ខេត្តកំពង់ឆ្នាំង៖ យុវជនជាប់ចោទម្នាក់ត្រូវបានសមត្ថកិច្ចនគរបាលក្រុងកំពង់ឆ្នាំង ស្ទាក់ចាប់ឃាត់ខ្លួន ដោយជាប់ចោទពីបទបំផ្លិតបំផ្លាញទ្រព្យសម្បតិតិអ្នកដ៏ទៃ ខណៈដែលរូបគេបានគេចខ្លួនបាត់ជាង១ឆ្នាំ ហើយបានត្រឡប់មកដល់មូលដ្ឋានវិញ។ ការចាប់ខ្លួននេះបានធ្វើឡើងនៅ
ល្ងាចថ្ងៃទី០៣ ខែមករា ឆ្នាំ២០១៦ នៅភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង ព្រោះតែកុកភ្លេចជុង ។ សមត្ថកិច្ចនគរបាលក្រុងកំពង់ឆ្នាំងបានអោយដឹងថា៖ យុវជនជាប់ចោទរូបនោះមានឈ្មោះ ម៉ៅ សីហា អាយុ២៥ឆ្នាំ មានទីលំនៅភូមិត្រពាំងបី សង្កាត់ផ្សារឆ្នាំង ក្រុងកំពង់ឆ្នាំង។ ការចាប់ឃាត់ខ្លួនជនសង្ស័យខាងលើនេះ គឺសមត្ថកិច្ចបានចាប់ខ្លួនតាមដីការរបស់តុលាការខេត្តកំពង់ឆ្នាំង លេខ ១៨៦ ចុះថ្ងៃទី២១ ខែមេសា ឆ្នាំ២០១៥ ចេញដោយលោកស្រី គឹម លុយ ចៅក្រមស៊ើបសួរ ដែលបង្គាប់អោយចាប់ខ្លួន ជនសង្ស័យខាងលើ ក្នុងបទចោទប្រកាន់ ពីបទបំផ្លិតបំផ្លាញទ្រព្យសម្បត្តិអ្នកដ៏ទៃ ដែលបានប្រព្រឹត្តឡើង ក្នុងអំឡុងខែកក្កដា ឆ្នាំ២០១៤ នៅក្នុងភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង ។
ជនសង្ស័យខាងលើត្រូវបានតុលាការឃុំខ្លួន ក្នុងពន្ឋនាគារខេត្តនៅព្រឹកថ្ងៃទី០៤ ខែមករា ឆ្នាំ២០ ១៦បន្ទាប់ពីបានសាកសួរកសាងសំណុំរឿងតាមនិតិវិធី ៕
