សៀមរាប៖ លោកសៀង ណាំ សមាជិកសភាមណ្ឌលសៀមរាប ក្នុងនាមសាកលវិទ្យាធិការនៃសាកលវិទ្យាល័យអង្គរ មានប្រសាសន៍ថា ៖ គ្រាន់តែមានជំនាញជាអ្នកបើកបររថយន្ត ក៏ដូចជាជំនាញ ជាអ្នកបកប្រែភាសា វាមិនគ្រប់គ្រាន់នោះទេ ក្នុងការយកជំនាញរបស់ខ្លួនចូលបំរើក្នុង
សេវាកម្មទេសចរណ៍ បើសិនជាមិនបានឆ្លងកាត់ការបណ្តុះបណ្តាលជំនាញបដិសណ្ឋារកិច្ច នោះ ។ ឯកឧត្តមបានសង្កត់ធ្ងន់ថា ការទទួលយកជំនាញបដិសណ្ឋារកិច្ច វាគឺជាចំណែកមួយ ធ្វើឲ្យវិជ្ជាជីវៈរបស់ខ្លួនកាន់តែប្រសើរឡើង និងបានជួយគាំទ្រ ឲ្យមានកំណើនភ្ញៀវទេសចរ ។
លោក សៀង ណាំ មានប្រសាសន៍យ៉ាងដូច្នេះ នៅក្នុងពិធីប្រគល់វិញ្ញាបនបត្របញ្ចប់វគ្គជំនាញបដិសណ្ឋារកិច្ច ជូនដល់សិក្ខាកាមដែលជាសមាជិករបស់សមាគមអ្នកបើកបររថយន្តដឹកជញ្ជូនភ្ញៀវទេសចរប្រចាំអាកាសយានដ្ឋានអន្តរជាតិសៀមរាប ចំនួន៣វគ្គ ស្មើនឹង៣២៤នាក់ និង សិក្ខាកាមអ្នកបកប្រែភាសាកូរ៉េ វគ្គទី៥ ចំនួន ១១៦នាក់ ។ ពីធីប្រគល់វិញ្ញាបនបត្របញ្ជាក់់ការសិក្សានេះ បានធ្វើឡើងនាយប់ថ្ងៃទី៣០ ខែធ្នូ នៅសាកលវិទ្យាល័យអង្គរខេត្តសៀមរាប ហើយកិច្ចដំណើរការនៃវគ្គសិក្សានេះ គឺស្ថិតក្រោមកិច្ចព្រមព្រៀង ( MOU ) រវាងក្រសួងទេសចរណ៍ ជាមួយ សាកលវិទ្យាល័យអង្គរ និងមានការគាំទ្រដោយរដ្ឋបាលសាលាខេត្តសៀមរាប ។
លោក ឃឹម ប៊ុនសុង អភិបាលខេត្តសៀមរាប រំលឹកបន្ថែមថា៖ វគ្គបណ្តុះបណ្តាលនេះ វាបាននាំមកនូវការពង្រឹងសេវាកម្ម ឆ្លើយតបចំពោះសេចក្តីត្រូវការរបស់ភ្ញៀវ តាមស្តង់ដារអប្បមា ដែលអាចទទួលយកបាន ។ សិក្ខាកាមជាអ្នកបើកបរ និងអ្នកបកប្រែភាសារកូរ៉េ ដែលបានចូលរួមក្នុងវគ្គបំប៉ននេះ ទទួលបានជំនាញនិងបំណិនជាងមុន ហើយដែលប្រសើរជាងនេះ គឺបានស្វែងយល់ថែមទៀត អំពីគោលការណ៍ យន្តការ និងរបៀបរបបការងារផ្សេងៗទៀត ក្នុងនាមជាពលរដ្ឋខ្មែរដែលមានវប្បធម៌ អរិយធម៌ ដ៏ឧត្តុងឧត្តមរបស់ខ្ខួន ។ លោក បានបង្ហាញថា ៖ ការធ្វើឲ្យវិស័យទេសចរណ៍មានការរីកចម្រើន គឺបានរួមចំណែកដល់ការអភិវឌ្ឍន៍សេដ្ឋកិច្ចសង្គម ក្នុងយុគសម័យសាកលភាវូបនីយកម្ម ដែលកម្ពុជា បានត្រៀមខ្លួនរួចជាស្រេច សម្រាប់ការធ្វើសមាហរណកម្មសេដ្ឋកិច្ចអាស៊ាន ៕
