បន្ទាយមានជ័យៈ លោក លី សារី អភិបាលរងខេត្តបន្ទាយមានជ័យដឹកនាំ មន្ត្រីជំនាញចុះពិនិត្យនៅទីតាំងធ្វើស្រែប្រាំង ប្រមាណ៤៧០ហិចតា ដែលអជ្ញាធរមូលដ្ឋានបានស្នើរសុំប្រេង១៥០០លីត ដើម្បីបូមទឹកសង្គ្រោះពីរដ្ឋបាលខេត្តបន្ទាយមានជ័យ នាល្ងាចថ្ងៃទី១៥មករា២០១៥។
ស្រូវប្រាំងដែលត្រូវសង្គ្រោះ ទើបតែធ្វើមុន ការចេញប្រកាសពីរាជរដ្ឋាភិបាលដែលអោយអាជ្ញាធរគ្រប់ខេត្ត សន្សំសំចៃទឹក ទុកសម្រាប់ប្រើប្រាស់នារដូវប្រាំងខាងមុខ ហើយស្ថិតក្នុងសង្កាត់កោះពងសត្វ ក្រុងសិរីសោភ័ណ ខ្លះ ទុំដាក់គ្រាប់ អាចម្រមូលផលបាន ខ្លះទើប ចេញផ្កាហើយខ្លះទៀត ទើបលេងខ្លួនប៉ុណ្ណោះ ប្រសិនមិនមានការសង្គ្រោះទាន់ពេលវេលា ស្រូវប្រាំងមួយភាគធំត្រូវស្កក ឬងាប់ដើមដោយកង្វះទឹកនេះ។
លោក លី សារី អភិបាលរងខេត្តបន្ទាយមានជ័យនិងមន្ត្រីជំនាញ ក្រោយប្រជុំពិភាក្សា ជុំវិញបញ្ហាប្រឈមនេះ និងការចុះពិនិត្យជាក់ស្ដែងនូវទីតាំងស្រែប្រាំងឃើញថា: ការសំណូមពរពលរដ្ឋនិងអជ្ញាធរមូលដ្ឋាន ពិតជាមានភាពចាំបាច់ ក្នុងការសង្គ្រោះស្រូវប្រាំងនេះមែន ហើយស្របតាមការណែនាំរបស់រាជរដ្ឋាភិបាល អនុញ្ញាតិអោយពលរដ្ឋ ធ្វើស្រែប្រាំងតែម្ដង ក្នុងឆ្នាំនេះ។
លោក លី សារី និងលើកយកបញ្ហារដែលសិក្សារួចនេះ រាយការណ៍ជូនឯកឧត្ដមគោ ស៊ុសារឿត អភិបាលខេត្តដើម្បីទួលយកសំណើរសុំប្រេង១៥០០លីតបូមទឹកសង្គ្រោះស្រូវប្រាំង ក្នុងសង្កាត់កោះពងសត្វបានទាន់ពេលវេលា៕ដោយឃិន គន្ធា
