កំពង់ស្ពឺ=ឡានដឹកអុសមួយគ្រឿងត្រូវបានកងរាជអាវុធហត្ថស្រុកឪរ៉ាល់ សហការ សង្កាត់រដ្ឋបាលព្រៃឈើសង្កែសាទប អធិការដ្ឋានព្រៃឈើខាងត្បូងបឹងទន្លេសាប ចាប់បាននៅពេលឡាននេះបានដឹកអនុផលព្រៃឈើ (អុសដុំ)បំណងគេចវេសឲ្យសមត្ថកិច្ចត្រួតពិនិត្យ កាលពីវេលាម៉ោង ១០ និង៣០នាទីយប់ថ្ងៃទី ១៣ខែមករា ឆ្នាំ២០១៦ តាមបណ្តោយផ្លូវលេខ ៤៤នៅចំណុចភូមិតាំងរបង ឃុំហោងសំណំ ស្រុកឪរ៉ាល់ ខេត្តកំពង់ស្ពឺ ។
លោក ហែម សុខា នាយសង្កាត់រដ្ឋបាលព្រៃឈើសង្កែសាទប បានឲ្យដឹងថា ក្រោយពីឃាត់ចាប់បានរថយន្តម៉ាកហ៊ីយ៉ានដាយ ពណ៏ត្រេអ៊ី ពាក់ស្លាកលេខ ខម ៣-៥៣៥២ ដោយមានដឹកអនុផលព្រៃឈើពេញ តែគ្មានលិខិតអនុញ្ញាតិពីរដ្ឋបាលព្រៃឈើឡើយ ។
នាយសង្កាត់បានបន្តថា សមត្ថកិច្ចចំរុះបានឆែកនៅលើរថយន្តខាង មានអុសដែលផ្ទុករហូត ៦៩,៩៦៦ ស្ទែរ ដែលជាចំនួនដ៏ច្រើនលើសលុប តម្រូវឲ្យអ្នកដឹកជញ្ជូនត្រូវតែមានច្បាប់អនុញ្ញាតិពីរដ្ឋបាលព្រៃឈើ(PC) ។
លោកវរសេនីយ៏ត្រី សោម ពុទ្ធតារា មេបញ្ចាការកងរាជអាវុធហត្ថបានបញ្ជាក់ថាលោកបានដឹកនាំកំលាំងបង្ក្រាបដោយសហការជាមួយរដ្ឋបាលព្រៃឈើតែបានប្រគល់ឡាននេះឲ្យជំនាញដោះស្រាយតាមផ្លូវច្បាប់ ។
តាមប្រភពពីអ្នករស់នៅតាមបណ្តោយផ្លូវជាតិ៤៤ បាននិយាយប្រាប់អ្នកយកពត៏មានយើងថា ឡានខាងលើ មិនមែនជារបស់អង្គភាពយោធាណាឬជារបស់កងពលលេខ៩០ នោះទេពោលគឺជារបស់ឈ្មួញម្នាក់ឈ្មោះ ហាក់ ជាឈ្មួញរកស៊ីដឹកអុសដុះស្លែ និងថែមទាំងមានបង្កប់ឈើខ្លៈ ជាញឹកញាប់តែងតែបន្លំភ្លែក សមត្ថកិច្ចដោយយកស្បែកយោធាមកពាក់ ដើម្បីបន្លាចសមត្ថកិច្ចតាមដងផ្លូវ ។ ប្រភពបានឲ្យដឹងទៀតថា ជាក់ស្តែងនៅថ្ងៃដែលសមត្ថកិច្ចចាប់បានតៃកុងឡានបានយកលិខិតក្លែងក្លាយ(PC)លិខិតអនុញ្ញាតិ ហួសសុពលភាពមកបង្ហាញសមត្ថកិច្ច ដែលទង្វើនេះគិតថាសមត្ថកិច្ចមិនដឹង ។ ប្រភពបានឲ្យដឹងដែរថា នៅពេលដែលសមត្ថកិច្ចជំនាញចាប់បានហើយ បុគ្គលខាងលើបានរត់ការពឹងពាក់ឲ្យអ្នកនេះជួយអ្នកជួយឲ្យបានគេចផុតពីការបង់ពិនយ័យកឋវិការចូលរដ្ឋផងដែរ ។សមត្ថកិច្ចខ្លៈក៏បានពាក់ពន្ធ័ក្នុងរឿងបើកឲ្យម្ចាស់ឡានខាងលើដឹកអុសឆ្លងកាត់មិនត្រួតពិនិត្យផងដែរ ដោយដាក់លេះថាឡាននេះមានច្បាប់ត្រឹមត្រូវ តែដល់ពេលបង្ក្រាបបានទើបដឹងថា ឡាននេះដឹកអត់ច្បាប់រាប់ឆ្នាំមកហើយ ។ហើយនៅរសៀលថ្ងៃនេះមិនអាចរកប្រភពណាមកអៈអាងថាឡាននេះជារបស់យោធាឬជារបស់មេឈ្មួញណាបាននោះទេ ៕ ច្បារមន
