សៀមរាប៖ មន្ត្រីនគរបាលម្នាក់បានយកកាំភ្លើងអាកាបាញ់ទៅលើបុរសម្នាក់ បណ្តាលឲ្យស្លាប់ភ្លាមៗនៅនឹងកន្លែងកើតហេតុ បន្ទាប់ពីអ្នកទាំងពីរមានទំនាស់ពាក្យសម្តីក្នុងវង់ ផឹកស៊ី។
ហេតុការនេះកើតឡើងកាលពីវេលាម៉ោង០៣ទៀបភ្លឺថ្ងៃទី២៥ មករា នេះ នៅមុខប៉ុស្តិ៍យាម
របស់នគរបាលការពារបេតិកភណ្ឌប្រាសាទព្រះខណ័ ក្នុងភូមិលាងដៃ ឃុំលាងដៃ ស្រុកអង្គរធំ ខេត្តសៀមរាប។
ជនរងគ្រោះ ដែលស្លាប់មានឈ្មោះ ជា ភារុន ភេទប្រុស អាយុ ២៩ឆ្នាំ ត្រូវជាមិត្តភក្ក្រ និងជនបង្ក រស់នៅភូមិ កើតហេតុខាងលើ ។ ចំណែកជនបង្កឈ្មោះ សួរគឹមសាន់ ហៅឡោះភេទប្រុស អាយុ៣៥ឆ្នាំ ជាមន្ត្រីនគរបាលការពារបេតិកភណ័ មានទីលំនៅភូមិ គោកដូង សង្កាត់ទឹកវិល ក្រុងសៀមរាប។អធិការនគរបាលស្រុកអង្គរធំ លោកទូច ប៊ុនធឿន បានឲ្យដឹងថា តាមការសាកសួរសាក្សីនៅកន្លែងកើតហេតុ គេបានប្រាប់ថា ជនរងគ្រោះ និងជនដៃដល់គឺជាមិត្តភក្ត្រនឹងគ្នា ហើយនៅយប់កើតហេតុ ពួកគេនិងមិត្តភក្ត្រដទៃទៀត បានជុំគ្នាផឹកស៊ីតាំងក្បាលព្រលប់ថ្ងៃទី២៤មកម្ល៉េះ។
លោកអធិការបន្តថា លុះដល់រំលងអាធ្រាតចូលថ្ងៃទី២៥ មករា ជនរងគ្រោះ និងជនដៃដល់ដែលម្នាក់ៗស្ថិតក្នុងស្ថានភាពស្រវឹងទៅហើយនោះក៏ស្រាប់តែមានទំនាស់ពាក្យសម្តីជាមួយគ្នា។ លោកបន្តថា បន្ទាប់ពីមានជម្លោះបែបនេះ ជនដៃដល់ក៏បានទាញកាំភ្លើងអាកា A K 47 ស្វាយបត់ មកបាញ់ចំនួន២គ្រាប់សំដៅជនរងគ្រោះត្រូវចំដៃ ស្តាំ១គ្រាប់និងចំដើមទ្រូងមកឆ្អឹងខ្នង បណ្តាលឱ្យស្លាប់ភ្លាមៗក្នុងថ្លុកឈាមនៅកន្លែងកើតហេតុ។ បន្ទាប់ពីជនបង្កការបាញ់សម្លាប់ជនរងគ្រោះរួចហើយជនដៃដល់បានរត់គេចខ្លួនបាត់ស្រមោល។
ប្រភពពីប្រជាពលរដ្ឋនៅជិតកន្លែងកើតហេតុបានឲ្យដឹងថា គ្រាន់តែជនរងគ្រោះហៅជនបង្កថាបងថ្លៃ ទើបជនបង្កស្ទុះយកកាំភ្លើងអាកា A K 47 ស្វាយបត់ បាញ់សំដៅទៅលើជនរងគ្រោះ។
លោកទូច ប៊ុនធឿន បន្តថា បន្ទាប់ពីសមត្ថកិច្ទពិនិត្យរួចរាល់ សាកសពជនរងគ្រោះប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕
វេហាស៍
