយ។លោកជ័យរ៉េតនិយាយថាម្ចាស់វត្ថុតាងឈើនោះជាទាហាន។
ក្រៅពីឈើប្រណីតបេងធ្នង់នាងនួនសំរុកដឹកយកទៅលក់អោយឈ្មួញទ្បាវគឺមានឈើគ្រញូងក៍ឈ្មួញដុះស្លែនៅខេត្តព្រះវិហារនិងមកពីខេត្តកំពង់ធំសំរុកដឹកចេញពីខេត្តព្រះវិហារឆ្ពោះទៅកាន់ខេត្តកំពង់ធំនិងខេត្តស្ទឹងត្រែងជារៀងរាល់យប់ថែមទៀតហើយតាមពាក្យចចាមអារ៉ាមអោយដឹងថាឈ្មួញត្រូវការប្រមូលទិញអោយបានឈើគ្រញូងប្រមាណ២០០ម៉ែត្រគូបដែលមានប្រភពចេញពីព្រំដែនប្រាសាទព្រះវិហារតាមរយះក្រុមឈ្មួញវៀតណាមប្រចាំខេត្តត្បូងឃ្មុំ។
ដោយទ្បែកប្រភពព័ត៌មានក្រៅផ្លូវការបានអោយដឹងនៅថ្ងៃនេះថាឈ្មោះដាណេអតីតឈ្មួញឈើម្នាក់នៅខេត្តព្រះវិហារដែលបានជាប់ឃុំពន្ធនាគារនៅខេត្តកំពង់ធំកន្លងមកឥទ្បូវបានចេញវិញហើយៗគាត់នៅតែប្រកបមុខរបរដឹកឈើដដែល។លោកដាណេឆ្លើយប្រាប់ថាគាត់ដឹកឈើបន្តិចបន្តួចប៉ុណ្ណោះតាមរថយន្តស្តារិចពណ៌ស៕
