ខេត្តប៉ៃលិន៖ ប្រជាពលរដ្ឋដែលជាកសិករប្រកបរបរកសិកម្ម មានការត្អូញត្អែរយ៉ាងខ្លាំង ខណៈពេលដែលពួកគាត់ដល់ពេលប្រមូលផលដំឡូងមី បែរជាត្រួវបានឈ្មួញបញ្ចុះតំលៃទាប ធ្វើឲ្យពួកគាត់មានការខកចិត្តជាខ្លាំង ព្រោះតែការប្រកបរបរដាំដំឡូងមីក្នុងឆ្នាំនេះចុះដើមទុនច្រើន
។ ពលរដ្ឋបានរៀបរាប់ថាមានប្រជាពលរដ្ឋខ្លះដាំដំឡូងមីរហូតដល់ទៅ២ឬ៣ដងក្នុងមួយឆ្នាំ ព្រោះឆ្នាំនេះមានការរាំងស្ងួតច្រើន ហើយកន្លែងខ្លះភ្លៀងមិនសូវជាខ្លាំងទេ ប៉ុន្តែវារលួយ ប្រសិនបើទូទាត់ថ្លៃទុនចំណាយបានត្រឹមរួចខ្លួននិងខាតបង់ដើមទុនថែមទៀត។ ជាក់ស្តែងនៅថ្ងៃនេះដែរ ដំទ្បូងមីស្ងួតតំលៃ៤.៧បាត(ប្រាក់ថៃ) ស្មើប្រាក់័ខ្មែរប្រហែល៥០០រៀល ចំណែកដំឡូងស្រស់វិញតំលៃ១.៧បាត(ប្រាក់ថៃ) ស្មើលុយខ្មែរ២០០រៀល តែប៉ុណ្ណោះ ។ កសិករឈ្មោះអ៊ុក ទូច រស់នៅភូមិអូរអិល ឃុំស្ទឹងកាច ស្រុកសាលាក្រៅ បានរៀបរាបថា៖ នាខែប្រមូលផលដំឡូងមីឆ្នាំនេះ មិនថារូបគាត់ក៏ដូចជាប្រជាកសិកផ្សេងៗនៅតាមតំបន់ក្នុងខេ្តប៉ៃលិនទាំងមូលទេ សុទ្ធតែត្អូញត្អែរគ្រប់ៗគ្នា ព្រោះថាឆ្នាំនេះ តំលៃដំឡូងមីមានការធ្លាក់ចុះខ្លាំង ធ្វើឲ្យូបគាត់ក៏ដូចកសិករដទៃទៀត មានការខាត់បង់ដើមទុនច្រើនផងដែរ ។ សៃឡូអនុត្តរៈសាខាទី២នៅភូមិប៉ាងរលឹម លោក ជា ហោ អាយុ៧០ឆ្នាំ បានឲ្យដឹងថា៖ តំលៃដំឡូងមីក្នុងឆ្នាំនេះពិតជាមានការធ្លាក់ចុះមែន បើប្រៀបធៀបទៅឆ្នាំមុន ហើយបើតាមសំដីកសិករបានប្រាប់គាត់ថាដំឡូងក្នុងមួយហិកតាបានតែ១០តោនតែប៉ុណ្ណោះ ចំណែកមើមមិនសូវធំនោះទេ ។ លោកបន្តថា៖ បើនិយាយពីតំលៃប្រាកដជាធ្លាក់មែន តែមិនធ្លាក់ក្នុងស្រុកយើងនោះទេ គឺសូម្បីតែនៅប្រទេសជិតខាងក៏មានការធ្លាក់ចុះដែរ ។
ចំណែកកសិករនៅសង្កាត់អូរតាវ៉ៅ ក្រុងប៉ៃលិន បានរិៈគន់ថា៖ ការប្រមូលផលនៅដើមដៃឆ្នាំ២០១៥នេះឈ្មួញបន្ថោកតំលៃរហូតដល់៤.៧បាត(លុយថៃ)ស្មើលុយខ្មែរ៥០០រៀលក្នុង១គីទ្បូក្រាមធ្វើអោយកសិកររាប់រយគ្រួសារក្នុងសង្កាត់អូរតាវ៉ៅត្អូញត្អែរយ៉ាងខ្លាំង ព្រោះបើទូទាត់ថ្លៃទុនចំណាយបានត្រឹមរួចខ្លួននិងខាតបង់ដើមទុនថែមទៀត ។ ហើយប្រជាកសិករមួយចំនួនប្រើតែកំលាំងពលកម្មធ្វើស្រែចំការប្រមូលយកផលិតផលកសិកម្មទុកលក់អោយឈ្មួញជារៀងរាល់ឆ្នាំប៉ុន្តែចំណូលសេដ្ឋកិច្ចគ្រួសារនៅតែជួបការលំបាករីឯពួកឈ្មួញកាន់តែមានលុយទៅៗ។ ប្រភពបន្តថា៖ តំលៃកសិផលម្ដងថ្លៃម្តងថោកវាប្រែប្រួលតាមអំពើចិត្តជារៀងរាល់ឆ្នាំមិនមានលទ្ធភាពរក្សាលំនឹងតំលៃកសិផលជូនប្រជាកសិករខ្មែរនោះទេ។
ប្រភពព័ត៌មានពីមន្ដ្រីកសិកម្មខេត្តបានអោយដឹងថា៖ តំលៃដំទ្បូងមីនៅដើមដៃនេះពិតជាមានតំលៃធ្លាក់ចុះប្រាកដមែន ធៀបឆ្នាំ២០១៤រយះពេលដូចគ្នាវាមានតំលៃជិត៥៥០រៀលក្នុង១គីទ្បូក្រាម។មូលហេតុមកពីតំលៃទីផ្សារនៅថៃនិងវៀតណាមក៏មានការចុះថោកដែរ។ រីឯកសិករដាំដំទ្បូងមីនៅទូទាំងខេត្តប៉ៃលិន មានការសង្ស័យថាវាជាលេសភូតកុហករបស់ក្រុមឈ្មួញនៅខេត្តប៉ៃលិន ថាតំលៃដំទ្បូងមីនៅប្រទេសជិតខាងដូចជាវៀតណាមនិងថៃ ចុះថោកខ្លាំងនៅឆ្នាំនេះគឺតំលៃទីផ្សារក្នុងស្រុកស្រេចតែលើបបូរមាត់ឈ្មួញជាអ្នកកំណត់ នេះជាវប្បធម៌អាក្រក់ធ្វើស្រែលើខ្នងប្រជាកសិករខ្មែរគឺកេងប្រវ័ញ្ចញើសនិងឈាមគ្នាឯងមិនអោយកសិករស្លូតត្រង់ងើបមុខរួច ៕
