ខេត្តសៀមរាប៖ រយៈពេលកន្លងផុតទៅ២៧ឆ្នាំ របស់សិស្សរួមជំនាន់ឆ្នាំ១៩៨៨ នៃវិទ្យាល័យ១០មករា ១៩៧៩ដែល បានធ្វើឲ្យសិស្សគ្រប់រូបមិនអាចបំភ្លេចបាននូវការសិក្សាសកម្មភាពទាំងឡាយ ក្នុងអំឡុងពេលជាយុវវ័យនៃយុវសិស្សសាលាវិទ្យាល័យ ១០មករា១៩៧៩។ដោយ
ក្តីនឹករលឹកចំពោះលោកគ្រូ អ្នកគ្រូ និង អនុស្សាវរីយ៍ ដែលយើងមិនអាចបំភ្លេចបាន នូវគុណដ៏វិសេសវិសាលចំពោះលោកគ្រូអ្នកគ្រូ ដែលបានបង្ហាតបង្ហាញផ្តល់ នូវចំណេះវិជ្ជានិង ចំណេះដឹងជាមូលដ្ឋានគ្រឹះ បន្តរៀននៅថ្នាក់វិទ្យាល័យទំនើប ហើយបានយកទៅប្រើប្រាស់ ប្រកបមុខរបរមុខជំនួញតូចធំ និង ក្លាយជាថ្នាក់ដឹកនាំ ព្រមទាំងការជួបជុំមិត្តភ័ក្តរួមជំនាន់ផងនោះបានរួម សហការគ្នារៀបចំពិធីជួបជុំនេះឡើង នៅសណ្ឋាគារប៉ារ៉ាឌីស អង្គរ ខេត្តសៀមរាប កាលពីរសៀលថ្ងៃទី០៣ ខែ មករា ឆ្នាំ២០១៦ម្សិលមិញនេះក្រោមវត្តមានលោកស្រីស៊ិន ណមសមាជិកក្រុមប្រឹក្សាខេត្តសៀមរាបអតីតសាស្ត្រាចារ្យវិទ្យាល័យ ១០មករា ១៩៧៩ ព្រមទាំងលោកគ្រូអ្នកគ្រូ និង អតិសិស្សវិទ្យាល័យ១០មករា ប្រមាណជាង១០០នាក់ ដែលមកពីបណ្តាខេត្តនានា និងរាជធានីភ្នំពេញផងដែរ ។
ក្នុងបរិយាកាសដ៏ប្រពៃនេះ ក្រុមអតីតសិស្សទាំងអស់ ក៏បានធ្វើការសម្តែងនូវកត្តញ្ញូតាធម៌ ក្នុងការដឹង គុណដល់លោកគ្រូ អ្នកគ្រូ ដែលជាឳពុកម្តាយទី២ ក្នុងផ្តល់នូវចំណេះវិជ្ជា បណ្តុះបណ្តាល និង កែច្នៃដល់សិស្សយើងទាំងអស់គ្នាក្លាយជាធនធានមួយដ៏រឹងមាំក្នុងការកសាងអភិវឌ្ឍន៍ប្រទេស ព្រមទាំងកសាងនូវជីវភាពនៃក្រុមគ្រួសារឲ្យមានភាពសប្បូរសប្បាយ ហើយនេះក៏ជាគុណបំណាច់មួយដែលយើងគ្នាមិនអាចកាត់ថ្លៃបាន ហើយក៏ត្រូវបានកត់ត្រាទុកនៅក្នុងក្រអៅបេះដូងយើងគ្រប់គ្នាជានិច្ចជានិរន្តតរៀងទៅ ។
មានប្រសាសន៍នោះដែរ លោកស្រី ស៊ិន ណម ក្នុងនាមអតីតសាស្ត្រាចារ្យនៃសាលាវិទ្យាល័យ១០ មករា ១៩៧៩ បានសម្តែងនូវទឹកចិត្តរំភើបក្រៃលែង ចំពោះកូនៗជាអតីតសិស្សវិទ្យាល័យ១០មករា ដែលបាន ឃ្លាតទៅឆ្ងាយពីសាលា ២៧ឆ្នាំមកនេះ ដោយកូនៗទទួលបាននូវចំណេះវិជ្ជា ដែលលោកគ្រូអ្នកគ្រូ បានបង្ហាត់ បង្ហាញ និង ចែករំលែកនូវចំណេះដឹងដែលគ្រូមាន ដោយមួយចំនួនបានក្លាយទៅជាពាណិជ្ជករ ម្ចាស់ក្រុមហ៊ុន សហគ្រា និង ជាថ្នាក់ដឹកនាំនៅក្នុងជួរមន្ត្រីរាជការជាដើម ។ លោកជំទាវបានបន្តទៀតថា ការរំលឹងដល់គុណគ្រូនេះ គឺជាកាយវិកាដ៏របស់សិស្សជំនាន់ទី២ នៃវិទ្យាល័យ១០មករា ដែលនៅក្នុងរដ្ឋកម្ពុជា ហៅសាលាកំរិត សិក្សាទី២ ដែលបានរៀបចំនូវកម្មវិធីនេះឡើង ក្នុងការរំលឹកនូវអនុស្សាវរីយ៍ក្នុងការសិក្សាពីឆ្នាំ១៩៨៥ដល់ ឆ្នាំ១៩៨៨ ទើបកូនៗទាំងអស់បានទៅបន្តសិក្សានៅតាមមហាវិទ្យាល័យសាកលវិទ្យាល័យមួយចំនួនផងដែរ។ លោកជំទាវក៏បានបញ្ជាក់ថាពេលនេះកូនៗបានក្លាយទៅជាធនធានមនុស្សមួយដ៏សំខាន់របស់សង្គមជាតិ ហើយបានកំពុងចូលរួមចំណែក ក្នុងការកសាងនិងអភិវឌ្ឍន៍ប្រទេស ព្រមទាំងសូមឲ្យប្រពៃណី នៃការជួបជុំមិត្ត រួមជំនាន់នៃអតីតសិស្សវិទ្យាល័យ១០មករានេះឲ្យមានជារៀងរាល់ឆ្នាំ ការរំលឹកឡើងវិញពីយុវវ័យ យុវសិស្ស នាឆ្នាំ១៩៨៨ ឲ្យមាននៅក្នុងក្រអៅបេះដូងដល់យើងគ្រប់គ្នាផងដែរ ។
ក្នុងពិធីការជួបជុំគ្នា ពិសារអាហារសាមគ្គីនាពេលរាត្រីនោះ ក៏មានការច្រៀងរាំសប្បាយជាមិត្តភាពផងដែរ ៕
