ក្រុងបាងកកៈ ពេលនេះក្រុមអាវក្រហមដែលគាំទ្ររដ្ឋាភិបាលរាប់ពាន់នាក់បានប្រមូលផ្ដុំនៅរាជធានីរបស់ប្រទេសថៃដើម្បីប្រជែងជាមួយការប៉ុនប៉ងរបស់ក្រុមអ្នកតវ៉ាប្រឆាំងនៃក្រុមអាវលឿងដើម្បីឲ្យប្រគល់អំណាចទៅឲ្យរបបដែលមិនជាប់ឆ្នោតមួយដោយការព្រមានថា ព្រះរាជាណាចក្រនេះឆ្ពោះទៅរកវិបត្តិសង្គ្រាមស៊ីវិល ខណៈមេដឹកនាំបណ្តាប្រទេសអាស៊ាន ក៏បានព្រួយបារម្ភហើយសុំឲ្យប្រទេសថៃដោះស្រាយដោយសន្តិវិធីដែរ។ សូមបញ្ជាក់ថា ការបណ្ដេញនាយករដ្ឋមន្ត្រីលោកស្រីយីងឡាក់ ស៊ីណាវ៉ាត្រា និងរដ្ឋមន្ត្រី៩ រូប ដោយតុលាការរដ្ឋធម្មនុញ្ញនៅសប្ដាហ៍មុន បានទម្លាក់ប្រទេសដ៏ជ្រួលច្របល់នេះទៅក្នុងវិបតិ្តកាន់តែជ្រៅឬដូចក្រុមអាវក្រហមព្រមានពីសង្គ្រាមស៊ីវិលថែមទៀត។ ក្រុមមន្ត្រីបាននិយាយថា ប៉ូលិសប្រមាណ
ជា បីពាន់នាក់បានប្រចាំការសម្រាប់ការជួបជុំ គាំទ្ររដ្ឋាភិបាលនៅឯជាយក្រុងបាងកកភាគខាងលិចពីថ្ងៃសៅរ៍ ខណៈ អ្នកគាំទ្របានកាន់លើករូបថតលោកស្រីយីងឡាក់ឡើងខ្ពស់ ចលនាអាវក្រហមនេះបាននិយាយថា ខ្លួននឹងបន្តការតវ៉ាពីការជ្រើសរើសនាយករដ្ឋមន្ត្រីថ្មី។ លោកចាទូផន ព្រំផាន ប្រមុខក្រុមអាវក្រហម បាននិយាយថា ក្រុមអាវក្រហមមិនអាច
ទទួលការតែងតាំងនាយករដ្ឋមន្ត្រីមិនស្របតាមលទ្ធិប្រជាធិបតេយ្យ និងអធម្មនុញ្ញភាពបាននោះឡើយ ហើយបានចាត់ទុកថាវានឹងជាការចាប់ផ្ដើមនៃមហន្តរាយមួយសម្រាប់ប្រទេសជាតិដែលនឹងនាំទៅរកសង្គ្រាមស៊ីវិល»។ ក្រុមអ្នកតវ៉ាប្រឆាំងរដ្ឋាភិបាល ចង់ឲ្យសភាជាន់ខ្ពស់ ដកគណៈរដ្ឋមន្ត្រីចេញដែលក្នុងនោះមាននាយករដ្ឋមន្ត្រីចាំផ្ទះ លោក នីវ៉ាត់ ទំរង់ ប៊ូនសុងផៃសាន ជាអ្នកស្មោះត្រង់នឹងលោក ថាក់ស៊ីន ចេញ។
មន្ត្រីយោធាថៃម្នាក់អះអាងកាលពីថ្ងៃទី ១១ ឧសភាថា កងទ័ពនិងប៉ូលិសរក្សាការត្រួតត្រាវិមានរដ្ឋាភិបាលថៃនៅក្រុងបាង កក ទោះបីជាពួកមេដឹកនាំបាតុកម្មប្រឆាំងរដ្ឋាភិបាល ត្រូវបានអនុញ្ញាតឱ្យធ្វើសន្និសីទសារព័ត៌មានក្នុងអគារមួយនៃ ប្លុកវិមាននោះក្តី ។ ដោយឡែក ASEAN សូមអោយប្រទេសថៃដោះស្រាយបញ្ហាដោយសន្តិវិធី សម្តេចតេជោ ហ៊ុន សែន
នាយករដ្ឋមន្ត្រីនៃព្រះរាជាណាចក្រ កម្ពុជាបានស្នើដល់ប្រទេសថៃជំរុញការចរចាពិភាក្សារកដំណោះស្រាយដោយគោរពតាមគោលការណ៍លទ្ឋិប្រជាធិបតេយ្យ និង នីតិរដ្ឋដើម្បីបញ្ចប់វិបត្តិនៅក្នុងប្រទេសថៃ។ ទន្ទឹមនោះដែរ ASEAN បានស្នើដល់ប្រទេសចិន និងប្រទេសវៀតណាមបញ្ឈប់មានជម្លោះហិង្សាដាក់គ្នាលើបញ្ហាសមុទ្រចិនភាគខាងត្បូង ហើយបែរមករកការចរចាដោយសន្តិភាពឡើងវិញផងដែរ៕
