ខេត្តកំពង់ឆ្នាំង៖ ផ្ទះប្រជាពលរដ្ឋ៣ខ្នងនៅតាមមាត់ទន្លេសង់ជាប់ៗគ្នាត្រូវបានភ្លើងឆេះអស់ ដោយមានម្ចាស់ផ្ទះម្នាក់ឆ្អើរត្រីចោលធ្វេសប្រហែសនៅពេលយប់បង្កអោយមានអគ្គីភ័យ ហេតុការណ៍នេះបានកើតឡើងនៅម៉ោង១០យប់ថ្ងៃទី០១ ខែមករា ឆ្នាំ២០១៦ នៅក្នុងភូមិទន្លេ
ក្រៅ ឃុំជលសារ ស្រុកជលគីរី លោក ហ៊ីម យ៉ុង អធិការនគបាលស្រុកជលគីរីបានអោយនៅថ្ងៃទី០២ ខែមករានេះថា៖ ម្ចាស់ផ្ទះដែលបង្កអោយមានគ្រោះអគ្គីភ័យមានឈ្មោះ ទុយ ម៉ៅ ភេទប្រុស អាយុ៦០ឆ្នាំ រស់នៅក្នុងភូមិ ឃុំ ខាងលើ ចំណែកផ្ទះ២ផ្សេងទៀតជាផ្ទះដែលគេសង់អោយគ្រូបង្រៀនស្នាក់នៅ ដែលមកពីមូលដ្ឋានឆ្ងាយ ។
លោកអធិការបានអោយដឹងបន្ថែមទៀតថា៖ មុនពេលកើតហេតុផ្ទះបង្ករបស់ឈ្មោះ ទុយ ម៉ៅ មានស្តុកត្រីឆ្អើរជាច្រើន ហើយបានដុតភ្លើងបង្ហុយឆ្អើរត្រី ស្រាប់តែបានឆាបឆេះកន្លែងត្រីឆ្អើរនោះ និងបានរាលដាលឆេះបន្តទៅផ្ទះគ្រូបង្រៀនស្នាក់នៅអស់គ្មានសល់ ។ គ្រោះអគ្គឺភយ័នេះបណ្តាលអោយរងការខូចខាតផ្ទះ៣ខ្នងបានឆេះទាំងស្រុង ម៉ាស៊ីនសាំង២គ្រឿង ម៉ាស៊ីនម៉ាស៊ុត១គ្រឿង ស្រូវពូជ៨០០គីឡូក្រាម ម៉ូតូ១គ្រឿង លុយរបស់លោកគ្រូ៥៤០ដុល្លា និងប្រាក់រៀល៨០ម៉ឺន ផ្លាកទីន៤ជី អាគុយ១គ្រឿង ។
ទាក់ទងនិងការឆេះផ្ទះនេះសមត្ថកិច្ចបានសន្និដ្ឋានថា បណ្តាលមកពីម្ចាស់ដុះភ្លើងបង្ហុយត្រីឆ្អើរមានការធ្វេសប្រហែស និងប្រហែលជាម្ចាស់ផ្ទះដេកលក់មិនបានដឹងផង ទើបបានជាឆេះរាលដាលដល់ផ្ទះស្នាក់នៅរបស់គ្រូៗទៀត ហើយនៅតំបន់នេះឆ្ងាយដែលពិបាកក្នុងការជួយពន្លត់ ។
លោកអធិការបានធ្វើការអំពាវនាវដល់បងប្អូនប្រជាពលរដ្ឋទាំងអស់សូមមេត្តា ប្រុងប្រយត្ន័អោយបានខ្ពស់ចំពោះគ្រោះអគ្គឺភ័យ ដោយយមុននិងចាកចេញពីផ្ទះ ត្រូវពិនិត្យមើលភ្លើងចង្ក្រាន និងបិទបារ៉ែតភ្លើងជាមុនសិន ដើម្បីការពារកុំអោយមានគ្រោះអគ្គីភ័យដល់ផ្ទះរបស់ខ្លួននិងអ្នកដ៏ទៃ៕
