ទ្រីប៉ូលី៖យ៉ាងហោចណាស់មនុស្ស 40 នាក់បានស្លាប់ និង 51នាក់ផ្សេងទៀតត្រូវបាន ជួយសង្គ្រោះ បន្ទាប់ពីទូកដឹកជនចំណាកស្រុកភាគច្រើនអាហ្វ្រិក នាតំបន់សាហារ៉ា បានលិច ក្រោយចេញពីប្រទេសលីប៊ី នាឆ្នេរខាងកើតនៃក្រុងទ្រីប៉ូលី នេះបើតាមរដ្ឋាភិបាលលីប៊ី បាននិយាយកាលពីថ្ងៃអាទិត្យ ហើយត្រូវបានវេបសាយបរទេសចិន ឆាយណាដេលីផ្សាយ កាលពីថ្ងៃចន្ទ។
លោក Rami Kaal អ្នកនាំពាក្យក្រសួងមហាផ្ទៃលីប៊ី បាននិយាយថា នាវានេះបានបង្ហាញខ្លួនឡើងហើយបានស្ថិតក្នុងការលំបាកចម្ងាយប្រហែល 37 ម៉ាយល៍ (60 គីឡូម៉ែត្រ ) ភាគខាងកើតនៃក្រុងទ្រីប៉ូលី។ ព្រំដែននៃប្រទេសលីប៊ី ជាមួយប្រទេសជិតខាង អនុតំបន់សាហារ៉ាបានក្លាយជាទីឆ្លងកាត់ឬសំចតមុនទៅប្រទេសអ៊ីតាលី និង Malta នៅសមុទ្រមេឌីទែរ៉ាណេដែលបានធ្វើឱ្យប្រទេសអាហ្វ្រិកខាងជើងមួយនេះក្លាយជាផ្លូវ ឆ្លងកាត់ជាធម្មតាសម្រាប់ជនចំណាកស្រុក ព្យាយាមឆ្លងកាត់ដើម្បីឈានទៅដល់ទ្វីបអឺរ៉ុប។
ជាមួយនឹងការពង្រឹងសន្តិសុខឆ្នេរសមុទ្រ កងទ័ពជើងទឹកនិងកងកម្លាំងប្រដាប់អាវុធនៅតែ ត្រូវការនៅក្នុងការបណ្តុះបណ្តាលមន្ត្រីលីប៊ី ហើយចង់បានជំនួយបន្ថែមពីដៃគូលោកខាងលិច ដើម្បីទប់ស្កាត់លំហូរនៃជនអន្តោរប្រវេសន៍ខុសច្បាប់ ដែលតែងតែព្យាយាមឆ្លងកាត់តាមរយៈ ប្រទេសលីប៊ីទៅកាន់អឺរ៉ុបនោះ។
នៅក្នុងខែមីនា កងទ័ពជើងទឹករបស់ប្រទេសអ៊ីតាលីបានជួយសង្គ្រោះជនចំណាកស្រុក ជាង 4.000 នាក់ មកពីទូក នៅក្នុងសមុទ្រមេឌីទែរ៉ាណេភាគខាងត្បូងនៃក្រុងស៊ីសីលី ក្នុងពេលតែបួនថ្ងៃ។ ជនចំណាកស្រុកជាច្រើនបានបង់លុយច្រើនជាង 1000 ដុល្លារទៅក្រុមអ្នកនាំផ្លូវខុសច្បាប់ឬឧក្រិដ្ឋជនចំពោះការធ្វើដំណើរតាមសមុទ្រពីប្រទេសលីប៊ី ដែលជាកន្លែងដែល
រដ្ឋាភិបាលបានតស៊ូដើម្បីគ្រប់គ្រងប្រទេសឲ្យពេញលេញបន្ទាប់ពីមានជម្លោះប្រដាប់អាវុធនិង កងទ័ពនៃអតីតក្រុមឧទ្ទាម ចាប់តាំងពីសង្គ្រាមស៊ីវិល ដែលបានទម្លាក់ លោក Muammar Gaddafi ក្នុងឆ្នាំ 2011 ៕
