ខេត្តព្រះវិហារ៖ បច្ចុប្បន្ននេះសេវាផ្គត់ផ្គង់ទឹកស្អាតនៅក្នុងព្រះវិហារដាច់ញឹកញាប់ធ្វើអោយលំបាកដល់ជីវភាពរស់នៅប្រចាំថ្ងៃរបស់ប្រជាពលរដ្ឋដូចជាដាំស្ល,ងូតទឹក,បោកសំលៀកបំពាក់ជាដើមនិងពលរដ្ឋខ្លះទៀតរស់នៅក្បែរៗក្រុងត្រូវទិញទឹកឯកជនដឹកតាមរទេះនិងរថយន្តថែមទៀត។ការផ្គត់ផ្គង់ទឹកស្អាតនៅទីរួមខេត្តព្រះវិហារត្រូវការអភិវឌ្ឍន៍ទាញយកប្រភពទឹកអោយធំជាងបច្ចុប្បន្នបើមិនដូច្នោះទេពលរដ្ឋនឹងគ្មានទឹកស្អាតប្រើប្រាស់នៅថ្ងៃណាមួយមិនខានខណះពេលនេះតម្រូវការប្រើប្រាស់កាន់តែធំទៅៗ។
សេចក្តីរាយការណ៍ពីប្រជាពលរដ្ឋបានអោយដឹងថាមូលហេតុដែលក្រុមហ៊ុនទឹកស្អាតផ្គត់ផ្គង់ទឹកមិនបានគ្រប់គ្រាន់ដោយសារក្រុមហ៊ុនឯកជនមានលក្ខណះតូចរីឯការប្រើប្រាស់ទឹកស្អាតរបស់ពលរដ្ឋវាមានទំហំធំជាង។ការទាញយកប្រភពទឹកគឺក្រុមហ៊ុនមិនបានចំណាយដើមទុនជីកអណ្ទូងធំៗនោះទេដោយពឹងផ្អែកទាំងស្រុងទៅនឹងប្រភពទឹកស្ទឹងសែនតែប៉ុណ្ណោះ។រីឯទឹកស្ទឹងសែននៅរដូវប្រាំងអាចប្រឈមនឹងគ្រោះរីងស្ងួតថែមទៀតពេលនោះការបូមទឹករបស់ក្រុមហ៊ុនយកមកចម្រោះទឹកស្អាតនឹងកាត់ផ្តាច់។
តំណាងក្រុមហ៊ុនទឹកស្អាតខេត្តព្រះវិហារបានទទួលស្គាល់ថាបើសិនទឹកស្ទឹងសែនរីងស្ងួតនៅថ្ងៃណាមួយនោះខាងក្រុមហ៊ុនក៍មិនមានលទ្ធភាពផ្គត់ផ្គង់ទឹកស្អាតដែរដោយសារខាងក្រុមហ៊ុនបូមទឹកពីទឹកស្ទឹងសែនយកមកផ្គត់ផ្គង់។ខាងក្រុមហ៊ុនមិនទាន់ប្រកាសបង្ហាញការរៀបចំគម្រោងពង្រីកអាជីវកម្មទឹកស្អាតរបស់ខ្លួនអោយធំជាងនេះនៅទ្បើយទេខណះពេលនេះពលរដ្ឋរិះគន់ថាកំពុងខ្វះទឹកស្អាតប្រើប្រាស់។
ប្រជាពលរដ្ឋមួយចំនួនរស់នៅសង្កាត់ប៉ាលហាលនិងសង្កាត់កំពង់ប្រណាកក្នុងក្រុងព្រះវិហារបានអោយដឹងថានៅតំបន់ពួកគាត់មិនទាន់មានបណ្តាញទឹកស្អាតប្រើប្រាស់នៅទ្បើយទេគឺរាល់ថ្ងៃត្រូវចំណាយលុយច្រើនដើម្បីទិញទឹកធុងដឹកតាមរទេះសំរាប់ប្រើប្រចាំថ្ងៃ។ពលរដ្ឋមានជីវភាពខ្វះខាតនិយាយថាទឹកក្នុង០១ម៉ែត្រគូបថ្លៃរហូតដល់០១ម៉ឺនរៀលដោយសារអ្នកលក់ដឹកយកមកឆ្ងាយដែរ។បើធ្វើអណ្តូងស្នប់ត្រូវចំណាយលុយប្រមាណ១ពាន់ដុល្លារអាមេរិកឯណោះ។
ប្រជាពលរដ្ឋខាងលើមួយចំនួនបានសើចចំអកអោយលោកសេងសារីប្រធានមន្ទីរអភិវឌ្ឍន៍ជនបទខេត្តព្រះវិហារនិងជាបុរសវ័យចាស់ម្នាក់ដែលកាន់កាប់មន្ទីរជិត២០ឆ្នាំទៅហើយគាត់មិនបានគិតគូរយកចិត្តទុកដាក់ជីកអណ្តូងទឹកនិងជីកស្រះទឹកសមូហភាពអោយប្រជាពលរដ្ឋដែលមានជីវភាពខ្វះខាតបានប្រើប្រាស់មួយនោះទេ។
ពលរដ្ឋថ្លែងថានិយាយពីកំរិតជីវភាពរបស់លោកសេងសារីត្រូវបានគេដឹងគ្រប់ៗគ្នាថាជាមន្ដ្រីមានទ្រព្យសម្បត្តិស្តុកស្តម្ភម្នាក់ប្រចាំខេត្តព្រះវិហារផងដែរក្នុងចំណោមបណ្តាប្រធានមន្ទីរនិងអ្នកធំផ្សេងៗទៀតគឺលោកសេងសារីទើបសាងសង់ផ្ទះល្វែងប្រណីតៗប្រមាណ៦ល្វែងស្ថិតនៅចំកណ្តាលទីក្រុងព្រះវិហារជាប់ផ្លូវភ្លោះសួនច្បារ។ចំណែកប្រជាពលរដ្ឋវិញមានជីវភាពខ្វះខាតរកតែអណ្តូងទឹកមួយប្រើប្រាស់មិនបាន៕
