សៀមរាប៖ ប្រធានបន្ទីរបរិស្ថានខេត្តសៀមរាប លោក ភួង លីណា បានព្រមានចាត់វិធានការផ្លូវច្បាប់ចំពោះប្រជាពលរដ្ឋណាដែលបោះសម្រាមចោលតាមទីសាធារណៈ។
ការព្រមាននេះបានធ្វើឡើងកាលពីព្រឹកថ្ងៃទី០៨ ខែមករា ឆ្នាំ២០១៦ ក្នុងខណៈពេលដែល
លោកចុះពិនិត្យគំនរសំរាមមួយកន្លែង ត្រង់ចំណុចខាងក្រោយផ្សារលើធំថ្មី ព្រំប្រទល់ភូមិតាវៀន និងភូមិជន្លង់ សង្កាត់សាលាកំរើក ក្រុងសៀមរាប។
លោក ភួង លីណា បានឲ្យដឹងថា កន្លងមកខាងមន្ទីរបរិស្ថានខេត្តសៀមរាប បានសហការជាមួយអាជ្ញាធរដែនដី យកធុងសម្រាមមកដាក់នៅចំណុចខាងលើដើម្បីឲ្យប្រជាពលរដ្ឋទុកដាក់សម្រាមឲ្យបានត្រឹមត្រូវ។ លោកបន្តថា ប៉ុន្តែទោះជាយ៉ាងនេះក្តី នៅតែមានប្រជាពលរដ្ឋយកសម្រាមមកបោះចោលក្រៅធុង បង្កឲ្យប៉ះពាល់ដល់សោភ័ណ្ឌភាព និងបរិស្ថានទីក្រុងទេសចរមួយនេះយ៉ាងធ្ងន់ធ្ងរ។
លោកលើកឡើងថា ចំពោះបញ្ហាសម្រាមនេះវាបណ្តាលមកពីបងប្អូនប្រជាពលរដ្ឋផងនិងពីខាងក្រុមហ៊ុនប្រមូលសម្រាមដែលយឺតយ៉ាវផង។
បើតាមការឲ្យដឹងពីប្រជាពលរដ្ឋដែលមានលំនៅដ្ឋានក្បែរគំនរសំរាមនោះ បានឲ្យដឹងថា សម្រាមទាំងនេះមិនមែនជារបស់អ្នករស់នៅម្តុំនោះទេ គឺភាគច្រើនមានអ្នកលួចយកមកចោលនៅពេលយប់។ ប្រជាពលរដ្ឋក៏បានរិះគន់ផងដែរទៅលើក្រុមហ៊ុនហ្គាអីយ៉ា ដែលទទួលសិទ្ធិប្រមូលសំរាមក្នុងក្នុងសៀមរាបនេះថា មិនសូវយកចិត្តទុកដាក់ប្រមូលសំរាមដែលមាននៅតាមទីសាធារណៈនោះទេ ដែលទំនងគេយល់ថា ខាតបង់ផលប្រយោជន៍ក្រុមហ៊ុន។
ចំពោះការលើកឡើងនេះតំណាងក្រុមហ៊ុនហ្គាអ៊ីយ៉ា លោក ស៊ុម សុភក្រ័ បានលើកឡើងថា ការចោលសំរាមអនាធិបតេយ្យនេះ ជាទំលាប់ដ៏អាក្រក់ដែលបង្កផលលំបាកដល់ក្រុមហ៊ុនក៏ដូចជាបុគ្គលិកក្នុងការប្រមូលយកចោល។ លោក ស៊ុម សុភក្រ័ ក៏បានសំណូមពរឲ្យប្រជាពលរដ្ឋចូលរួមបង់ថ្លៃសេវាក្នុងតម្លៃ៥០០០រៀលទៅ១០០០០រៀលដោយថ្លៃសេវានេះ ដើម្បីចូលរួមថែរក្សាបរិស្ថានអនាម័យ សម្រាប់ខេត្តទេសចរណ៍មួយនេះផងដែរ៕
