ខេត្តព្រះវិហារ៖ដើម្បីរក្សាសុវត្ថិភាពវត្ថុតាងបទល្មើសព្រៃឈើរួមមានរណាយន្តអន្ទាក់សត្វព្រៃកាំភ្លើងកែច្នៃនិងស្នាតេះដែលមន្ដ្រីអនុវត្តគម្រោងព្រៃការពារព្រះវិហារនៃស្នាក់ការអង្គការWCSប្រចាំស្រុកឆែបរឹបអូសបានពីក្រុមជនល្មើសចាប់តាំងពីឆ្នាំ២០១២ដល់២០១៥។
វត្ថុតាងទាំងនេះត្រូវបានមន្ដ្រីជំនាញដឹកជញ្ជូនតាមរថយន្តយកមករក្សាទុកនៅឃ្លាំងខណ្ឌរដ្ឋបាលព្រៃឈើព្រះវិហារកាលពីថ្ងៃទី០៩ដល់១០មករា២០១៦។រីឯកាំភ្លើងកែច្នៃមន្ដ្រីជំនាញមេព្រៃអនុវត្តគម្រោងយកទៅប្រគល់អោយស្នងការដ្ឋាននគរបាលខេត្តព្រះវិហារជាអ្នកគ្រប់គ្រង។ប្រភពព័ត៌មានពីពលរដ្ឋនៅមូលដ្ឋានរាយការណ៍ថាវត្ថុតាងស្នែងប្រើសស្នែងខ្ទីងខ្លះ ត្រូវចោរលួចគាស់ឃ្លាំងនៅត្រពាំងព្រីងយកអស់កាលពីពេលកន្លងមក។
មូលហេតុដែលនាំអោយមានការផ្លាស់ប្តូរទីតាំងឃ្លាំងស្តុកទុកវត្ថុតាងទាំងអស់ពីឃ្លាំងត្រពាំងព្រីងនៅក្នុងព្រៃជ្រៅក្នុងឃុំមករតស្រុកឆែបយកមកទុកដាក់ឃ្លាំងនៅឯខេត្តដោយសារបញ្ហាសន្តិសុខមិនល្អនៅទីនោះ។សូមរំលឹកថាឃាតករដែលបាញ់សម្លាប់យ៉ាងសាហាវឃោរឃៅលើមន្ដ្រីជំនាញមេព្រៃម្នាក់,នគរបាលស្រុកឆែបម្នាក់ស្លាប់នៅនឹងកន្លែងនិងនគរបាលព្រំដែនម្នាក់ទៀតរងរបួសធ្ងន់កាលពីចុងឆ្នាំ២០១៥មិនទាន់ចាប់ខ្លួនបាននៅទ្បើយទេពាក់ព័ន្ធការចុះបង្ក្រាបរឹបអូសវត្ថុតាងបទល្មើសរណាយន្ត។
នៅក្នុងរបាយការណ៍របស់មន្ដ្រីអនុវត្តគម្រោងព្រៃការពារឆែបនៃអង្គការWCSដាក់ជូននាយខណ្ឌរដ្ឋបាលព្រៃឈើខេត្តព្រះវិហារដើម្បីសុំការអនុញ្ញាតយកវត្ថុតាងបទល្មើសព្រៃឈើខាងលើយកមករក្សាទុកក្នុងឃ្លាំងរួមមានរណាយន្តសរុបចំនួន៣១៣គ្រឿង,ផ្លែទ្បាមរណាយន្ត២០១ផ្លែ,កាំភ្លើងកែច្នៃ១១៩ដើម,ស្នាតេះ១៣២ដើម។ម៉ាស៊ីនរាវក្បាលអ្នកតា០១គ្រឿង,អាគុយឆក់ត្រី៣៩គ្រឿង,អន្ទាក់២៨០០០ខ្សែ,ស៊ីវ៉ាទ័រឆក់សត្វព្រៃ០១គ្រឿង,ដុំឆក់ត្រីចំនួន៥៣គ្រឿងនិងរំសេវប្រើសម្រាប់ច្នៃគ្រាប់កាំភ្លើងកែច្នៃចំនួនកន្លះគីទ្បូក្រាម។
លោកអ៊ិតភូម្រានាយខណ្ឌរដ្ឋបាលព្រៃឈើព្រះវិហារបានអោយដឹងនៅរសៀលថ្ងៃទី១១មករា២០១៦ថាវត្ថុតាងបទល្មើសព្រៃឈើខាងលើដែលនាំយកមករក្សាទុកនៅឃ្លាំងខណ្ឌរដ្ឋបាលព្រៃឈើខេត្តកាលពីថ្ងៃទី០៩ដល់១០មករា២០១៦នេះដោយសារឃ្លាំងស្តុកនៅត្រពាំងព្រីងវាតូចចង្អៀត។បើសរុបរណាយន្តដែលបង្ក្រាបបាននៅស្រុកឆែបបូករួមទាំងជំនាញមេព្រៃខេត្តបង្ក្រាបបានជាង២០០រណាយន្តទៀតស្មើនឹងប្រមាណ៦០០គ្រឿងគឺតួលេខនេះវាច្រើនណាស់សំរាប់ការបង្ក្រាបវត្ថុតាងកាប់បំផ្លាញព្រៃឈើនៅខេត្តព្រះវិហារ។
លោកនាយខណ្ឌរដ្ឋបាលព្រៃឈើបញ្ជាក់ថាគាត់បានជំរុញអោយស្នាក់ការមេព្រៃទាំងអស់នៅទូទាំងខេត្តព្រះវិហារត្រូវយកវត្ថុតាងបទល្មើសព្រៃឈើជាពិសេសរណាយន្តដែលរឹបអូសបានពីជនខិលខូចយកមករក្សាទុកនៅខណ្ឌរដ្ឋបាលព្រៃឈើផងដែរ។លោកកំពុងរៀបចំកាលបរិច្ឆេទទៅកាន់ថ្នាក់លើក៍ដូចជាស្នើសុំអាជ្ញាធរខេត្តដើម្បីជ្រើសរើសទីតាំងធំណាមួយធ្វើពិធីជាផ្លូវការកិនកំទេចរណាយន្តទាំងនោះនិងសម្ភារះបទល្មើសផ្សេងទៀត៕
