ស្ទឹងត្រែង៖កាលពីព្រឹកថ្ងៃទី៤ ខែមករា ឆ្នាំ២០១៦ ខេត្តស្ទឹងត្រែង បានរៀបចំពិធីមិទ្ទីញរំលឹកខួបអនុស្សាវរីយ៍ លើកទី៣៧ថ្ងៃជ័យជំនះ៧មករាឆ្នាំ១៩៧៩ ថ្ងៃ៧មករា ឆ្នាំ២០១៦។ពិធីនេះបានរៀបចំធ្វើនៅក្នុងភោជនីយដ្ឋានសុខសម្បត្តិក្រោមអធិបតភាពលោកឡូយ សុផាតអ្នកដំណាង
រាស្ត្រមណ្ឌុលស្ទឹងត្រែងសមាជិកនិងជាប្រធានក្រុមការងារថ្នាក់កណ្តាលចុះជួយខេត្តស្ទឹងត្រែង លោកម៉ុម សារឿនអភិបាលខេត្ត អភិបាលរងនៃគណៈអភិបាលខេត្ត ប្រធាននិងសមាជិកក្រុមប្រឹក្សាខេត្ត មន្ត្រីរាជការ កងកម្លាំងប្រដាប់អាវុធ ទាំង៣ប្រភេទ លោកគ្រូអ្នកគ្រូ សិស្សានុសិស្សប្រជាពលរដ្ឋចូលរួមជិត១០០០នាក់។
លោកឡូយ សុផាតអ្នកដំណាងរាស្ត្រមណ្ឌុលស្ទឹងត្រែងប្រធានកិត្តិយសគណបក្សប្រជាជនកម្ពុជាបានថ្លែងក្នុងមិទ្ទីញរំឭកខួបលើកទី៣៧នៃទិវាជ័យជំនះ៧មករា(៧.០១.១៩៧៩-៧.០១.២០១៦)។ ថ្ងៃនេះជាទិវាគម្រប់ខួបលើកទី៣៧នៃមហាជ័យជំនះជាប្រវត្តិសាស្ត្ររបស់ប្រជាជនកម្ពុជាលើរបបប៉ុលពត នាថ្ងៃ៧មករា ឆ្នាំ១៩៧៩ ដែលបានសង្គ្រោះជាតិឲ្យមានជីវិតឡើងវិញរួចផុតពីគ្រោះមហន្តរាយប្រល័យពូជសាសន៍ ដែលរបបដ៏ឃោរឃៅយង់ឃ្នងនេះបានបង្កឡើង។ផ្ដើមពីជ័យជំនះ៧មករានេះ ហើយដែលធ្វើឲ្យប្រជាជនកម្ពុជាមានអ្វីៗនៅថ្ងៃនេះ និងមានអនាគតប្រកបដោយក្ដីសង្ឃឹម។ខួបលើកទី៣៧នៃទិវាជ័យជំនះ៧មករា ឆ្នាំនេះប្រព្រឹត្តិទៅក្នុងស្ថានភាពដែលសភាពការណ៍ទូទៅនៃព្រះរាជាណាចក្រកម្ពុជាកំពុងមានការវិវត្តន៍ល្អលើគ្រប់វិស័យ។
លោកម៉ុម សារឿនអភិបាលនៃគណៈអភិបាលខេត្តស្ទឹងត្រែងបានរំឭកពីអតីតកាលថាកាលពីរបប៣ឆ្នាំ៨ខែ២០ថ្ងៃ កាលណោះហេដ្ឋារចនាសម្ព័ន្ធនានារបស់ខេត្ត ត្រូវរងការបំផ្លាញខ្ទេចខ្ទីគ្មានសល់ ប្រជាពលរដ្ឋត្រូវបានពួកអាវខ្មៅ គាបសង្កត់បិទសិទ្ធិសេរីភាព គ្មានការតវ៉ា ព្រមទាំងធ្វើទារុណកម្មកាប់សម្លាប់ប្រជាជនជាច្រើននៅក្នុងប្រទេស។ ថ្ងៃនេះយើងប្រារព្ធខួប លើកទី៣៧ថ្ងៃមហាជ័យជំនះ៧មករា ធ្វើឲ្យយើងទាំងអស់គ្នាបានរស់រានមានជីវិតឡើងវិញ ហើយមានការរីកចម្រើននូវហេដ្ឋារចនាសម្ព័ន្ធ លើគ្រប់វិស័យបែបនេះក៏ដោយគណបក្សប្រជាជនកម្ពុជាក្រោមការដឹកនាំប្រកបដោយគតិបណ្ឌិតពីសម្ដេចអគ្គមហាសេនាតេយ្យតេជោហ៊ុន សែនប្រមុខដឹកនាំប្រទេស។ លោកម៉ុម សារឿនបានសង្កត់ធ្ងន់ថាសូមឲ្យស្មារតី៧មករាដក់ជាប់ក្នុងបេះដូង មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋគ្រប់ៗរូបជាអមតៈ៕
